Galatia 2 - Iaai Bible 1901 (New Caledonia)

¹ KE hwaban ta je huna a fotin oge me he hmetu Jerusalema ai tha inya me Banaba, ke oge hum Tito minya.

² Ke oge me he hoton hna omanenâ; me thumetu ödrin ge evangelia, oge khetâ ka Aten ke je hnyei; ke oge me ha duöngâ ka hnyat ae lung, wâ e nye ûnyi baû but wadring a inya, me hnok hna wadring ehac.

³ Ke haba Tito at ame tha e mönya, adre me ca ûjengö e bi he ka peritom, wale ae at Heleni:

⁴ ke wale thibi e can je liamekeiny thoi ödrin e odilâ duöngâ, ödrin eʼ dit duöng he ka tuö hna hnʼ ota, waleji ate me hu ge Keriso Iesu, mʼ ödrin e he ka thalu öta:

⁵ ke öhmun e ca mita bi ködrin hnyi awa a khaca; me me tethmâ unyibun hnathuiny evangelia.

⁶ Ke haba hnyat eji ae lung (me ca khanö nya ödrin, ke ca ûnyi hnathu e könya: haba Khong ame ca wâhmakhmetoâ bi at) —haba hnyat eji ae lung, me ödrin e ca bi hanen bi könya:

⁷ ke so bi, e khanʼ ödrin a gʼ adre me ham könya evangelia hobi kâu tavat adre ca peritomonâ, helâe kö Peteru hobi kâu tavat adre peritomonâ,

⁸ (anyin a haba at a huliwan hnyeku Peteru ka hnyi hanymen aposetolo hobi kâu tavat adre peritomonâ, e minya bi at ame huliwan hnyekuk hobi kâu Aten ke je hnyei);

⁹ ke haba Iakobo, me Kefa, me Ioane, je hnyat adre ha gadrin ka habe, je hmolom, ödrin e wâ ibetengiö baû adre ham könya, me adre me ham könya me Banaba je hnyam a metâiny tha hnyok, mʼ ohmu me he ka he ka Aten ke je hnyei, ke haba ödrin bi ka tavat adre peritomonâ;

¹⁰ ke ame wedrin thibi mʼ ohmu me he ka ûnykûme tavat ae theduoc; wale thibi ûnyi ae hmehmelâ hnyekuk he ka ânyâ.

¹¹ Ke ame o but Kefa hnyi Anetioka, me oge me hwege ivinö më, anyin ae monu.

¹² Anyin a e ame tha han me Aten ke je hnyei ke tiga hia bi keihen ûhedra unyi Iakobo: ke ödrin e o but, me e ame todrö, me öûsâkâuöâ e bi, anyin ame outen tavat adre peritomonâ.

¹³ Ke haba keihen at Juda adre me tha iyawo më; me ödrin e omonu Banaba minya hnen anyidra iyawö.

¹⁴ Ke oge me wâ a ödrin e ca he wisa hoton hnathuiny evangelia, inya oge me ha kö Kefa hnyi hnyimaködrin hia, ka habe, U at Juda, ke u je ne tha hwakecâm me Aten ke je hnyei, ke ca tha hwakecâm bi me at Juda, me ieû gam u me ûjengö Aten ke je hnyei he ka tha hwakecidra me at Juda?

¹⁵ Ötin at Juda ûnyi hnyi unyin, ke ca Aten ke je hnyei bi ae monu,

¹⁶ e khanʼ öta a gʼ adre me ca haiwisa at ge ta je huliwainy hnanyibu, ke so bi hnen labageju kö Iesu Keriso, öta minya ang tavat otin e labageju kö Keriso Iesu, mʼ adre me he ka hai wisʼ öta hnen labageju ka Keriso, ke ca hnen bi ta je huliwa hnyi hnanyibu: anyin ae ba at me khaca adre me he ka haiwisa hnen ta je huliwa hnyi hnanyibu.

¹⁷ Ke ate ne elâm, e me he Keriso ka haiwisʼ öta, ke ame ō ʼta bi a öta tavat ae kong, hawa, haba Keriso me at huliwan hulo? Ohe.

¹⁸ Anyin oge ne op hmetu ta je ûnyi oge hia but ohia, inya oge me ka omanenö nya bi, a iny at hanyâûâ.

¹⁹ Anyin oge mok ut ka hnyi hnanyibu ûnyi ge hnanyibu, mʼ inye he ka möt bi ka Khong.

²⁰ Adre hia but tha osatauroi nya me Keriso; ke iny möt bi; ke ca inya hmetu bi, ke Keriso bi at ae möt eû hnyik: ke haba möt oge me melö hnyi unyin, inya oge me melö e hnen labageju ka Nokon Khong, waleji at ame betenge gak, me ka ham e hnân hobi könya.

²¹ Oge me ca oûnyibâûâ ibetengiö baû anyin Khong: anyin a ne hu hwakecin ae wisa ûnyi ge hnanyibu, awe, e ûnyi baû bi mok anyin Keriso.