Galatia 4 - Iaai Bible 1901 (New Caledonia)

¹ KE inya oge me ha, ka habe, E ka tiga wanakat bi atö, me ca ve bongon bi e me athnyabainy, ke so bi e tuhan hia;

² ke ame muso e hnen tavat ûne, me tavat tue, ke ne o but hnyi ûen a thu hnen kamen.

³ Helâe minya öta, waleji kʼ öta tiga je wanakat, me adre me musi öta hnyi je hna ûne a bân anyin hmeledrany:

⁴ ke ame o but ûen adre thu, me haba Khong ame kunâ Nokon, adre hnokoâ hnen momo, a hnokoâ hmelen hnanyibu,

⁵ me me he ka ûco tavat adre me laba hmelen hnanyibu, mʼ adre me he ka kop öta helâ me je hing lakon.

⁶ Ke can öbun je hing lakon, me Khong ame kunâ Hanon Nokon ka hnyi je hnyekubun, kʼ ame hongot, ka habe, Aba, Cica.

⁷ Anyin a wale, u ca athnyaba hmetu bi, kʼ u nokon; ke u nokon, awe ame he ka hu hwajekhom ûnyi ge Khong.

⁸ Ke haba ehac, waleji ae tiga ca khanʼ öbun Khong, me adre me hwenbʼ öbun hnen ta je ûnyi a ca je hing khong:

⁹ ke e khanʼ öbun Khong walang ang, ke khana Khong öbun, me ieû gabun öbun e hwio hmetu ka hnyi ta je ûnyi a â bân, ke sënyin, ke ca ûnyi hnathu, wale ame webun hmetu he ka hwenbâ kâu?

¹⁰ Öbun e tuö je bong, me je tehi, me je ûen, me je huna.

¹¹ Inya oge me ot gabun, wâ e nye ûnyi baû anyik huliwa köbun.

¹² Hnyat me lakeiny lö, inya oge me khöû köbun he ka helâ mönya, anyin a haba inya, me helâ möbun. Öbun e ca hia but okongu nya:

¹³ ke e khanʼ öbun a oge bök ka khetâ evangelia köbun, kʼ ame sënyin unyik:

¹⁴ ke haba ûcubic köbun waleji hnyi unyik, me öbun e ca hûkotiâ, me degec ut; ke öbun e kop nya helâke me angela anyin Khong, helâke me Keriso Iesu.

¹⁵ Ke ewa hnobun hna haisoâ? anyin oge me ohnathu öbun, ka habe, a ne khanʼ öbun, me öbun e hia but ûâ je li emaköbun me ham bi könya.

¹⁶ Hawa, iny iwahnaihmiony mʼ öbun, anyin oge me ha hnathu köbun?

¹⁷ E hwege wedra öbun, ke ca so bi; eke, e wedra he ka ovesei öbun, mʼ öbun e he ka ti webun ödra.

¹⁸ Ke so öbun e he bala ka weny hwegiâ so, ke ca helâe thibi hnyi ûen a tha inya möbun.

¹⁹ Je lakuk lö, inya hmetu oge me vec hnyekon helâ me at erkini öbun, ke ne o but a e but Keriso eû hnyibun,

²⁰ eke, e wek he ka tha inya mʼ öbun walang ang, me okebongonâ ifucik; anyin oge me loloâ gabun.

²¹ Ha thʼ öbun könya, öbun hnyat a webun he ka laba hmelen hnanyibu, hawa, öbun e ca long hnanyibu?

²² Anyin adre sihnalimen, ka habe, lo li laku Aberahama, haba khaca me nokon momo adre ûco, ke nokon momo ame he baû khaca.

²³ Haba nokon momo adre ûco, me adre hnokoâ hoton unyin; ke haba nokon momo ame he baû, me adre me hnokoâ hoton hna ha bânâ.

²⁴ Haba ta je ûnyi e me hnân ûhoûcû: anyin a haba li momo e, me li ûhihinyköu; khaca ûnyi hnyi bucen Sinai, kʼ ame hnokoâ ka hnyi hwenbâ, waleji Hagara.

²⁵ Haba Hagara eling me wale bucen Sinai hnyi Arabia, e ûcû me Jerusalema walang ang: anyin a e ame tha hwenbâ me lakon.

²⁶ Ke haba Jerusalema ethö me ame he baû, wale hinyöta.

²⁷ Anyin adre sihnalimen, ka habe, Senyin dö, u toûnyi ame ca hnokoâ; Kuku thö me tenge, u at ame ca vec hnyâm: Anyin ae se hia lakon momo ame laba baû hon at ae hu âiân.

²⁸ Hnyat me lakeiny lö, öta ang lakon hna ha bânâ, helâji me Isaaka.

²⁹ Ke haba ehac me ame okongoâ at adre me hnokoâ ûnyi hnyi Hanu hnen at adre me hnokoâ ûnyi hnyi unyin, ke helâe minya walang ang.

³⁰ Ke ieû hna ha hnyi hna sihnalimen? Tha obâ but momo a athnyaba me nokon da: anyin ame ca he da nokon momo a athnyaba ka tha hwajekhon me da nokon momo ame he baû.

³¹ Anyin a wale, hnyat me lakeiny lö, ca lakon momo a athnyaba öta, ke lakon momo ame he baû bi öta.