Filipi 4 - Iaai Bible 1901 (New Caledonia)

¹ ANYIN a wale hnyat me lakeiny mönya lö, laoûnykûmik me wek, hnok hna senyinâ, ke anyik minya korona, tethmâ ju öbun helâe hnyi Than, laoûnykûmik.

² Inya oge me khöû kö Euodia, ke oge me khöû kö Sunetuke minya, mʼ ödru me he ka tha hnyok hnyi Than.

³ Eke, oge me sumatö u minya at ame hadruo nya hnathu nya, ka habe, hom hadruâ thö omomo tavat adre me tha huliwa mönya hnyi ûthumetu ae so, me jia Kelemene minya, me keihen tavat adre me tha huliwa mönya, a eû hnyi tusiny möt je iödra.

⁴ Senyin bala thö ka Than: ke inya hmetu oge me ba, ka habe, Senyin dö.

⁵ E so e he tavat hia thithö ka wâ anyibun menyik. Wale but ang Than.

⁶ Ca kong hnyekunâ ge ta je ûnyi; ke so bi hnyi ta je ûnyi hia thithö, omanenâ je webun ka Khong hnyi hic me sumat me ole.

⁷ Ke haba ûsoköu ûnyi ge Khong ûnyi ae nua hon ta je ûnykûme hia, ame he ka tuö je hnyekubun me je ûnykûmenöbun hnyi Keriso Iesu.

⁸ Hnyat me lakeiny lö, walang obiny, ka habe, haba ta je ûnyi ae hnathu, me ta je ûnyi adre me haisoâ, me ta je ûnyi ae wisa, me ta je ûnyi ae kalaöt, me ta je ûnyi ae hmanenang, me ta je ûnyi ae lung so; ke a ne ke hwakecin ae so, me ke ûnyi hnân ogânâ, ûnykûme ju öbun ta je ûnyi e.

⁹ Ke ânyâ thʼ öbun ta je ûnyi adre n öbun kâu, wale öbun e kap, me long, me wâ ûnyi gak: ke ame he ka e unyibun Khongon ûsoköu.

¹⁰ Ke inya oge me senyin gan hmâ ka Than, anyin ame kû hmetu thö ûnykûmenöbun walang ang könya; waleji öbun e ûnykûme minya, ke ba bi ûen köbun.

¹¹ Ke oge me ca ha ge anyik theduoc: anyin adre hia but nö nya he ka sekuk hnyi ta je hwakecin hia.

¹² E khanö nya he ka theduoc, ke khanö nya he ka tren ta ûnyi: haba hnyi ve je ûnyi, me hnyi ta je ûnyi hia adre hia but nö nya he ka sekuk, me mekihnânem, me he ka tren ta ûnyi, me theduoc minya.

¹³ E khanö nya he ka ânyâ ta je ûnyi hia thithö hnen at ame ohwegiö nya.

¹⁴ Ke e so but hwakecibun, waleji öbun e betenge gak hnyi anyik vec.

¹⁵ At Filipi lö, e khanʼ öbun a hnyi hna hwân dö ûthumetu ae so, waleji oge he ûhek Makedonia, me ba ekalesia ame betenge gak, wale he ka ham me kap ta je ûnyi, ke hake öbun thibi;

¹⁶ ke tiga inya bi hnyi Thesalonika, öbun e okhaca me olo kunâ könya hnyi anyik theduoc.

¹⁷ Ke oge me ca elâm bwihlany; ke oge me heleû wan bi, me me se hia but troban köbun.

¹⁸ Ke hu but gak ta je ûnyi hia ke se hia: ke iny unöngöt dö, anyin oge hia but kap ûnyi ga Epaferodito ta je ûnyi ûnyi gabun, wale bunen ae bo so, wale hut hnân kap, ame osenyinâ Khong.

¹⁹ Ke ame he Khonguk he ka ham ta je ûnyi ae ûcû köbun, hoton hna ûkhöûnâ anyin hmanenang unyin Keriso Iesu.

²⁰ E so e unyin Khonguta me Kamöta hna ogânâ nyiele nyiele balua. Amen.

²¹ Oge me italofa me wakap hia thithö unyin Keriso Iesu. Ke ame italofa möbun hnyat me lakeiny eang unyik.

²² Ame italofa möbun wakap bia thithö, ae nua bi ödrin hnyi hnyaba Kaisara.

²³ E so e eû hnyi hanubun ibetengiö baû anyin Than Iesu Keriso.