Ezera 1 - Iaai Bible 1901 (New Caledonia)

¹ HNYI huna a bâniny musi anyi Koreso tuhan Peresi, me haba Iehova ame bwebwelâ hnyeku Koreso than Peresi, me me hwâdâ hofuc ho Iehova a ha Jeremia, me e ame haimemenâ hnyi dokhon dokhu hia, kʼ ame sihnalimen minya, ka habe,

² Walang hna ha hnö Koreso than Peresi, ka habe, A hia but ham könya ga Iehova Khongon dran ta je dokhu hia eang hmelen; ke a hia but hûna könya he ka op umen uma hnyi Jerusalema, wale hnyi hnyei Juda.

³ Haba at unyibun a hanen lakeiny hia, ke so e he Khong ka tha e mē, ke so e ame he thö Jerusalema ai, wale hnyi hnyei Juda, me me hnyi op uma umo Iehova, Khongu Isaraela, hnyi Jerusalema, (e thibi Khong).

⁴ Ke haba kolon tavat hia hnyi je hnyaba hia ödrin e laba hnyin, me so e he tavat aten je hnyabadrin he ka hadruʼ ödrin ge sileva, me gol, me omjeû, me omeno, me ta je bwihlany minya ae betenge hobi kâu uma umen Khong wale hnyi Jerusalema.

⁵ Me ame todrö kamen ae beönua ge at Juda me Beniamina, me tavat bihut me at Levi, a ödrin hia hnyat a bwebwelâ je hnyekudrin ge Khong he ka he me op uma umö Iehova hnyi Jerusalema.

⁶ Ke haba hnyat hia a igigilo, me, ödrin e hadruʼ ödrin ge je kaia sileva, me gol, me omjeû, me omeno, me je ûnyi ae ûnyi hnathu, ke ca ha bi je bwihlany hia adre me ham hnyi betenge.

⁷ Ke haba Koreso a than ame hom minya but je kaiainy uma umo Iehova, waleji a hom Nebukaneza ûnyi Jerusalema me ip hnyi uma umen khongon je khong;

⁸ me haba Koreso than Peresi ame hom ta je ûnyi e a deny hnyamö Mitheredath at ame tuö omjeû, me aû kö Sesebaza ke than Juda.

⁹ Ke walang ûseiny: thote je kaia gol, ke wan thauzan je kaia sileva, ke twente nain je hele;

¹⁰ ke thote je utkaia gol, ke foa haded ke ten je utkaia sileva a loiny, ke wan thauzan ke je kaia.

¹¹ Haba ûseiny je kaia gol me sileva hia, me, faiv thauzan ke foa haded Ke haba Sesebaza ame hom but ta je ûnyi hia eling hnyi ûen adre hom je aten hwenbâ ûhedrin Babulona, Jerusalema ai.