Genese 11 - Iaai Bible 1901 (New Caledonia)

¹ KE khaca thibi hwan hmeledrany hia, me khaca thibi hofuc.

² Ke adre me tiga hok töt deiö, me adre me wâ ke dok ae thahon hnyi hnyei Sinara; ke adre me labā e.

³ Ke adre me ûhaköuâ, ka habe, E so ate me op je veto kânâ, me le wia. Ke adre me hom veto kânâ me hnân veto, me hmudra hnân dröu.

⁴ Ke adre me ha, ka habe, E so ate me otilâ ke taun, me tap ae beû hmâ bân hnyi dranyai, mʼ ate me ölungâ iöta; wâ adre nye ovesei ota hnyi hmeledrany hia.

⁵ Ke Iehova ame utut ka wâ taun me tap, ame otilâ lakon tavat.

⁶ Ke Iehova ame ha, ka habe, Wâ bi, khaca thibi hnyei ödra, ke khaca thibi hwen hodra hia; ke walang ûnyi adre me hwân he ka ânyâ: ke haba walang ang, ame ca he ka hmak ködra ke ûnyi adre me beânyâ.

⁷ E so ate me utut me omonumonâ hwen hodra, me me ca khana ke at hofuc hwan ke at.

⁸ Me Iehova ame ovesei ödra ûheny e ka hnyi hmeledrany hia thithö: ke adre me hna ju he ka otilâ taun.

⁹ Anyin a wale, adre me hwenyi ien e, Babela; anyin a Iehova ame omonoâ eling hwan hmeledrany hia: ke Iehova ame ovesei odra ûheny e ka hnyi hmeledrany hia.

¹⁰ Walang ta je dö anyi Sema, khaca haded hunai Sema, ke e ame knöku Afasada hnyi huna a loiny hwaban uoû:

¹¹ ke haba möt anyi Sema, hwaban hna hnöku Afasada, me thabûng haded ta je huna, ke e ame hnokoâ je lakon baga me hlu.

¹² Ke thöte faiv ta je hunainy möt anyi Afasada, ke e ame hnöku Sala:

¹³ ke vak ta haded ke kun ta hunainy möt anyi Afasada hwaban hna hnöku Sala, ke e ame hnokoâ lakon je baga me hlu.

¹⁴ Ke thöte ta je hunainy möt anyi Sala, ke ame hnöku Heberu:

¹⁵ ke vak ta haded ke kun ta je hunainy möt anyi Sela, hwaban hna hnöku Heberu, ke e ame hnokoâ ta je lakon baga me hlu.

¹⁶ Ke thöte foa ta je hunainy möt anyi Heberu, ke e ame hnöku Pelege:

¹⁷ ke vak ta haded ke thöte ta je hunainy möt anyi Heberu hwaban hna hnöku Pelege, ke e ame hnokoâ lakon baga me hlu.

¹⁸ Ke thöte ta je hunainy möt anyi Pelege, ke e ame hnöku Reu:

¹⁹ ke lo li haded ke nain ta je hunainy möt anyi Pelege hwaban hna hnöku Reu, ke e ame hnokoâ lakon baga me hlu.

²⁰ Ke thöte tu ta je hunainy möt anyi Reu, ke ame hnöku Serugi:

²¹ ke lo li haded ke seven ta je hunainy möt anyi Reu hwaban hna hnöku Serugo, ke e ame hnokoâ lakon baga me hlu.

²² Ke thöte ta je hunainy möt anyi Serugo, ke e ame hnöku Nahora:

²³ ke lo li haded hunainy möt anyi Serugo hwaban hna hmöku Nahora, ke ame hnokoâ lakon baga me hlu.

²⁴ Ke twente nain ta je hunainy möt anyi Nahora, ke e ame hnöku Tera:

²⁵ ke khaca haded ke naintin ta je hunainy möt anyi Nahora hwaban hna hnöku Tera, ke ame hnokoâ lakon je baga me hlu.

²⁶ Ke sevente ta je hunainy möt anyi Tera, ke ame hnöku Aberama, me Nahora, me Harana.

²⁷ Ke walang ta je dö anyi Tera. Haba Tera ame hnöku Aberama, me Nahora, me Harana; ke Harana ame hnöku Lota.

²⁸ Ke ame mokcu Harana hnyi hnyimakö Tera a kamen hnyi hnyei adre hnokoâ e hnyin, wale Ure hnyi Kaledaia.

²⁹ Ke Aberama me Nahora ödru me ve hok âiân: haba ien öiö Aberama, me, Sarai; ke haba ien öiö Nahora, me, Mileka nöku Harana wale kamö Milika me kamö Iseka.

³⁰ Ke toûnyi Sarai, e ba nokon.

³¹ Haba Tera ame hom Aberama a nokon, me Lota nöku Harana, a öbiny, me Sarai a ûngon, öiö Aberama a nokon; ke ödrin e tha he ûhedrin Ure hnyi Kaledaia ka he ka hnyi hnyei Kanana; ke ödrin e o but Karan me laba e.

³² Ke haba ta je bongu Tera tu haded ke faiv je huna: ke Tera ame mokcu hnyi Karan.