Galatia 3 - Iaai Bible 1901 (New Caledonia)

¹ AT Galatia ae monu lö, adre me sihnalimen hnyi je hnyimaköbun Iesu Keriso at adre osatauroa, ke ie at ame iyâwʼ öbun?

² Wale thibi ang ûnyi ame bekhanö nya gabun, ka habe, Hawa, öbun e kap ju Hanu ûnyi hnyi ta je huliwa hnyi hnanyibu, kʼ ame ne hnen long ûnyi hnyi labageju?

³ Hawa, öbun e monu helâe? öbun e hwân hnyi Hanu, ke walang ang öbun e he bi ka oumo hnyi unyin?

⁴ Hawa, öbun e hia but vec baû hnyi ta je ûnyi ae se hia? ame ne he ka ûnyi baû bi.

⁵ Anyin a wale, haba at ame ham köbun Hanu, me ânyâ ta je huliwa ae man unyibun, hawa, ame ânyâ e hnyi je huliwa hnyi hnanyibu, ke ame ne ânyâ hnen long hnyi labageju?

⁶ Helâ me Aberahama ame labageju ka Khong, me adre me hâiâ e kâu me hwakecin ae wisa.

⁷ Anyin a wale, khanʼ öbun ju, a haba tavat adre me labageju, me ödra je mâtrâni Aberahama.

⁸ Ke manen dut ehac hnyi hna sihnalimen a gʼ ame he Khong ka haiwisa Aten je hnyei ûnyi hnyi labageju, ke a khetâ evangelia kö Aberahama, ka habe, Ame he ka hnahic ta je hnyei hia ûnyi gam.

⁹ Wale me me tha hnahic tavat adre me labageju me Aberahama at ame labageju.

¹⁰ Anyin a haba tavat adre me laba hnyi ta je huliwainy hnanyibu, me ödra but hnyi hmelen hnaûhango: anyin adre hia but sihnalimen, ka habe, E ve hnaûhango but ödra hia adre me ca tethmâ hnyi ta je ûnyi hia thithö adre me sihnalimen hnyi tusiny hnanyibu he ka ânyâ.

¹¹ Ke e manen ae ba at adre me haiwisa hnyi hnyimakan Khong ûnyi ge hnanyibu: anyin, Ame he ka möt at ae wisa hwakecin ûnyi hnyi labageju;

¹² ke haba hnanyibu me ca hanen bi labageju; ke, Haba at ame he ka vheno e, me e ame he ka möt kâu.

¹³ Haba Keriso ame ûcû öta ûnyi hnyi hnaûhangöiny hnanyibu, anyin a e ame wia me hnaûhango hobi köta: anyin adre hia but sihnalimen, ka habe, E hnaûhango but tavat hia adre me uhni ödra hnyi ûtö:

¹⁴ me me o but hnahic anyi Aberahama ka Aten je hnyei ga Keriso Iesu; me me hu thö köta hnen labageju Hanu adre ha bânâ.

¹⁵ Hnyat me lakeiny lö, oge me ha helâ me hwan at: ka habe, Eja ke ne a ne ûhihinyköu anyin at, kʼ adre hia but ohmâ, me ba at ame he ka thang, me bi hanen hmetu.

¹⁶ Ke adre ha ta je hna ha bânâ kö Aberahama me mâtrâniny. E ame ca ha, ka habe, Ka ta je mâtrân, helâke me se hia; ke helâke me khaca thibi, ka habe, Ka mâtrânâm, wale Keriso.

¹⁷ Ke inya oge me ha, ka habe, haba ûhihinyköu hnen Khong hna ohmâ kâû adrem, ae ca khana hnanyibu he ka thang hmetu, waleji a foa haded me thote je huna hwaban ûhihinyköu, me me oûnyibâûâ hna ha bânâ.

¹⁸ Anyin a ne ûnyi hnyi hnanyibu hwajekhon me ca ûnyi bi hnyi hna ha bânâ: ke Khong ame ham e kö Aberahama hnyi hna ha bânâ.

¹⁹ Ke hnân eû hnanyibu? Adre bi hanen e can ta je hna hanyâûâ, ke ne o but ame o thö mâtrân, wale adre ha bânâ kâu; ke hnen ta je angela hna otilâ e hnyi hnyamen at ame oûsoköuâ.

²⁰ Ke haba at ame oûsoköuâ me ca hnân hobi kâu at a khaca; ke haba Khong me khaca thibi.

²¹ Ke hawa, haba hnanyibu me ûcon ta je hna ha bânâ ge Khong? Ohe: anyin a ne hu hnanyibu adre ham ae khana he ka omelö, awe, adre me ne he ka haiwisa ûnyi hnyi hnanyibu.

²² Ke haba hnyi hna sihnalimen adre hia but thelöng ta je ûnyi hia hnyi hmelen hulo, mʼ adre me he ka ham ka tavat labageju hna ha bânâ ûnyi hnyi labageju kö Iesu Keriso.

²³ Ke adre tuʼ öta ehac hnyi hmelen hnanyibu, waleji ke tiga ca o bi labageju, ke adre theling öta ke ne o but ame manen dut labageju ame he ka o.

²⁴ Wale me haba hnanyibu, me hnân at ûne köta he ka lili öta ka Keriso, mʼ adre me he ka haiwisʼ öta ûnyi hnyi labageju.

²⁵ Ke walang ang ame o but labageju, me ame ca musi öta hmetu bi hnen at ûne.

²⁶ Anyin a je lakon Khong öbun hia a deny labageju kö Keriso Iesu.

²⁷ Anyin a haba öbun hia, adre bapataisoâ ka Keriso, me öbun e khaû öbun ge Keriso.

²⁸ Ke ba hmetu at Juda, ke ba at Helene, ke ba at hwenbâ, ke ba at he baû, ke ba baga, ke ba momo; anyin a khaca thibi öbun hia unyin Keriso Iesu.

²⁹ Ke öbun e ne laten Keriso, awe, öbun je mâtrâni Aberahama, a tavat tren hwajekhoû helâ me hna ha bânâ.