Filipi 1 - Iaai Bible 1901 (New Caledonia)

¹ INYA Paulo me Timoteo a li athnyabainy Keriso Iesu, ohmu me set ka wakap hia unyin Keriso Iesu hnyi Filipi, me ta je pisop, me je dikona:

² E so e unyibun ibetengiö baû, me hnahic ûnyi ge Khong a Kamöta, me Than Iesu Keriso.

³ Inya oge me ole ka Khonguk hnyi hnok ta je hna ûnykûmi öbun hia,

⁴ kʼ oge me labö sumat me senyin hnyi hijik je hic hia hobi köbun hia,

⁵ anyin a öbun e tha hnyok hnyi ûthumetu ae so, hwân hnyi bong a bân ke ne o but walang ang;

⁶ ke oge me wâ cicöâ ûnyi eang, a haba at ame ibi hwân huliwa eû hnyi je hnyekubun, me ame he at eling ka obekhötâ e ke ne o but hnyi bong bongi Iesu Keriso:

⁷ ke e wisa könya he ka ûnykûme köbun hia, anyin a öbun dut eû hnyi hnyik, ke öbun hia öbun e tha hu mönya ibetengiöʼ baû, hnyi hna cö nya, me hnyi hna otilâ me ohmâ ûthumetu ae so.

⁸ Anyin a Khong ame ohnathu nya ae gan hmâ hnok hna hnyok köbun hia ûnyi hnyi ibetengiö ae gan anyin Keriso Iesu.

⁹ Ke walang hijic hic, a gʼ ame he ka kû gan hmâ bala anyibun ibetengiö hnyi metâ me wâhmakhmeto hia;

¹⁰ mʼ öbun e he ka haisoâ ta je ûnyi ae so; mʼ öbun e he ka hnyok hnathu, ke ba hnyikongon gabun ke ne o but hnyi bong bongon Keriso;

¹¹ mʼ öbun e unöngöt ge je wan hwakecin ae wisa ûnyi ga Iesu Keriso, hnân ogânâ me haisoâ Khong.

¹² Hnyat me lakeiny lö, e wek öbun e he ka khana, a haba ta je ûnyi a o könya me adre hia but wia me hnân okûâ ûthumetu ae so;

¹³ me me manen dut a gʼ adre cö nya can Keriso, ka tavat tue hia unyin than tot, me kolon tavat bia;

¹⁴ ke haba hna cö nya, me ame ha hwegiâ je hnyat me lakeiny ae se hia unyin Than, mʼ adre me hwege hmonyin he ka ha hofuc hwan Khong me ca ot.

¹⁵ Ke haba keihen me adre me khetâ Keriso ûnyi hnyi ihunyi nköu me iwatretra; ke haba keihen, me ûnyi hnyi hnyok ae so:

¹⁶ haba ke keihen, me adre me ânyâ e hnyi ibetengiö, anyin ae khanʼ ödra a gʼ adre ip nya hnân otilâ ûthumetu ae so:

¹⁷ ke haba keihen, me adre me khetâ Keriso ûnyi hnyi iwatretra, ke ca ûnyi hnyi hnyok ae hnathu, kʼ adre me ûnykûme bi he ka bi hanen könya vec hnyi hna cö nya.

¹⁸ Ke ieû? adre me khetâ Keriso hnyi ta je deny hia, ame ne ûnyi hnyi bihihwakecin, kʼ ame ne ûnyi hnyi hnathu; waleling mʼ oge me senyin, eke, me oge me he ka senyin bala.

¹⁹ Anyin ae khanö nya, a haba ûnyi eang, me ame he ka obiny ka hnyi anyik jmöt, hnen hijibun hic, me hna ham Hanu Iesu Keriso,

²⁰ hoton hnok hna wek gan hmâ, me gejon, a oge ca he ka hmehma bi hnyi ke ûnyi, ke so bi mʼ adre me he ka ogânâ Keriso walang ang hnen unyin, helâ me ehac, me ti hwege, a ne ûnyi ge möt, a ne ûnyi ge mok.

²¹ Anyin haba anyik möt me hobi kö Keriso; ke haba iny ka mok, me wale hnahicik.

²² Ke ame ne wan thibi anyik huliwa, ka habe, he ka möt hnyi unyin— awe, e ca khanö nya hnok hna he ka ûca.

²³ Anyin oge me loloâ hnyi li ûnyi eang, ke haba wek bi, me he ka he but, e me tha inya me Keriso; wale so ae nua:

²⁴ ke so bi e ûnyi hnathu köbun mʼ oge me he ka laba hnyi unyin.

²⁵ Wale hnok hna labageju kâu, me khanö nya a oge me he ka laba, eke, me tha laba mʼ öbun hia, he ka bihanen ûne köbun me osenyini öbun hnyi labageju;

²⁶ me me gan hmâ but hnobun hna hobelöû hnyi Keriso Iesu ûnyi gak, iny ka o but hmetu köbun.

²⁷ E so e he ka ûcû hwakecibun me ûthumetu ae so anyin Keriso: me iny ka o he ka iouny mʼ öbun, ke a ne hiö nya minya bi, oge me he ka long gabun, ka habe, öbun e tethmâ hnyi hanu a khaca, me ûnykûme a khaca, me tha hwege ka hnyi labageju, wale ûthumetu ae so;

²⁸ ke ca outen bi ta je iwahnaihmiöny: wale a ke ûnyi hnân haten hnaûhango, ke haten bi möt köbun, a ûnyi ge Khong e;

²⁹ anyin adre hia but ham köbun ge Keriso, ca he ka hake labageju thibi kâu, ke so minya he ka vec can e:

³⁰ ke hu gabun vat waleji öbun e wâ gak, ke öbun e long walang ang a e unyik.