Genese 20 - Iaai Bible 1901 (New Caledonia)

¹ KE Aberahama ame hok tot ûheny e ka hnyi hnyei hnyi Whaiöu, me laba wanben Kadesi me Sura, me e ame laba kanyua e Gerara.

² Ke haingö Aberahama ga Sara a âiân, ka habe, Hanik at ang: me Abimeleke thaniny Gerara ame ûkhûnöng ka hum Sara.

³ Ke Khong ame o but kö Abimeleke hnyi bwi hnyi hnyinghet, me ha kâu, ka habe, Wâ bi u me helâ me at ae mokcu can momo u je hom; anyin a e âiân ke at.

⁴ Ke Abimeleke ame tiga ca ûhakekenyi më: ke e ame ha, ka habe, Than lö, u je he bi ka hlingâ hnyei ae wisa?

⁵ Hawa, a ca ha könya, ka habe, Hanik at e? ke haba momo, e ame ha minya, ka habe, Hanik at ang: me oge hia but ânyâ ûnyi ang ge hnyekuk ae hnathu, me li hnyamök ae alai.

⁶ Me Khong ame ha kâu hnyi bwi, ka habe, Eke, e khanö nya a u je ânyâ e hnyi hnyekom ae hnathu, me oge me hom behanö u, wâ u nye kong könya: waleling mʼ oge me ca hnö u he ka kâlâ e.

⁷ Anyin a wale, he thö u ka hna hmetu momo ka âiân: anyin a e perofeta, kʼ ame he ka hic hobi köu, me u me he ka möt: ke u je ne ca he ka hna hmetu, wâhmakhmeto ju a u me he ka mokcu, u bi, me je waem hia.

⁸ Ke Abimeleke ame vesâkong, me Hawa je athnyabainy hia, me thumetu ödrin ge ta je ûnyi hia e: me ame ot gan hmâ tavat.

⁹ Me Abimeleke ame hawo Aberahama, me ha kâu, ka habe, Ieû ang u je hia but ânyâ köhmun? ke ieû anyik monu köu, wale me u je bi jönik gan hmâ me dökhuk dökhu? u je hia but ânyâ könya ta je ûnyi a ca hnân ânyâ.

¹⁰ Me haingö Abimeleke kö Aberahama, ka habe, Ieû u je wâ me u me ânyâ thö ûnyi e?

¹¹ Ke Aberahama ame ha, ka habe, Oge me ûnykûme bi nya, ka habe, e ba ot ka Khong hnyi dok ang; me ödrin e he ka hlingö nya can öiök.

¹² Ke haba khaca, e hnathu, hanik e, ke nöku cica, ke ve hinyöhmu bi; kʼ ame wia me me öiök bi:

¹³ ke haba hnyi ûen Khong ame ohei nya ûnyi hnyi hyaba cica, me oge me ha kâu, ka habe, Walang ânyâm ibetengiö u me he ka ânyâ könya, a haba hnyi ta je hnyei ötu me he ka o hnyin, u me he ka haiö nya, ka habe, Hanik ang.

¹⁴ Ke Abimeleke ame hom ta je mamoe me kâu, me athnyaba baga me momo, me ham kö Aberahama, me hnö Sara âiân hmetu kâu.

¹⁵ Ke Abimeleke ame ha, ka habe, Wâ bi, ik hnyei hnyi hnyimâkâm: laba ju hnâm hna he ka weny.

¹⁶ Ke haingen kö Sara, ka habe, Wâ bi, oge hia but ham ka hânâm ta je ong sileva a khaca thauzan: ke wâ bi, haba ûnyi e me hnân tube hnyimâkâm, mʼ ödrin hia a tha ödrin möu; mʼ u me he ka wisa hnyi hnyimakan tavat hia.

¹⁷ Ke Aberahama ame hic ka Khong: ke Khong ame osoi Abimeleke, me âiân me lathnyabainy omomo; me ödrin e hnokoâ bi.

¹⁸ Anyin a hia but Iehova otounyö omomo hia hnyi lapanyi Abimeleke ca Sara öiö Aberahama.