Genese 2 - Iaai Bible 1901 (New Caledonia)

¹ KE ame umo thö drany me hmeledrany me ta je ûnyi hia thithö eû hnyin.

² Ke haba hnyi bong a seveniny Khong ame oumo anyin ta je huliwa waleji e ame ânyâ.

³ Ke haba Khong ame hahnahicâ bong a seveniny, me okabâ e: anyin a e ame menâ hnyin, ûnyi hnyi anyin ta je huliwa hia thithö waleji Khong ame op me ânyâ.

⁴ Walang je bongon ioiny drany me hmeledrany, waleji hnyi ûen adre op li ûnyi e, hnyi bong Iehova Khong ame ânyâ hmeledrany me drany.

⁵ Ke tiga ba hnye-uten hnyei hnyi kânâ, ke tiga ca kû thö khölakiny hnyei: anyin a Iehova Khong ame tiga ca ota we ka hnyi hon kânâ, ke tiga ba at he ka belökâ kânâ;

⁶ kʼ ame ölö thö hau ûnyi hnyi kânâ me okhubetâ hia hon kânâ.

⁷ Ke haba Iehova Khong ame op at ge sesâiny kânâ, me menâ ka hnyi li hnyingöiny homenâiny möt; ke haba at ame wia me me hanu ae möt.

⁸ Ke Iehova Khong ame belökâ ke hnyei hnyi ke keihen Edena e deiö; kʼ ame ip eling at waleji a hia but op.

⁹ Ke Iehova Khong ame okûâ ûnyi hnyi kânâ ta je ûö hia thithö ae hmanenang at ka wâ, me so hnân han; me ûöiny möt minya hnyi wanben hnyei, me ûöiny wâhmakhmeto so me kong.

¹⁰ Ke ame hi-ngölö ûheny hnyi Edena wagewe hnân he ka hû hnyei belök; kʼ ame vese but ûheny e me me je vheiny a vak.

¹¹ Haba ien at a bân, me, Pisona: wale at ame igigilö hia hnyei Havila, waleling ae hu gol;

¹² ke so but goliny hnyei e: e minya eling bedola me veto soama.

¹³ Ke haba ien wagewe a loiny, me, Gihona: wale at ame igigilö hnyei Kuza.

¹⁴ Ke haba ien wagewe a kuniny, me, Hidekela: wale ame he deiö Asuria ai. Ke Euferate wagewe a vakiny.

¹⁵ Ke haba Iehova Khong ame hom at, me ip ju e hnyi hnyei Edena he ka belökâ me tuö.

¹⁶ Ke Iehova Khong ame hûna ka at, ka habe, U me he ka han monu ûnyi hnyi ta je ûö hia thithö hnyi hna belök:

¹⁷ ke haba ûöiny wâhmakhmetoâ so me kong, me, u me ca he ka han ûnyi hnyin: anyin a haba hnyi bong u me he ka han hnyin, e hnathu u me he ka mokcu.

¹⁸ Haba Iehova Khong ame ha, ka habe, E ca so e he ka hake laba at; oge me he ka ânyâ hobi kâu ke ûhadruo ae ûcû kâu.

¹⁹ Ke Iehova Khong ame op ûnyi hnyi kânâ ta je menoiny hnyot hia, me ta je meno hia ame gâ ethö; me hum ödra ka at me me wâ ia ien e ame he ka hwenyi ödra: ke haba ien ta je meno ae möt hia ame hwenyi iödra at, wale ien bi.

²⁰ Ke ame hwenyi ien ta je meno hia a vak can hnen at, me ta je meno ame gâ ethö, me ta je menoiny hnyot hia; ke adre tiga ca wâ hobi kâu at ke ûhadruo ae ûcû kâu.

²¹ Ke Iehova Khong ame kunâ mokut hnying ka hnyi hon at, me e ame mokut; me e ame hom but ke jeien hvaken, kʼ ame hlöng hmetu ju hwaban ge utiöiny:

²² ke haba jehvak wale Iehova Khong ame hia but hom ûnyi ge at, me ame op me me momo but, me su thö e ka at.

²³ Ke haingen at, ka habe, Walang jö hanen je jeiök, me utiö hanen vik: adre me he ka hwenyi ien, me, Momo, anyin adre hom ûnyi ge baga.

²⁴ Waleling me me he at ka hna kamen me hinyen, me kece ka âiân; kʼ ame he ka khaca thibi unyidru.

²⁵ Ke ödru lo ödru me he thu, wale liamâiân, kʼ ödru me ca hmehma bi.