Ezera 3 - Iaai Bible 1901 (New Caledonia)

¹ KE ame o but tehi a seveniny, ke e but lakon Isaraela hnyi anyidrin je taun, me haba tavat adre me ûkhacaköu hnyi Jerusalema helâ me at a khaca.

² Me ame todrö Jesua nöku Jozadaka me je liamekeiny mē a tavat bihut, me Zerubabela nöku Sealetiela, me je liamekeiny mē, me otilâ taben hut anyin Khongon Isaraela, hnân hudo je hudiny leû hon e, helâ me hna sihnalimen hnyi hnanyibu anyi Mose aten Khong.

³ Ke ödrin e otilâ taben hut hnyi ka hnen bi; anyin a ödrin e outen tavat aten je hnyei: me ödrin e hudo hon e je hudiny leû kö Iehova, je hudiny leû hnyi hnyomakatu me sahac.

⁴ Ke ödrin e anyâ bijeûiny uma hunuma, helâ me hna sihnalimen, me hudo je hudiny leû hnyi je bong hia thibut hoton numera, helâ me hna hûna, me hoton hanymen ke bong me ke bong;

⁵ ke hwaban e, e bala bi hudiny leû, me je tehi a teb ûnyi, me je bijeû ae kap adre thu anyi Iehova hia, me je hut adre ka hamödra hudo kö Iehova.

⁶ Ödrin e ibi hwân he ka hudo je hudiny leû kö Iehova hnyi bong a bâniny tehi a seveniny: kʼ ödra tiga ca umo bi taben uma umo Iehova.

⁷ Ke ödrin e ham mone ka tavat up veto, me tavat tretrau uto; me ham jeû me köiö, me wakaco, ka at Zidona me Turo he ka hom je uto arasi ûnyi Lebanona ka hnyi köiö, Jopa ai, hoton hna hna ködrin ga Koreso than Peresi.

⁸ Ke haba hnyi huna a loiny hnödrin hna o ka hnyi uma umen Khong hnyi Jerusalema, hnyi tehi a loiny, me ame hwân Zerubabela nöku Sealetiela, me Jesua nöku Jozadaka, me je kolon a je liamekeiny mödrin a tavat bihut, me at Levi, me hnyat hia adre me he Jerusalema ai ûhedrin hnyi hna bâ; he ka otilâ at Levi, hnyat a twente huna me gan hon e, he ka muso huliwa hnyi uma umo Iehova.

⁹ Me ame todrö Jesua tha e me lakon me je liamekeiny mē, me Kademiel me lakon, je laku Juda, helâ me at a khaca, he ka muso tavat bi huliwa hnyi uma umen Khong: me laku Henadada, je lakudrin, me je liamekeiny mödrin a je at Levi.

¹⁰ Ke haba hnyat op uma umo Iehova me adre me otilâ tavat bihut adre khaû, ke je trutru hnyi hnyamödrin, ke haba at Levi a laku Asafa ödrin e tot me je simebalo he ka oganö Iehova hoton musi anyi Davita than Isaraela.

¹¹ Ke ödrin e khumöng oganâ me ole kö Iehova, anyin a e at ae so, anyin a nyiele balua anyin ibetengiö ka at Isaraela. Ke haba tavat hia ödrin e hongot hwege goranyai me oganö Iehova, anyin adre me bi taben uma umo Iehova.

¹² Ke se hia tavat bihut, me at Levi, me je kamen ae beönua, a wahingat ödrin e wâ uma a ban, ke adre me bi taben uma eang hnyi hnyimaködrin, me ödrin e tenge hwege goranyai; ke se hia tavat adre me hongot hwege goranyai hnyi senyin:

¹³ me ca manen bi ka tavat hwakuku senyin me hwatenge: anyin a tavat adre me hongot hwege goranyai, ke adre me long medien hnyi dok ae sâkâu.