Genese 21 - Iaai Bible 1901 (New Caledonia)

¹ KE haba Iehova ame senö Sara helâ me hnen hna ha, me Iehova ame ânyâ kö Sara helâ me hwan hofuc.

² Ke ame erkin dut Sara, me ame hnokoâ nöku Aberahama baga ka hingat ut, hnyi hing ûen Khong ame hia but ha kâu.

³ Me Aberahama ame hwenyi ien nokon a hnokoâ Sara, Isaaka

⁴ Ke Aberahama ame peritomoni Isaaka a nokon ke eit ta bonginy, helâji me hnen Khong hna hûna kâu.

⁵ Ke khaca haded je hunai Aberahama hnyi hna hnöku Isaaka a nokon.

⁶ Ke haingö Sara, ka habe, Khong ame hia but ohlumö nya; kʼ ame he ka tha hluma mönya tavat hia adre me löng.

⁷ Ke haingen momo, ka habe, Ia ame he ka ba ehac kö Aberahama, ka habe, Ama he Sara ka asen je wanakat? anyin a oge hia but hnokoâ nokon da ke hingat ut.

⁸ Ke ame hûhûö thö wanakat, kʼ adre bnebaiö but: ke Aberahama ame ânyâ bijeû ae gan hnyi bong adre hnebaiö Isaaka hnyin.

⁹ Ke Sara ame wâ nöku Hagara, momo Aigupito, waleji nöku Aberahama, kʼ ame hiâ.

¹⁰ Waleling me me ha ko Aberahama, ka habe, Tha obâ but momo eang adre ûco me nokon: anyin ame ca he nokon momo eang adre ûco ka tha hu hwajekhon me Isaaka nökuk.

¹¹ Ke a vec gan hmâ Aberahama ge hofuc eling, can nokon.

¹² Ke Khong ame ha kö Aberahama, ka habe, E so u me ca vec can da, me momo u je ûco; ke löng ju hia thithö hna ha köu hnö Sara; anyin adre me he ka ha mâtrânâm anyi ga Isaaka.

¹³ Ke oge me he bi nya ka wia nokon momo adre ûco me hnân hnyei, anyin a e mâtrânâm.

¹⁴ Me Aberahama ame vesâkong, me hok areto me kaia ae lup, me ham kö Hagara, me ip hon bajebenyin, me wanakat minya, me kunâ but momo: kʼ ame he but me he monu hnyi hnyebuba Bere-seba.

¹⁵ Ke a hme thö kaia, me momo ame ip ju wanakat eû hmelen ûö ae okhulit.

¹⁶ Kʼ ame he momo me laba sâkâûâ cicö e, helâke hna fana ka hnyin: anyin a haingen, ka habe, Iny na ca wâ imekiny wanakat. Ke momo ame laba cicö me tenge hwege goranyai.

¹⁷ Ke haba Khong ame löng hwan da; me angela anyin Khong ame hongot hnyi drany kö Hagara, ka habe, Hagara lö, ieû gam? ca ot bi, anyin a löng ut Khong hwan da hnyi hnen hna mokut.

¹⁸ Tödro, kap dö goranyai da, me kap hnen hnyamâm; anyin a oge me he ka wia e me me hnyei ae gan.

¹⁹ Ke Khong ame obwela li emakan, me e ame wâ an, me e ame he but me öunöngötâ kaia, me habelen da.

²⁰ Ke tha e Khong me da, ke e ame hûhûö thö; ke e ame laba hnyi hnyebuba, me e at ame fana bi.

²¹ Kʼ ame laba hnyi hnyebuba Parana: ke hinyen ame hok momo ûnyi hnyi hnyei Aigupito me âiân.

²² Ke haba hnyi ûen eling Abimeleke me Fikolo tuhan anyin je deö vat, ödru me ûhnenamö me Aberahama me ha, ka habe, E unyâm Khong hnyi ta je ûnyi hia u je ânyâ:

²³ anyin a wale e so u ma khemanyinâ ien Khong könya eang, a u me ca he ka iyawö könya, me nokuk, me nokon nökuk: me u me he ka ânyâ könya, me ka hnyei u me laba kanyua hnyin, helâ me hnök hna betenge köu.

²⁴ Me haingö Aberahama, ka habe, Oge me he ka khemanyin.

²⁵ Ke Aberahama ame û Abimeleke can an adre koû, waleji ame hûgûnâ hnen je athnyabai Abimeleke.

²⁶ Me haingö Abimeleke ka habe, E ca khanö nya at a ânyâ ûnyi e: ke u je ca thumetu nya minya, ke oge me ca löng ke ne but hnyi bong aög.

²⁷ Me Aberahama ame hom je mamoe me kâu, me ham kö Abimeleke; me ödru me ûhihinyköu.

²⁸ Ke Aberahama ame hake ip je nokon mamoe momo a seven ûnyi hnyi hnahát.

²⁹ Ke haingö Abimeleke kö Aberahama, ka habe, Ieû bongon je nokon mamoe momo eang a seven a je ke ip?

³⁰ Me haingen, ka habe, U me he ka kap ûnyi gak je lakon mamoe momo a seven, me me bi haten könya, a oge hia but koû an eang.

³¹ Anyin a wale e ame hwenyi ien dok e Bere-seba, anyin a ödre ûkhemanyin eling.

³² Wale ödru me ûhihinyköu e Bere-seba: ke ame todrö Abimeleke me Fikolo tuhan anyin je deö vat, me ödru me hmetu ka hnyi hnyei iny at Filisite.

³³ Ke Aherahama ame ta ke ûö tarfa e Bere-seba, me hâwâ iö Iehova eling, Khong a Nyiele balua.

³⁴ Ke se hia bongu Aberahama hnyi hnyei iny at Filisiti.