Ezera 8 - Iaai Bible 1901 (New Caledonia)

¹ WALE je lakamödrin ae beönua, ke walang je dö anyin tavat adre tha he mönya ûhedrin Babulona, hnyi ûen musi anyi Aretaseta than.

² Hanen je laku Fineasa, Geresoma: hanen je laku Ithamara, Daniela: hanen je laku Davita, Hatusa.

³ Hanen je laku Sekania; hanen je laku Paros, Zakaria: ke adre tha aû gaga mē obaga a wan haded ke fifte.

⁴ Hanen je laku Pahatha-moaba, Elioenai nöku Zeraia; ke tha e me obaga a ödrin tu haded.

⁵ Hanen je laku Sekania nöku Jaziela, ke tha e mē obaga a theri haded.

⁶ Hanen je laku Adin, Ebed nöku Jonathana; ke tha e me obaga a fifte.

⁷ Ke hanen je laku Elama, Jesaia nöku Athalia; ke tha e mē obaga a sevente.

⁸ Ke hanen je laku Sefata, Zebadia, nöku Mikaela, ke tha e mē obaga a eite.

⁹ Hanen je laku Joab, Obadia nöku Jehiela; ke tha e mē obaga a ödrin tu haded ke eitin.

¹⁰ Ke hanen je laku Selomith, nöku Josefia; ke tha e mē obaga a wan haded ke sikste.

¹¹ Ke haba hanen je laku Bebai, Zakaria nöku Bebai; ke tha e mē obaga a twente eit.

¹² Ke hanen je laku Azegada, Johanana noku Hakatan; ke tha e me obaga a wan haded ke ten.

¹³ Ke hanen je laku Adonikama, tavat a bilidrin; ke walang je iödrin, Elifelet, me Jeiela, me Semai, ke tha e mödrin obaga a sikste.

¹⁴ Ke lo li hanen je laku Rigevai, Uthai me Zabud; ke tha e mödru obaga a sevente.

¹⁵ Ke o ge me ûkhacaköu ödrin hnyi wagewe ame hingölö Ahava ai; ke öhmun e hunuma eling hnyi kun ta bong: ke oge me wâ gaga tavat, me tavat bihut, ke oge me ca wâ bi eling je laku Levi.

¹⁶ Ke oge me hawo Eliezara, me Ariela, me Semaria, me Elenathana, me Jarib, me Elenathana, me Nathana, me Zakaria, me Mesulama, je at ae ûnyi hnathu; me Joiarib minya, me Elenathana li at ûne.

¹⁷ Me oge me kunʼ ödrin kö Ido tuhan hnyei Kasifia, ke oge me bi hodrin hofuc hnân ha kö Ido, me je liamekeiny mē a at Nethini, hnyi hnyei Kasifia, mʼ ödrin e he ka hom kohmun ke je lathnyaba hobi kâu ama umen Khonguhmun.

¹⁸ Ke helâ me hnyamen Khonguhmun ae so huhmun me ödrin e hom ke at ae metâ kohmun, hanen je laku Maheli nöku Levi, nöku Isaraela; me Serebia, me lakon me je liamekeiny mē a ödrin eitin;

¹⁹ me Hasabia, ke tha e mē Jesaia nöku Merari, me je liamekeiny mē me je lakudrin, a twente;

²⁰ me ke je Nethini, hnyat eji a ham ga Davita me je than hobi kâu huliwa anyin at Levi, a tu haded ke twente at Nethini: kʼ adre me ve ha je ödrin.

²¹ Ke oge me haimemenâ ûen he ka ca han eling hnyi wagewe Ahava, me hom ûhnyûkongi öhmun bi hnyi hnyimakan Khonguhmun, he ka elâm gan dehmun gethen ae wisa, me je wanakat gahmun, me anyihmun ta je ûnyi hia thithö.

²² Anyin a iny hmehma he ka sumâtâ ge than je soje me tavat tabô hors he ka badruʼ öhmun can je iwahnaihmiony eû hnyi gethen: anyin a öhmun e hia but ha ka than, ka habe, E bala bi hnyamen Khonguhmun hnân so ködrin a hnyat adre me elâm e; ke haba maniny man me anyin hmonyin me e bala bi hudrin hia thithö tavat adre me hna degecâ.

²³ Me öhmun e ca han kʼ öhmun e sumâtâ bi Khonguhmun ge ûnyi eling; me e ame ling öhmun.

²⁴ Me oge me ip ke je at bihut ae beönua a ödrin twelv, wale Serebia me Hasabia ke tha mödru ke je liamekeiny mödru a ödrin ten,

²⁵ me oge me tuluto ködrin sileva, me gol, me je kaia, adre me ham hnân hobi kâu uma umen Khong, waleji a ham than me je obotkonginy, me anyin je taben, me at Isaraela hia thithö eling:

²⁶ haba sileva oge me tuluto ka hnyi hnyamödrin, me, siks haded ke fifte je talan, me je kaia sileva a wan haded je talan; ke wan haded je talan gol;

²⁷ ke twente je utkaia gol, a wan thauzan je dareki ihmakiny, ke lo li kaia bras ae so ae hadröngöc ae ûnyi hnathu helâ me gol.

²⁸ Ke oge me ha ködrin, ka habe, Öbun e kap ut kö Iehova, ke kap ut je kaia; ke haba sileva me gol, adre me ka hamödra ham kö Iehova Khongon lakamöbun.

²⁹ Wâ wia, me tuö, ke ne o but öbun e he bi ka tuluto hnyi hnyimakan tavat bihut ae beönua, me at Levi, me je taben je kamen ae beönua hnyi Isaraela, hnyi Jerusalema, hnyi je hnyeuleny umo Iehova.

³⁰ Me haba at bihut, me at Levi, ödrin e tuluto ihmakiny sileva me gol, me je kaia, he ka hom Jerusalema ai ka hnyi uma umen Khonguhmun.

³¹ Me öhmun e he ûheny hnyi wagewe Ahava hnyi bong a twelviny tehi a bân, he ka he Jerusalema ai: ke ka e huhmun hnyamen Khonguhmun, me e ame omeli öhmun ûnyi hnyi hnyamen je iwahnaihmiony, me at ame laba duöng eû hnyi gethen.

³² Ke öhmun e o but hnyi Jerusalema, me laba eling hnyi kun ta bong.

³³ Ke haba hnyi bong a vakiny adre me tuluto sileva, me gol, me je kaia, ka hnyi hnyamö Meremoth nöku Uria at bihut, hnyi uma umen Khonguhmun; ke tha e mē Eleazara nöku Fineasa; ke tha e mödru Jozabada nöku Jesua, me Noadia nöku Binui, li at Levi;

³⁴ ta je ûnyi hia ge ûseiny me ihmakiny; ke adre sihnalimen ihmakiny hia hnyi ûen eling.

³⁵ Ke haba lakon je bâ, tavat adre me o ûhedrin hnyi hna bâ, ödrin e hudo je hudiny leû ka Khongon Isaraela, twelv je bolok hobi kâu Isaraela hia, ke nainte siks je mamoe baga, ke sevente seven je nokon mamoe, ke twelv je got baga hnân hudiny hulo: wale hia e je hudiny leû kö Iehova.

³⁶ Ke ödrin e ha hofuc hwan than ka tavat musi ae beönua anyin than, me je gavena hnyi ke keihen hoton wagewe, me ödrin e hadruâ tavat, me uma minya umen Khong.