Genese 22 - Iaai Bible 1901 (New Caledonia)

¹ KE hwaban ta je ûnyi e, haba Khong ame cubic Aberahama, me ha kâu, ka habe, Aberahama lö; me e ame thu, ka habe, Inya ang.

² Ke e ame ha, ka habe, Hom dö nokom, a nokom a khaca, at u me betenge gan, jia Isaaka, me he thö ka hnyi hnyei Moria; me hudo thö e me hnân hut adre le, hon ke bucen oge me he ka ha köu.

³ Me Aberahama ame vesâkong, me ip tap hon haleny asina, me hom ke li at ûnyi hnyi je hidröu unyin, me Isaaka a nokon; ke e ame khe utö hnân le hut, me todrö me he ka hnyi dok Khong ame hia but ha kâu.

⁴ Haba hnyi bong a kuniny, Aberahama ame bwele me wâ dok ae tiga sâkâû.

⁵ Me Aberahama ame ha ka anyin li hidröu, ka habe, Me laba ju öbu eang me asina, ke oge me he bi nya me da kâ ʼle; ke öhmu me he ka hmi me hmetu ju köbu.

⁶ Ke Aberahama ame hom thi ot hobi kâu hut adre le, me ip hu Isaaka a nokon; ke e ame hom hele me meic hnyi hnyamen; ke ödru me tha he.

⁷ Ke Isaaka ame ha kö Aberahama a kamen, ka habe, Cica lö, me haingen ka habe, Nökuk lö, inya ang. Ke haingen, ka habe, Wâ bi meic me thi ot: ke ewa nokon mamoe hnân hut adre le?

⁸ Ke Aberahama ame thu, ka habe, Nökuk, hamen Khong he ka penapena hobi kâu bi ke nokon mamoe hnân hut adre le: me ödru me tha he.

⁹ Ke ödru me o but ka hnyi dok Khong ame ha kâu; ke Aberahama ame otilâ eling taben hut, me khutâ inyâ, me co Isaaka a nokon, me ip e hon ûtoiny taben hut.

¹⁰ Ke Aberahama ame inâ but hnyamen me hom hele he ka hlingâ nokon.

¹¹ Ke haba angela anyi Iehova ame hawâ e ûnyi hnyi drany me ha, ka habe, Aberahama, Aberahama lö: me haingen, ka habe, Inya ang.

¹² Me e ame ha, ka habe, Ca ip hnyamâm hon da, ke ca ânyâ ke ûnyi kâu: anyin a oge wâ but walang ang a u me outen Khong, anyin a u je ca behânâ gak nokom, wale nokom a khaca.

¹³ Me Aberahama ame bwele me wâ, ke wâ bi, e hnyi hoton ke mamoe baga, ame vhet li faoiny hnyi hnyot: ke Aberahama ame he me hom mamoe baga, me hudo biju hnân hut adre le, me hwaban nokon.

¹⁴ Ke Aberahama ame hwenyi ien dok e, ka habe, Iehova-irae: helâ me hnödra hna labö ha ke ne o but hnyi bong ang, ka habe, Adre me he ka penapena e hnyi bucen anyi Iehova.

¹⁵ Ke ame olo hongot angela anyi Iehova kö Aberahama ûnyi hnyi drany,

¹⁶ me ha, ka habe, Haingö Iehova, ka habe, Oge hia but khemanyin gak bi, anyin a u je hia but ânyâ ûnyi e, kʼ u je ca behânâ nokom, wale nokom a khaca:

¹⁷ anyin a wale oge me he ka ti ohnahici u, me ti osiâ je mâtrânâm, me me helâ me ta je okhûiny drany, me helâ me öny hnyi haten köiö; kʼ ame he mâtrânâm ha hu homagöuleiny ta je iwa-hnaimiöny më;

¹⁸ ke ame he ka hnahic ûnyi ge mâtrânâm ta je hnyei hia thithö eang hmelen; anyin a u je löng hoton hok hofuc.

¹⁹ Ke Aberahama ame he hmetu ka li hidröu a anyin, me ödrin e tot, me tha he Bere-seba ai; ke Aberahama ame labâ Bere-seba.

²⁰ Ke hwaban ta je ûnyi e, adre me thumetu Aberahama, ka habe, Wâ bi, haba Mileka ame hia but hnokoâ nöku Nahora a liamekeiny möu;

²¹ jia Uza nokon a bân, me Buza liamekeiny më, me Kemuela kamö Arama;

²² me Kesed, me Khaso, me Piledasa, me Jidelafo, me Bethuela.

²³ Ke Bethuela ame hnöku Rebeka: haba ödrin eit Mileka ame hnokoâ a je laku Nahora liamekeiny me Aberahama.

²⁴ Ke haba anyin ke momo, Reuma ien, e ame hnokoâ minya Teba, me Gaama, me Takasa, me Maaka.