Galatia 6 - Iaai Bible 1901 (New Caledonia)

¹ HNYAT me lakeiny lö, eja ke ne a ne hom uthmâhmâ ke at hnyi hna hanyâûâ, hamöbun tavat hnyi hanu he ka kap hmetu at a helâe hnyi hnyok ae menyik; ke wâ wiö u bi, wâ e nye cubic u minya bi.

² Ûkhûkhûö th ö honöbun je hok, me ohwâdâ helâe hnanyibu anyin Keriso.

³ Ke a ne ûnykûme ke at a ka e at ae ûnyi hnathu, ke ca e bi, e ame ka iyawâ e bi.

⁴ Ke so ka tavat he ka ve cubec anyidra ta je huliwa bi, me adre me he ka hu hnân hobelöu a ûnyi gadra bi, ke ca ûnyi bi ge ke at.

⁵ Anyin ame he tavat hia ka ve hijen honödra ta je hok.

⁶ Ke hamen at adre nâ hnyi hofuc he ka ham ta je ûnyi ae so ka at ame nâ.

⁷ Ca omonu öbun bi; e pason he ka iyawâ Khong: anyin a haba hna tā hnen ke at, me e ame he bi ka meno minya helâe.

⁸ Ke haba at ame tä ka hnyi hing unyin bi, me e ame he ka meno hna bobot ûnyi hnyi unyin; ke haba at ame tä ka hnyi Hanu, me e ame he ka meno möt ame ca ba balua ûnyi hnyi Hanu.

⁹ E so ate me ca sënyin hnyi huliwa ae so: anyin ate me he ka meno hnyi ûen cici, at ka ca sënyin bi.

¹⁰ Anyin a wale, e ka hu ûen köta, e so ate me he ka mâdrâ huliwa ae so ka tavat hia thithö, ke ti ânyâ bi ka tavat a ödra hnyi lap anyin tavat labageju.

¹¹ Wâ ju ûganiny je mataitusi oge hia but sihnalimen köbun ge hing hnyamok.

¹² Haba tavat adre me wedra he ka haiso, ödra hnen at, me adre me ûjongi öbun he ka peritom; ke adre me ânyâ helâe wâ adre nye okongu ödra can satauro anyin Keriso.

¹³ Anyin a haba tavat adre hia but peritomona, me adre me ca long bi hoton hnanyibu; ke wedra bi he ka operitomoni öbun, mʼ adre me he ka hobeluâ je unyibun.

¹⁴ Ke haba inya, me oge me ca he bala ka hobelöû ke so thibi hnyi satauro anyin Tuhöta Iesu Keriso, kʼ adre me osatauroâ hmeledrany könya a deny e, ke ka inya minya ka hmeledrany.

¹⁵ Anyin ae ca ûnyi hnathu peritom me ca peritom, ke so bi at ae teb ûnyi.

¹⁶ Ke haba ödra hia adre me he hoton tulut eang, me so e unyidra me Isaraela anyin Khong hnahic me ibetengiö.

¹⁷ Ke hwân dö walang ang, ca he hmetu bi ke at ka ovheli nya: anyin ae hu bi hnyi unyik je hwadeny a je haten Iesu.

¹⁸ Hnyat me lakeiny lö, e na e ju hnyi je hanubun ibetengiö baû anyin Tuhöta Iesu Keriso. Amen.