Ezera 4 - Iaai Bible 1901 (New Caledonia)

¹ KE ame long je iwahnaihmiony me ai Juda me Beniamina a gʼ ame he but je lakon bâ ka op uma umo Iehova, Khongon at Isaraela;

² me ödrin e he but ka Zerubabela, me je kamen ae beönua, me ha tudrin, ka habe, Hnʼ ohmun dut he ka tha op möbun: anyin a ohmun e elâm Khongubun e ûcû möbun; ke ohmun e labö bi hut kia hwân hnyi je bong bongu Esar-adona than Asuria, at a hum öhmun kââng.

³ Me ame ha ködrin Zerubabela, me Jesua, me je kolon je kamen ae beönua hnyi Isaraela, ka habe, E ca hu hanymöbun unyihmun he ka op uma hobi kâu Khonguhmun; ke öhmun e he ka hake op hobi kö Iehova Khongon at Isaraela, helâ me hna hûna kohmun ga Koreso a than, tuhan at Peresi.

⁴ Me haba tavat aten hnyei ödrin e osēnyinâ je hnyamen at Juda, me oti ödrin hnyi hna up uma,

⁵ me bi omjeû ka tavat ha bongon mʼ adre me ovhelâ ûnykûmenödrin hnyi ta je bong hia bongu Koreso than Peresi.

⁶ Ke haba hnyi musi anyi Asueru, hnyi ûen e ame hwân ka musi, ödrin e sihnalimen kâu he ka haikongoâ aten Juda me Jerusalema.

⁷ Ke haba hnyi je bong bongu Aretaseta, haba Biselama, me Mitheredath, me Tabeela, me je kolon a je hanödrin, ödrin e set kö Aretaseta than Peresi; ke haba hna sihnalimen tusi me mataitusi Suria, me adre set hnyi hwen Suria.

⁸ Haba Rehum at owisa, me Simesai at sihnalimen, ödru me sihnalimen tusi kö Aretaseta than, me haiö Jerusalema helâng:

⁹ ame sihnalimen Rehum at owisa, me Simesai at sihnalimen, me je kolon a je lahanödru; at Dinai, me at Afareseka, me at Tarepelai, me at Aferesai, me at Areka, me at Babulona, me at Susana, me at Deave, me at Elama,

¹⁰ me je ke keihen je hnyei waleji hnö Asenapa ae gan me ûnyi hnathu, hna hom but, me ip ödrin hnyi taun Samaria, me hnyi ke keihen hnyei hoton wagewe, me tavat a helâe.

¹¹ Walang hna set hnyi tusi waleji ödrin e kunâ ko Aretaseta than, ka habe, Öhmun je athnyabaem tavat hoton wagewe, me tavat a helâe.

¹² Khanö u thö than, a haba at Juda tavat ödrin e he but kohmun ûhedrin unyâm, ödrin e o but hnyi Jerusalema; ke ödrin e op taun ame thu musi me kong, kʼ adre hia but umo je hna up haginy, me okhötâ je taben.

¹³ Khanö u thö walang ang than a gʼ adre me ne op hmetu taun ang, me umo je hna up haginy, me ödrin e ca he ka bi fâtâ omjeû me jeû, me bi ö hnyei, kʼ adre me he ka okongoâ je than nyiele.

¹⁴ Ke walang ang, anyin a öhmun e an jeû ûnyi hnyi uma umen than, ke ca ûcû kohmun he ka wâ hna oûnyibâûâ than, anyin a wale öhmun e ûkhûnöng he ka thumeto than;

¹⁵ mʼ adre me he ka elâm hnyi tusi hnân oûnykûmeâ anyin lakâmâm: mʼ u me he wâ hnyi tusi hnân oûnykûmeâ me khana a gʼ ame thu musi taun ang, kʼ ame okongoâ ta je than me ta je hnyei, ke haba ehac ödrin e ûhûgûnö musi anyin than hnyin: ke wale can adre me ohia taun ang ehac.

¹⁶ Ke öhmun e thumeto than a gʼ adre me ne he ka op hmetu taun ang, me umo je hna up haginy, awe, ame he ka ba hmetu ânyâm musi hoton wagewe.

¹⁷ Me haba than ame ûkhûnöng he ka thu kö Rehum at owisa, me Simesai at sihnalimen, me je kolon je lahanödru hnyat adre me laba hnyi Samaria, me je kolon hnyi ke keihen hoton wagewe, ka habe, Hnahic ut, me hofuc helâe.

¹⁸ Haba tusi öbun e kunâ kohmun, me adre me hia but aû manenâ hnyi hnyimakök.

¹⁹ Ke oge me hûna he ka elâm, me adre me wâ a gʼ ame bi gan taun eling ehac ka ta je than, kʼ ame kû hnyin ûkhin fuc me ûhûgûnö than.

²⁰ Ke haba ehac e hu je than ae hwege hnyi Jerusalema, kʼ ödrin e muso je hnyei hia thithö hoton wagewe; kʼ adre me labö fâtâ omjeû, me jeû, me bi öhnyei ködrin.

²¹ Ke haba walang ang e so öbun e he ka nyibo me thawâ tavat eling, mʼ adre me ca he ka op taun eling ke ne o but oge me he ka otilâ hnanyibu.

²² Ke wâ wia ju me ca ânyâ becâ: anyin a ieû ame he ka kû ûnyi ae kong me oûhnyûkongoâ je ûnyi anyin je than?

²³ Ke haba hnyi ûen adre me aû tusi anyi Aretaseta than hnyi hnyimakö Rehum me Simesai at sihnalimen, me je lahanödru, me ödrin e ie he Jerusalema ai ka at Juda me thawʼ ödrin ge tang hwege me man.

²⁴ Me adre me ip ju huliwainy uma umen Khong hnyi Jerusalema; ki adre me hna huliwa bala ke ne o but hnyʼ huna a loiny musi anyi Dariu than Peresi.