Genese 12 - Iaai Bible 1901 (New Caledonia)

¹ KE haba Iehova ame ha kö Aberama, ka habe, He but ûhem hnyi gam, me ânyâm lap, me hnyaban kâmâm, ka hnyi hnyei oge me he ka omanenâ köu:

² ke oge me he ka wiö u me me dökhu ae gan, ke oge me he ka ohnahici u, me ogânâ iâm; ke u ma he ka hnahic:

³ ke oge me he ka ohnahici ödra adre me ohnahici u, ke haba at ame hangö u oge me he ka hangâ: ke ame he ka hnahic ut ûnyi gam ta je hnyei hia eang hmelen.

⁴ Me haba Aberama ame he but helâ me hna ha kâu hnö Iehova; ke Lota ame tha he mē: me Aberama ame he ûheny Karan, ke sevente faiv ta je hunainy.

⁵ Haba Aberama ame hum Sarai a âiân, me Lota a nokon liamekeiny më, me tang omjehedrin hia ödrin e hia but ûkböûna, me je hnyat ödrin e hia but hom unyidrin hnyi Karan; ke ödrin e he but ka hnyi hnyei Kanana; me Ödrin e o but hnyi hnyei Kanana.

⁶ Ke Aberama ame vheno hnyei ke ne o but hnyi Sekema, hnyi iwajo anyi More. Ke ka e at Kanana hnyi hnyei.

⁷ Ke ame manen dut Iehova kö Aberama, ame ha, ka habe, Oge me he ka ham hnyei ang ka ta je mâtrânâm: me e ame otilâ eling taben hut kö Iehova at ame manen kâu.

⁸ Ke e ame he ûheny e ka hnyi bucen, Bethela ke e deiö, me otilâ umen uma mano, ke e jio Bethela, ke e deiö Ai: ke e ame otilâ ke taben hut kö Iehova eling, me hawâ iö Iehova.

⁹ Ke Aberama ame hok tot ka hnyi Hwaiöu.

¹⁰ Ke e hu hmiâ hnyi hnyei: me Aberama ame he Aigupito ai he ka më laba e; anyin ae gan hmâ hmiâ hnyi hnyei.

¹¹ Ke e hakekeny jut ka dit ka hnyi hnyei Aigupito, e ame ha kö Sarai a âiân, ka habe, Wâ bi, e khanö nya a u momo ae so hmainy:

¹² ke e ka ö u hnen at Aigupito, me, adre me he ka ha, ka habe, Wale âiân, me adre me he ka hlingö nya, kʼ adre me he bi ju ka omeli u.

¹³ Me ö u ha thö, ka habe, U hanik, mʼ inye so ûnyi gam, me me möt bi hanuk ûnyi gam.

¹⁴ Ke ame o but Aberama Aigupito, me at Aigupito adre me wâ momo ae so hmö-nyin hmainy.

¹⁵ Ke a wâ but hnen je than ûnyi Farao, me ödrin e haisoâ e kö Farao: ke ödra adre me hom dö momo ka hnyi hnyaba Farao.

¹⁶ Ke e ame bi so kö Aberama can mono: me e ame tren ta je mamoe, me kâu, me asina baga, me je lathnyabainy baga, me je lathnyabainy momo, me je asina momo, me je kamela.

¹⁷ Ke Iehova ame oveci Farao me anyin lap ge ta je vec ae gan can Sarai öiö Aberama.

¹⁸ Ke Farao ame hawo Aberama, me ha, ka habe, Ieû ang u je ânyâ könya? Ieû gam u je ca thumetu nya a âiâm ang?

¹⁹ Ieû can u je ha, ka habe, Hânâm ang? Waleling me oge me hia but hom me öiök: ke walang ang wâ ju âiâm, hom dö, me he thö.

²⁰ Ke Farao ame hûna e ka je lakeiny: ke adre me hom e ka hnyi gethen, me âiân, me anyin ta je ûnyi hia.