Ezera 6 - Iaai Bible 1901 (New Caledonia)

¹ ME haba Dariu than ame ûkhûnöng mʼ adre me elâm hnyi uma umen je tusi, dok adre me hip omjeû hnyin hnyi Babulona.

² Me adre me wâ hnyi Akemetha, hnyi uma umen than hnyi hnyei Madai, tusi adre vhec, kʼ adre me hia but sihnalimen hnyin hofuc hnân oûnykûmeâ, ka habe,

³ Haba hnyi huna a bân a than hnyin Koreso, me haba Koreso than ame huna, ka habe, Haba ge uma umen Khong hnyi Jerusalema, me adre me he ka op uma, waleji adre me bi hut hnyin, ke adre me he ka ip hwegiâ je taben; kʼ ame he ka beû goranyai sikste kubit, ke sikste kubit ûlauen;

⁴ kun ta deo veto ae gan, ke khaca deo uto ae teb unyi: kʼ adre me he ka bi hwaban e ûnyi hnyi uma umen than:

⁵ ke haba je kaia gol me sileva anyin uma umen Khong, waleji a hom Nebukaneza ûnyi hnyi uma kap hnyi Jerusalema, me hom Babulona ai, adre me he ka ham hmetu, me hom hmetu ka hnyi uma kap hnyi Jerusalema, ke ûnyi me ke ûnyi ka hnyi hnen, ke u me he ka ip hnyi uma umen Khong.

⁶ Ke walang ang, Tatenai lö, at musi hnyi ke keihen hoton wagewe, me Setara-bozenai, me je lahanöbu a at Afareseka hnyi ke keihen hoton wagewe oûsâkâû öbun dut me ûnyi e:

⁷ ca he ka ovhelö huliwa hnyi uma umen Khong; hamen at ame muso at Juda me wahingatiny at Juda op uma umen Khong eling hnyi hnen.

⁸ Ke haba khaca inya oge me hûna ge hnobun hna he ka ânyâ ka wahingatiny at Juda hobi kâu hna op uma umen Khong eling: a haba ke je omjeû, wale ûnyi hnyi fat hnyi ke keihen hoton wagewe, adre me he ka ie ham ka tavat ang hnân hwaban huliwa, mʼ adre me ca ovheli ödrin bi.

⁹ Ke haba je ûnyi ae ûcû ködrin, wale je nokon kau, me je mamoe baga, me je nokon mamoe, hnân hudiny leû ka Khongon drany, me hwit, me sâlt, me waina, me wakaco, hoton hofuc hwan tavat bihut hnyi Jerusalema, me, adre me he ka ham ködrin hnyi ke bong me ke bong kʼ adre me ca he ka onua:

¹⁰ mʼ ödrin e he ka hudo je hut ae bo so ka Khongon drany, me hic me me möt than, me lakon.

¹¹ Ke oge me hia but hûna minya, a haba tavat hia thithö adre me he ka wia hofuc ang, adre me he ka oc ut ke uto ûnyi hnyi umen uma, me adre me he ka ogöranyâ e me ca e hon; me ame he umen uma ka hnân hna digic thatûnyi can e:

¹² ke so ame he Khong at ame ip ien eling ka ohia ta je than me ta je hnyei hia thithö, ödrin e he ka inâ je hnyamödrin he ka wia ûnyi e, he ka ohia uma umen Khong eling wale hnyi Jerusalema. Oge me hia but hûna, inya Dariu, ie ânyâ thö.

¹³ Ke haba Tatenai at ame musi hnyi ke keihen hoton wagewe, me Satara-bozenai, me je lahanödru, ödrin e ie ânyâ, can hna ûkhûnöng hnö Dariu than ködrin.

¹⁴ Ke haba wahingatiny at Juda adre me op uma me hnahic ut, ûnyi ge hna perofeta hnö Hagai a perofeta me Zakaria nöku Ido. Ke ödrin e op me umo e, hoton musi anyin Khongu Isaraela, me hoton hna hûna hnö Koreso, me Dariu, me Aretaseta thaniny Peresi.

¹⁵ Ke adre me umo uma eling hnyi bong a kuniny tehi Adara, wale hnyi huna a siksiny musi anyi Dariu a than.

¹⁶ Ke haba lakon Isaraela, me tavat bihut, me at Levi, me je kolon a je bâ, me adre me delec uma umen Khong me senyin.

¹⁷ Ke haba hnyi hnödra hna delec uma umen Khong, me ödrin e hudo wan haded je bolok, ke tu haded je mamoe baga, ke foa haded je nokon mamoe; ke twelv ta got baga hnân hudiny hulo tavat Isaraela biâ, oûco ûseiny je tribu Isaraela.

¹⁸ Ke ödrin e otilâ tavat bihut ka hnyi je hanymodrin, me at Levi hnyi anyidrin je dö, hobi kâu huliwa anyin Khong, wale hnyi Jerusalema; hoton hna sihnalimen hnyi tusi anyi Mose.

¹⁹ Ke haba je lakon bâ adre me ânyâ paseka hnyi bong a fotininy tehi a bân.

²⁰ Anyin a haba tavat bihut me at Levi ödrin e hia but tha obosoi ödrin; ke ödrin e bo so but hia thithö: ke ödrin e hlingâ paseka hobi kâu je lakon bâ hia thithö, me je liamekeiny mödriu a tavat bihut, me hobi ködrin bi.

²¹ Ke haba lakon Isaraela, hnyat adre me hmetu ûhedrin hnyi hna bâ, me hnyat ödrin e laba unyidrin ûhedrin hnyi ta je ûnyi ae ikiki anyin je wanaithila hnyi hnyei he ka elöm Iehova Khongu Isaraela, me, ödrin e hnyi han,

²² me ânyâ senyinâ hnyi seven je bong bijeûiny areto adre ca levenâ: anyin a Iehova ame osenyini ödrin, me wia ködrin hnyekon than Asuria, me ohwegiâ je hnyamödrin hnyi huliwainy uma umen Khong, wale Khongon at Isaraela.