Genese 17 - Iaai Bible 1901 (New Caledonia)

¹ KE nainte nain hunai Aberama, me ame manen dut Iehova kö Aberama, me ha kân, ka habe, Inya ang Khong Ataekhanahia; u ma he hnyi hnyimakök, ke wisa but.

² Me oge me he ka ûhihinyköu möu, me oge me he ka ti osehia ta je mâtrânâm.

³ Ke Aberama ame ta hnyimakan hnyikânâi: ke Khong ame ha hofuc kâu, ka habe,

⁴ Wâ bi, e unyâm anyik ûhihinyköu, ke u me he ka kamen ta je hnyei ae se.

⁵ Ke adre me ca he hmetu ka hwenyi iâm, me, Aberama, ke Aberahama bi iâm; anyin a oge hia but wiö u me kamen ta je hnyei ae se.

⁶ Ke oge me he ka ti öei u, ke oge me he ka oâ ta je hnyei ûnyi gam, kʼ ame he ka o ûnyi gam ta je than.

⁷ Ke oge me he ka ohmâ anyik ûhihinyköu möu me ta je mâtrânâm hwabâm hnyi anyidra ta je dö hnân ûhihinyköu ae ca ba balua, me oge me he ka Khongom me ta je mâtrânâm hwabâm.

⁸ Me oge me he ka ham köu, me ta je mâtrânâm hwabâm, hnyei u me laba kanyua hnyin, a hnyei Kanana hia, hnân gam nyiele balua; ke oge me he ka Khongudrin.

⁹ Haba Khong ame ha kö Aberahama, ka habe, U ma he ka tuö anyik ûhihinyköu, u, me ta je mâtrânâm hwabâm, hnyi anyidra ta je dö.

¹⁰ Walang anyik ûhihi-nyköu möbun, wale öbun e he ka tuö, me ta je mâtrânâm a hwabâm, ka habe, Adre me he ka peritomonâ ta je baga hia unyibun.

¹¹ Adre me he ka peritomonâ unen unyibun; ke wale haten anyik ûhihinyköu möbun.

¹² Kʼ adre me he ka peritomonâ at unyibun a eit ut bonginy, a ta je baga hia hnyi anyibun ta je dö, at adre hnokoâ hnyi hnyabam, me at adre ûco hnen mone anyin ta je atkanyua, a ca mâtrânâm bi.

¹³ E ûnyi hnathu he ka peritomonâ at adre hnokoâ hnyi hnyabam, me hna ûco hnen ânyâm mone: kʼ ame he ka e bi hnyi je unyibun anyik ûhihinyköu hnân ûhihinyköu nyiele balua.

¹⁴ Ke adre me he ka subâ degecâ ûnyi hnyi iny hnyei at adre me ca peritomonâ unen unyin; e ame hanyâûâ anyik ûhihinyköu.

¹⁵ Haba Khong ame ha kö Aberahama, ka habe, Haba Sarai âiâm, u me ca he hmetu ka hawâ, Sarai, kʼ ama Sara bi ien.

¹⁶ Ke oge me he ka ohnahicâ e, ke haba khaca, oge me he ka ham köu nokom da ûnyi gan: eke, oge me he ka ohnahicâ e, kʼ ame he ka hinyen ta je hnyei; kʼ ame he ka o ûnyi gan je thaniny ta je hnyei.

¹⁷ Me Aberahama ame ta hnyikânâi, me hluma, me ha eû hnyi hnyekon, ka habe, Hawa, ama he at a khaca haded hunainy ka hnokoâ nokon? kʼ ame he Sara ka hnokoâ ke nainte but ta je hunainy?

¹⁸ Ke haingö Aberahama ka Khong, ka habe, Ama na möt Isamaela hnyi hnyimâkâm!

¹⁹ Me Khong ame ha, ka habe, Ca me ha, ke ame he Sara âiâm ka hnokoâ nokom a baga; ke u me he ka hwenyi ien Isaaka: ke oge me he ka ohmâ anyik ûhihinyköu më, me ta je mâtrâniny hwaban hnân ûhihinyköu nyiele balua.

²⁰ Ke so bi oge hia but ling u ga Isamaela: wâ bi, oge hia but hahnahicâ, me oge me he ka ohâtâ e, me ösiâ gânâ but e; e ame he ka hnokoâ ta jo taben a twelv, me oge me he ka wia e me me kamen ta je hnyei ae se hia.

²¹ Ke haba anyik ûhihinyköu me, oge me he ka ohmâ e me Isaaka, at ame he Sara ka hnokoâ ûnyi gam hnyi ûen eang hnyi huna ame he ka o.

²² Ke e ame um dö ûhnenamö më, me Khong ame ölö thö ûheny ûnyi Aberahama.

²³ Me Aberahama ame hum Isamaela a nokon, me ödrin adre hnokoâ hnyi hnyaban, me tavat hia adre ûco ge anyin mone, a obaga hia hnyi hnyaba Aberahama, me peritomonâ unen unyidrin, hnyi bong eling a khaca, helâji me hnen Khong hna ha kâu.

²⁴ Ke nainte nain ta je hunai Aberahama hnyi hna peritomonâ unen unyin.

²⁵ Ke thötin hunai Isamaela a nokon hnyi hna peritomonâ unen unyin.

²⁶ Hnyi bong a khaca adre tha peritomoni Aberahama me Isamaela a nokon.

²⁷ Ke adre tha peritomonâ më ta je baga hia hnyi hnyaban, waleji adra hnokoâ hnyi hnyaban, me tavat adre ûco ge mone unyin je atkanyua.