Filemona 1 - Iaai Bible 1901 (New Caledonia)

¹ INYA Paulo adre me cö nya can Keriso Iesu, me Timoteo ke liamekeiny möta, ohmu me sit kö Filemona a oûnykûmihmu, ke at ame tha huliwa möhmu,

² me kö Afia a ke hanihmu, me kö Arekipo at a tha hien möhmu, me ka ekalesia hnyi hnyabam:

³ E so e unyibun ibetengiö baû, me hnahic ûnyi ge Khong a Kamöta me Than Iesu Keriso.

⁴ Inya oge me ole bala ka Khonguk, me haiö u hnyi hijik ta je hic,

⁵ anyin oge me löng ut ânyâm ibetengiö, me ânyâm labageju ka Than Iesu, me ka wakap hia thithö;

⁶ me me hu troban ge tha hnyok hnyi ânyâm labageju, hnyi hna wâhmakhmeto ta je ûnyi hia ae so eû hnyi hnyibun ka hnyi Keriso Iesu.

⁷ Anyin ae hu gak senyin me kaukahwa ae gan hmâ ûnyi ge ânyâm ibetengiö, anyin a ûnyi gam liamekeiny mönya, a gʼ adre hia but okahwa je hnyekon wakap.

⁸ Anyin a wale, eja ke ne a ne hu gak hwege hnyi Keriso he ka hûna köu ta je ûnyi ae ûcû,

⁹ oge me he ka sumatö u hnyi ibetengiö, inya Paulo a hingat, adre cö nya walang ang can Keriso Iesu:

¹⁰ inya oge me khöûö Onesimo köu a nokuk, waleji oge hnokoâ ke inya hnyi uma ce at,

¹¹ waleji ae ca ûnyi hnathu köu ehac, ke walang ang e ûnyi hnathu but köu mönya minya:

¹² ke oge me kunâ hmetu e köu, ke wale bi e, a hing hnyekuk bi:

¹³ waleji oge me bewek he ka hom behânâ me me tha e mönya, hnân hwabâm he ka bi athnyabaik hnyi hna cö nya can ûthumetu ae so;

¹⁴ ke oge me ca bemâdrâ ke ûnyi, e ka tiga ca khatö nya hnyekom; me me ka hamen bi kû ânyâm so, ke ca hnyi musi bi.

¹⁵ Anyin adre ohia e unyâm la, hnyi ke ong ûen, me me he e unyâm bi nyiele balua;

¹⁶ ca helâ hmetu me athnyaba, ke beönua hon athnyaba, ke liamekeiny bi a oûnykûmita, ae ûnyi hnathu könya, ke ti ûnyi hnathu köu, hnyi unyin me Than minya.

¹⁷ Anyina wale u ka ûnykûme me ihumâm inya, më kap ju e helâ me inya.

¹⁸ Ke ame ne hia but okongu u hnyi ke ûnyi, ke hu ânyâm ûnyi gan, hna but ûnyi e könya;

¹⁹ inya Paulo oge me sihnalimen e ge hnyamok, a oge me he ka bi hwaban: ke oge me ca he bi ka ha köu, ka habe, e ûcû köu he ka hnö u bi könya.

²⁰ Eke, liamekeiny lö, osenyini nya thö ge Than: okahwa thö hnyekuk unyin Keriso.

²¹ Oge me set köu, anyin oge me labageju u me he ka ling nya, ke e khanö nya a u me he ka ânyâ nua hon hnok hna ha.

²² Ke wale minya eang penapena thö ke dok mʼ oge me he ka laba hnyin: anyin a inya oge me gejon adre me he ka hnö nya köbun ûnyi ge maniny hijibun hic.

²³ Ame italofa möu Epafera, wale adre tha cö nya më, can Keriso Iesu;

²⁴ ke ame italofa möu Mareko, me Aretako, me Dema, me Luka, hnyat ödrin e tha huliwa mönya.

²⁵ E so e hnyi hanubun ibetengiö baû anyin Tuhöta Iesu Keriso. Amen.