Ezera 9 - Iaai Bible 1901 (New Caledonia)

¹ Kʼ AME um dö ta je ûnyi eling, me ame hakekeny könya je than hia, haingödrin, ka habe, Haba tavat Isaraela, me tavat bihut, me at Levi, ödrin e ca hia but oûsâkâûöâ me tavat aten je hnyei, ge anyidrin je hwakecin ae ikiki, wale at Kanana, me Heth, me Perizi, me Jebusi, me Amona, me Moaba, me Aigupito, me Amora.

² Anyin a ödrin e hia but hom lakudrin je hlu hobi ködrin me lakudrin je baga; mʼ adre me hia but ûhaniken wan ae kap me tavat aten je hnyei: eke, ame bân je than me tavat musi ka hnyi hulo eling.

³ Ke oge me long hofuc eling, me kia but anyik ûkhaû, me anyik ûkot, me hnimö leûnen bök me waik, me laba ot.

⁴ Me ödrin e ûkhacaköu hia thithö könya hnyat adre me öbubuny ge hofuc hwan Khongu Isaraela, can hulo anyin je aten bâ; ke oge me laba ot ke ne o but adre me hudo hnyi sahac.

⁵ Ke hnyi ûen adre me hudo hnyi sahac, me oge me todrö ûhek hnyi anyik hmak, kʼ ame khekhe but ûkhaûik me anyik ûkot; me oge me cibouca, me hai li hnyamok kö Iehova Khonguk;

⁶ me oge me ha, ka habe, Khonguk lö, iny hmehma but me hmak he ka hngele hnyidranyai köu Khonguk: anyin ae gan hmâ hnyikonguhmun hnyi hon je hohmun, ke gan hmâ anyihmun hulo ke ne o but hnyi drany.

⁷ E gan anyihmun hulo hwan hnyi ûen lakamöhmun ke ne o but huyi bong ang; ke can anyihmun je monu, me adre me hnʼ ohmun, me latuhömun, me tavat bihut unyihmun, ka hnyi hnyamen je thaniny je hnyei, ka hnyi hele vat, me ka hnyi hwenbâ, me ka tavat söh, me he ka hmehma, helâ me hnyi bong ang.

⁸ Ke walang ang e okhulit thibi ûen ae hu gahmun betenge ûnyi ga Iehova Khonguhmun, he ka bi kolon kohmun möhmun e möt, me ham kohmun ke fao hnyi anyin dok ae kap, me me he Khonguhmun ka omelamâ je emaköhmun, me ham kohmun ûhomeli ae ûhnyûkong kohmun a je bâ.

⁹ Anyin a ohmun hoûbâ; ke so bi Khonguhmun ame ca hnying ohmun hoûbâ, ke e ame okûâ ibetengiö hnyi hnyimakan than Peresi he ka ham kohmun ûhomeli, mʼ adre me otilâ uma umen Khonguhmun, me ânyâwia dok adre me thö, me he ka hna kohmun ke hak hnyi Jerusalema me Juda.

¹⁰ Ke walang ang, Khonguhmun lö, hwaban e, ie hofuc ohmun e he ka ha? anyin a ohmun e hia but hna degecâ ânyâm je hnanyibu,

¹¹ waleji u je hûna a deny lathnyabaem a je perofeta, ka habe, Haba hnyei öbun e he ka he ka hnyin me hu, hnyei ae bo kong ge bokonginy aten je hnyei, hnen je hwakecidrin ae ikiki wale ame öunöngötâ je ke keihen hnyei ge hwakecidrin ae ikiki.

¹² Ke walang ang ca he ka ham lakubun wahlu ka lakudrin obaga, ke ca hok lakudrin wahlu hobi kâu lakubun obaga, ke ca he ka elâm anyidrin hnahic me so nyiele balua: mʼ öbun hwege bi, me an soiny kânâ, me ûjelabâ ge lakubun nyiele balua.

¹³ Ke hwaban ta je ûnyi hia ame o kohmun can hwakecihmun ae kong, me anyihmun hulo ae gan, anyin a u Khonguhmun u je bi hwaban ûhnyûkongo kohmun ke ca gan hmâ hoton anyihmun monu, ke u je ham kohmun ûhomeli helâng,

¹⁴ hawa ohmun e ne he ka he hmetu ka hanyâûâ ânyâm je hnanyibu, me ûhamtamomo me tavat adre me ânyâ je ûnyi ae ikiki eling? hawa, u me ca he ka hmönyâm kohmun ke ne o but adre me ohiʼ ohmun, me ba ju kolon, me at ae möt?

¹⁵ Iehova lö, Khongu Isaraela, u wisa; anyin a öhmun thiju ang je kolon ae möt, helâ me hnyi bong ang: wâ ju, öhmun dut ang hnyi hnyimâkâm me hnyikonguhmun; anyin a can e e ca khana ke at he ka tot hnyi hnyimâkâm.