Ezera 5 - Iaai Bible 1901 (New Caledonia)

¹ KE haba li perofeta, wale Hagai perofeta, me Zakaria nöku Ido, ödru me perofeta ka at Juda me Jerusalema, hnyi ien Khongu Isaraela ödru me perofeta ködrin.

² Me ame todrö Zerubabela nöku Sealetiela, me Jesua nöku Jozadaka, me hwân he ka op uma umen Khong hnyi Jerusalema; ke e unyidru je perofeta anyin Khong he ka hadruʼ ödru.

³ Haba hnyi ûen eling ame o but ködrin Tatenai at ame musi hoton wagewe, me Setara-bozenai, me je lahanödru, me ha ködrin ka habe, Ie at ame hnʼ öbun he ka op uma ang, me umo hna up hak ang?

⁴ Ke ohmun e ha helâng ködrin, ka habe, Ia ien je hnyat ödrin e op uma ang?

⁵ Ke e but emakan Khongudrin hon wahingatiny at Juda, me adre me ca thawʼ ödrin, me me o but hofuc kö Dariu, me adre me he ka thu hmetu hofuc eling hnyi tusi.

⁶ Haba tusi ame kunâ kö Dariu than hnö Tatenai at ame musi hnyi ke keihen hoton wagewe, me Setara-bozenai, me lahanen a at Afareseka, wale hnyi ke keihen hoton wagewe:

⁷ ödrin e kunâ tusi kâu, ke adre sihnalimen hnyin helâng, ka habe, Kö Dariu than, hnahic hia but.

⁸ Khanö u thö than, a ohmun e he ka hnyi hnyei Juda, ka hnyi uma umen Khong ae gan, wale adre op je veto ae gan hnyin, ke adre kha je uto hnyi hna up uma, ke e logot huliwa eang, ke e hnahic ut e hnyi je hnyamödrin.

⁹ Me ohmun e hnö wahingat eling, me ha ködrin, ka habe, Ia ame hna köbun he ka op uma eang, me umo hak veto ang?

¹⁰ Ke ohmun e hnö minya je iödrin, me hnân thumetu u, me me khanʼ ohmun he ka sihnalimen ien je athnathuidrin.

¹¹ Ke ödrin e thu kohmun helang, ka habe, Öhmun je athnyabainy Khongon drany me hmeledrany me öhmun e op uma waleji adre op ehac ae se hia je hunainy, waleji hnen ke than Isaraela ae gan hmâ hna op me umo.

¹² Ke haba hwaban dö e a hia but lakamöhmun ohmönyinâ Khongon drany, me e ame hnʼ ödrin ka hnyi hnyamö Nebukaneza than Babulona at Kaledaia, at ame ohia uma eang, me hom tavat Babulona ai.

¹³ Ke haba hnyi huna a bân a than hnyin Koreso than Babulona, me Koreso than ame hûna he ka op uma eang umen Khong.

¹⁴ Ke haba je kaia gol me silevainy uma umen Khong, waleji a hom Nebukaneza ûnyi hnyi uma e Jerusalema, kʼ ame hom Babulona ai ka hnyi uma, hmi; me haba Koreso ame hom ta je ûnyi e ûnyi hnyi uma hmi e Babulona, kʼ ame ham ka ke at Sesebazara ien, at e ame hia but otilâ me gavena;

¹⁵ me e ame ha kâu, ka habe, Hom dö je kaia ang, me he thö, me ip ka hnyi uma kap hnyi Jerusalema, kʼ adre me he ka op uma umen Khong hnyi hnen.

¹⁶ Me ame o but Sesebazara at eling, me bi taben uma umen Khong hnyi Jerusalema: ke hwân hnyi ûen e ke ne o but walang ang, adre me labö op, kʼ adre me tiga ca umo bala.

¹⁷ Ke walang ang ame ne so ka than, awe, adre me he ka elâm hnyi uma umen omjeû anyin than hnyi Babulona, ame ne hnathu a gʼ ame hûna ga Koreso than he ka op uma umen Khong eling hnyi Jerusalema, ke so ame he than ka kunâ kohmun weny hnyi bongon eling.