Galatia 1 - Iaai Bible 1901 (New Caledonia)

¹ INYA Paulo aposetolo (ca ûnyi ge at, ke ca hnen minya bi at, ke hno Iesu Keriso bi, me Khong a Kamen, waleji a omelö hmetu thö ûheny hnyi hna mok),

² me hnyat me lakeiny hia eang unyik, öhmun e sihnalimen ka ekalesia hnyi Galatia:

³ E so e unyibun hia thithö ibetengiö bau me hnahic ûnyi ge Khong a Kamen, me Tuhöta Iesu Keriso,

⁴ waleji at ame ka hamen ham e hobi kâu anyita ta je hulo, me me omeli ota ûnyi hnyi ang hmelen ae kong, hoton weny Khong a Kamöta:

⁵ e so he ka ogânâ bala e nyiele nyiele balua. Amen.

⁶ Oge me lâiâ anyin a öbun logot ûsâkâû öbun me at a hawʼ öbun ka hnyi ibetengiö baû anyin Keriso ka hnyi ke evangelia;

⁷ ke ca ke evangelia bi: ke haba keihen adre me ohluhlu öbun, me bewia evangelia anyin Keriso.

⁸ Ke öhmun e ne he, ke ame ne ke angela bi ûheny hnyi drany ka khetâ ke evangelia köbun bi, waleji öhmun e ca khetâ köbun, me so he ka anathema e.

⁹ Inya oge me ha hmetu walang ang, helâji me hnöhmun hna labö ha, ka habe, A ne he ke at ka khetâ köbun ke evangelia bi, wale öbun e ca kap, me so he ka anethema e.

¹⁰ Anyin a walang ang, hawa, oge me huliwan at, hawa, Khong ke hawa, inya oge me elâm he ka osenyinâ at? anyin oge ne labö osenyinâ at, mʼ iny ca athnyabai Keriso bi.

¹¹ Hnyat me lakeiny lö, inya oge me omanenâ köbun, ka habe, haba evangelia oge me khetâ me ca ûnyi bi ge at.

¹² Anyin oge ca kap e ûnyi ge at, ke adre me ca nö nya minya bi, ke so bi ûnyi ge hna omanenâ anyi Iesu Keriso.

¹³ Anyin öbun e hia but long ge hwakecik ehac hnyi hmi anyin at Juda, ae gan hmâ hmonyin hnok hna okongoâ ekalesia anyin Khong, me hna oaûâ e:

¹⁴ ke oge me nua tot ehac hnyi hmi anyin at Juda hon tavat ae se hnyi anyik dö unyin aten ik hnyei, anyin e gan hmâ hnok hna kong hnyekunâ ta je hwakecin lakamök.

¹⁵ Ke a manen dut weny Khong, waleji at ame ûcö nya ûnyi hnyi hnyekon hinyök, me hawo nya ûnyi ge anyin ibetengiö baû,

¹⁶ he ka omanenâ Nokon eû hnyik mʼ inye he ka khetâ e ka Aten ke je hnyei; oge ca ie ûhnenamö me at:

¹⁷ ke oge ca he minya Jerusalema ai ka je aposetolo a bodrin, ka bilik bi nya: ke oge me he Arabia ai; ke oge me hmetu minya Damaseko ai.

¹⁸ Hwaban kun ta huna, oge me he Jerusalema ai he ka iouny me Kefa, me tha laba mê fifitin je bong.

¹⁹ Ke oge me ca iouny bi me ke aposetolo, ke hake Iakobo thibi liamekeiny me Than.

²⁰ Ke haba ta je ûnyi oge sihnalimen köbun, wâ bi, oge me ca thoi hnyi hnyimakan Khong.

²¹ Hwaban e oge me o but ka hnyi je ke keihen hnyei Suria me Silikia.

²² Ame tiga ca wâ hnyimakök ta je ekalesia hnyi Juda unyi Keriso:

²³ Ke so bi adre me long thibi, ka habe, at eji ame okongu ota ehac, ame khetâ walang ang labageju waleji e ame oaûâ ehac;

²⁴ ke adre me ogânâ Khong ûnyi gak.