Galatia 5 - Iaai Bible 1901 (New Caledonia)

¹ AME hia but hnʼ öta Keriso ka hnyi hna hna bâûâ: anyin a wale, tethmâ ju, ke ca ovheli öbun hmetu bi ge wen hwenbâ.

² Wâ bi, inya Paulo oge me ha köbun, ka habe, öbun e ne kap hna peritom, me ba troban köbun ûnyi ge Keriso.

³ Eke, inya hmetu oge me thumeto tavat hia adre kap hna peritom a gʼ ame hu hanymen kodra he ka long hoton hnanyibu hia thithö.

⁴ Adre hia but oûsâkâûʼ öbun me Keriso, öbun tavat öbun e behaiwisʼ öbun hnyi hnanyibu; ke öbun e ū but ûnyi hnyi ibetengiö baû.

⁵ Anyin ate me halubahingen gejon hnyi hwakecin ae wisa hnen labageju unyi hnyi Hanu.

⁶ Anyin ae ca ûnyi hnathu bi ka Keriso peritom, me ca peritom; ke so bi labageju, at ame huliwa hnyi ibetengiö.

⁷ Öbun e hia but wadring so; ia ovheli Öbun mʼ öbun e ca he bi ka long hoton hnathu?

⁸ Haba ûnyi eang ame ovheli, me ca ûnyi bi ge at ame hawʼ öbun.

⁹ Haba leven ae ûhnyûkong ame olevenâ bwiny falawa hia.

¹⁰ Inya oge me labageju öbun hnyi Than, a öbun e ca he ka webun ke ûnyi: ke haba at ame ovheli öbun, me ame he ka o kâu hwaban, kʼ adre me ca he ka wâhmakhmetoâ at.

¹¹ Ke haba inya, hnyat me lakeiny lö, oge ne khetâ bala peritom, ieû adre me okongu nya bala bi gan? a ne helâe, me ba but hnân othoâ hnyi satauro.

¹² Haba wek, me me he tavat adre me ovheli öbun ka hamödra subâ degeci ödra bi.

¹³ Hnyat me lakeiny lö, adre hia but hawʼ öbun ka hnyi hna hna bâûâ; ke so bi ca he öbun ka wia hna hna bâûʼ öbun, me hnân hobi kâu unyin, ke ibiathnyabaköu ju hnyi ibetengiö.

¹⁴ Anyin adre ohwâdâ hnanyibu hia hnyi hofuc a khaca, ka habe; U me he ka betenge ge at ame laba hakekenyi u helâ me u bi.

¹⁵ Ke öbun e ne ûhûlû, me ûönöbunköu, ö ʼbun âu, wâ öbun nye he ka ûohiöbunköu.

¹⁶ Ke inya oge me ha, ka habe, E so öbun e he bala hnyi Hanu, me öbun e ca he ka ânyâ weny unyin.

¹⁷ Anyin a haba unyin ame ûö bi ûnyi me Hanu, ke haba Hanu ame ûö bi ûnyi me unyin; anyin a ödru li at ûö bi ûnyi köu ödru; waleling me öbun e ca ânyâ bi ûnyi ame webun.

¹⁸ Ke so bi a ne lili öbun Hanu, me ca öbun bi hnyi hmelen hnanyibu.

¹⁹ Ke e manen dut ta je huliwa anyin unyin, wale, bi ûnyi monu, me hwakecin ae ikiki, me hnyok wagelue,

²⁰ me hmi ka je hnatheat, me bi khong, me bi iwahnaihmiony, me iwatretra, me ihunyinköu, me wathethot, me imouköu, me khekhe lo, me vese,

²¹ me behnyok, me ic monu, me imediaköu, me ta je ûnyi helâe: inya oge me haimemenâ köbun ge ta je ûnyi e, helâji me hnok hna haimemenâ ehac, ka habe, haba tavat adre me ânyâ helâe me adre me ca he ka bi hwajeköûdra hnyi dokhu dokhon Khong.

²² Ke haba je wan Hanu, me, ibetengiö, me senyin, me hnahic, me hokhnyok beû hmâ, me menyik, me hwakecin ae so, me hnathu,

²³ me hwakecin ae ilemuk, me weny ae ûcû: adre ca nyibo bi ta je ûnyi helâe.

²⁴ Ke haba ta je laten Keriso, me adre me osatauroâ unyin, me ta je weny e, me ta je weny ae ûjöng.

²⁵ Ate ne möt hnyi Hanu, awe, e so ate me vheno hnyi Hanu.

²⁶ Ca he öta ka weta lung baû, me ûhmönyinköu, me ihunyinköu.