Filipi 3 - Iaai Bible 1901 (New Caledonia)

¹ HNYAT me lakeiny lö, walang obiny, ka habe, senyin dö hnyi Than. E ca gan huliwa könya he ka sihnalimen köbun ta je ûnyi a khaca bongon, ke so bi hnân otethmʼ öbun.

² Wâ eâu ta je kuli, wâ eâu tavat adre me ânyâ monu, wâ eâu katatom:

³ anyin a öta ang waperitom, tavat adre me khudrung ûnyi ge Hanon Khong, me hobeluâ Keriso Iesu, me ca labageju bi ka hnyi unyin:

⁴ ke so bi e hu but gak hnân labageju ka hnyi unyin: ame ne he ke at ka ûnykûme a gʼ ame hu but gan hnân labageju ka hnyi unyin, me hu gan hmâ bi könya:

⁵ adre peritomoni nya hnyi bong a eitiny, mâtrân Isaraela, ke hanen tribu Beniamina, ke hing at Heberu; ke Faresaio hoton hnanyibu;

⁶ ke at ovecâ ekalesia hoton wek ae hwege; ke ba kongik hoton hwakecin ae wisa hnyi hnanyibu.

⁷ Ke haba ta je ûnyi ae ûnyi hnathu könya, wale oge me oûnyibâûâ can Keriso.

⁸ Eke, e hnathu, inya oge me oûnyibâûâ ta je ûnyi hia thithö ûnyi hnyi ûnuainy hna wâhmakhmetoâ Keriso Iesu a Tuhok: ke can thibi e oge me hna degecâ ta je ûnyi hia thithö, ke oge me ûnykûme me tiren bi ta je ûnyi eling, me inye he ka hu Keriso,

⁹ mʼ adre me he ka ō nya unyin, ke ca ka ûnyi gak bi hwakecik ae wisa, waleji ûnyi hnyi hnanyibu, ke so bi a deny labageju ka Keriso, wale hwakecin ae wisa ûnyi ge Khong hnen labageju:

¹⁰ mʼ oge me he ka wâhmakhmetoâ e, me maniny möt hmetu a e, me he ka tha hnyok mē hnyi vec, me tha ûcû më hnyi imekiny;

¹¹ ame ne khanö nya he ka o ka hnyi möt hmetu ûnyi hnyi hna mok.

¹² Ca ûnyi bi hnyi hnok hna hu walang ang, ke ca ûnyi minya bi hnyi bekhöt a soik walang ang: ke so bi inya bala oge me hnu hoton, me inye he ka kât ûnyi ame kot nya ka hnyin Keriso.

¹³ Hnyat me lakeiny lö, oge me ca ûnykûme bi a oge hia but kât: ke khaca thibi ûnyi oge me ânyâ, wale oge me hnying ta je ûnyi waleji eû hnyi hotuk, me hnyimakök hwege ka hnyi ta je ûnyi hnyi hnyimakök,

¹⁴ me wadring hwege ka hnyi haten he ka hu hwaban hna hawo nya ûnyi ethö ge Khong, ûnyi ge Keriso Iesu.

¹⁵ Anyin a wale hamöta hia tavat ae wisa he ka ûnykûme helâe: ke a ne hu ke je ûnykûmenöbun hnyi ke ûnyi, me ame he Khong ka omanenâ ûnyi eling köbun:

¹⁶ ke haba hnöta hna o ka hnyin, me so ate me he bala bi hnyi ûnyi eling.

¹⁷ Hnyat me lakeiny lö, e so öbun e tha hnu hotuk, ke wâhmakhmetu ödra adre me he helâe, ke öhmun ang hnân tulut köbun.

¹⁸ Anyin ae se hia tavat adre me he, kʼ oge me ibi ose hai odra köbun, kʼ oge me ha tengiâ walang ang, a ödra je iwahnaihmiony me satauro anyin Keriso:

¹⁹ haba obiny ködra, me hnaûhango, haba khongudrin me hnyekudra, kʼ adre me hobeluâ ûnyi hnân hmehma ködra, kʼ adre me hnyok ka ta je ûnyi hnyi hmeledrany ang.

²⁰ Ke öta aten drany ethö; kʼ ate me halubahingen At ûhomeli ûheny thö, wale Than Iesu Keriso;

²¹ at ame he ka ohâtâ hmetoâ ta je unyita ae kong, mʼ adre me ûcû me unyin ae hmanenang, hoton man at ae khana he ka hom ûhnyûkongoâ ta je ûnyi hia thithö kâu bi.