Ezera 7 - Iaai Bible 1901 (New Caledonia)

¹ KE hwaban ta je ûnyi eling hnyi musi anyi Aretaseta than Peresi, me ame he Ezera nöku Seraia, nöku Azaria, nöku Hilekia,

² nöku Saluma, nöku Zadoka, nöku Ahituba,

³ nöku Amaria, nöku Azaria, nöku Meraioth,

⁴ nöku Zeraia, nöku Uzi, nöku Buki,

⁵ nöku Abisua, nöku Fineasa, nöku Eleazara, nöku Arona at bihut ae beönua:

⁶ haba at eling a Ezera ame he but ûheny Babulona; ke e at ae ti khana sihnalimen hnyi hnanyibu anyi Mose, waleji a ham Iehova Khongu Isaraela: ke haba than ame ham hia kâu hnen hna sumâtâ, helâ me hnyamö Iehova a Khongon hon.

⁷ Ke ame he but ke je lakon Isaraela, me ke je at bihut, me at Levi, me tavat khumöng, me tavat tuö hwanuma, me at Nethini, Jerusalema ai hnyi huna a seveni Aretaseta than.

⁸ Ke e ame o but hnyi Jerusalema hnyi tehi a thabûnginy wale huna a seveniny than.

⁹ Anyin a haba hnyi bong a bâniny tehi a bân e ame ibi hwân he ka he ûheny Babulona, ke haba hnyi bong a bâniny tehi a thabûnginy, e ame o but hnyi Jerusalema, helâ me hnyamen Khongon ae so hon.

¹⁰ Anyin a Ezera ame penapena hnyekon he ka elâm hnanyibu anyi Iehova, me ânyâ, me he ka ûnö hnyi Isaraela je hnanyibu me je hna owisa.

¹¹ Ke walang je hofuc hnyi tusi wale a ham Aretaseta than kö Ezera at bihut, me at sihnalimen, at ame sihnalimen je hofuc hnyi je hnanyibu anyi Iehova me hnen je hna hûna ka at Isaraela.

¹² Aretaseta, thaniny ta je than, kö Ezera at bihut, at ame sihnalimen hnanyibu anyin Khongon drany, ae bekhot, me helâe.

¹³ Inya oge me hûna, a haba at Isaraela hia, me anyidrin tavat bihut, me at Levi, hnyi dökhuk dokhu, ödrin e ka hamödra weny he ka he Jerusalema ai, awe, adre me he ka tha he möu.

¹⁴ Anyin a inya than oge me kunö u me je obotkongik a seven he ka elâm ge Juda me Jerusalema, hoton hnanyibu anyin Khongom a e hnyi hnyamâm;

¹⁵ me he ka hom sileva me gol, waleji a ka ûnyi gak me je obotkongik hna ham ka Khongon Isaraela, at ame laba hnyi Jerusalema,

¹⁶ me sileva me gol hia u me he ka wâ hnyi hnyei Babulona hia, tha e me hna ham bâûâ hnen tavat, me tavat bihut, ödrin e ka hamödrin ham ka hnyi uma umen Khongudrin hnyi Jerusalema;

¹⁷ anyin a wale u me he ka ie ûco hwaban je mone eling je bolok, me je mamoe baga, me je nokon mamoe, me je hudiny han, me je hudiny ic, me hudo hon taben hut hnyi uma umen Khongubun hnyi Jerusalema.

¹⁸ Ke haba ûnyi ae so köu me je liamekeiny möu he ka ânyâ ge je kolon je sileva me gol, ânyâ thö helâ me weny Khongubun.

¹⁹ Ke haba je kaia adre ham köu hobi kâu huliwa hnyi uma umen Khongom, ip ju hnyi hnyimakan Khongon Jerusalema.

²⁰ Ke haba ke je ûnyi ae ûcû hobi kâu uma umen Khongom a u me wem he ka ham, me ham dö ûnyi hnyi uma omjeû anyin than.

²¹ Ke haba inya, Aretaseta than, me oge me hûna ka tavat tuö omjeû hia thithö hnyi ke keihen hoton wagewe, a haba ta je ûnyi hia ame he Ezera at bihut, at a sihnalimen hnanyibu anyin Khongon drany, ka sumâtâ unyibun, me, adre me he ka ie ânyâ,

²² ke ne o but hnyi wan haded je talan sileva, ke wan haded je tulut hwit, ke wan haded je bath waina, ke wan haded je bath wakaco, ke sâlt adre me ca he ka ha tulutiny.

²³ Haba ta je ûnyi hia a hûna Khongon drany, me ânyâ wisa thö hobi kâu uma umen Khongon drany; anyin a ieû ame he ka hu hmonyin ka dokhu dokhon than me je lakon?

²⁴ Ke öhmun e ha minya köbun, a haba tavat bihut, me at Levi, me tavat khumöng, me tavat tuö hwanuma, me at Nethini, me lathnyabainy uma eling umen Khong, me adre me ca he bi ka kunʼ ödrin ka fâtâ omjeû, me jeû, me bi öhnyei.

²⁵ He haba u Ezera, me u ma he ka otilâ tavat ûhnei me tavat owisa, hoton metâiny Khongom wale unyâm, he ka owisa ka tavat hia thithö hnyi ke keihen hoton wagewe, tavat hia ae khanʼ ödra hnanyibu anyin Khongom; ke nâ thö tavat ae ca khanʼ ödra.

²⁶ Ke haba tavat hia adre me ca hnyi ânyâ hnanyibu anyin Khongom me hnanyibu anyin than, me adre me he ka ie bi hwabödra, ame ne he ka mok, ame ne he ka obâ, ame ne he ka hûgûnâ anyin ta je ûnyi, ame ne he ka ca.

²⁷ Ole kö Iehova Khongon lakamötin, at ame ip ûnyi e hnyi hnyekon than, he ka ohmanenangâ uma umo Iehova hnyi Jerusalema;

²⁸ me at ame okûâ könya ibetengiö hnyi hnyimakan than me anyin je obotkong, me hnyi hnyimakan je taben ae gan hia thithö anyin than. Ke adre me ohwegiö nya hoton hnyamö Iehova Khonguk huk, me oge me ûkhacaköuâ ke je at ae ûnyi hnathu ûhedrin hnyi Isaraela he ka tha he mönya.