Ezekiela 9 - Iaai Bible 1901 (New Caledonia)

¹ KE e ame hongot hwege ka hnyi li hnyikönyök, ka habe, Ohakekenyâ ju jem tavat adre me tuö taun, tha ödrin me anyidrin je ûnyi hnân ûhlingö.

² Ke wâ bi ame o but siks tavat ûnyi hnyi getheniny homagöule ethö hnyi ke keihen ka hnyi hwadro, ödrin e ve o me anyidrin ta je ûnyi hnân ûhlingö; ke haba hnyi wanbödrin ke at ame khavâ ûkhaû lino, ke hu kaia sisit hnyi vhaken. Ke ödrin e didro me tot hnyi baten taben hut bras.

³ Ke ame he but hmanenanginy Khongu Isaraela ûnyi hnyi hon kerubi, waleji ame tabâ ka hnyi hwanumen uma: Me e ame hawâ at ame khavâ lino, ae hu kaia sisit hnyi, vhaken.

⁴ Ke haba Iehova ame ha kâu, ka habe, Vheno thö taun wanben Jerusalema, ke u me he ka bi haten hnyi je bariny tavat adre me mâng me tenge can ta je ûnyi hia ae ikiki wale adre me ânyâ hnyi wanben e.

⁵ Ke e ame ha ka keihen, ke oge me hnyi long, ka habe, He thʼ öbun ka vheno taun hoton e, me kot: ca he öbun ka hok hnyok me betenge:

⁶ hlingâ degecâ but wahingat me wahidröu, me wahlu, me wanakat, me omomo: ke ca he ka hakekenyâ ke at ae hu haten; ke hwân dö hnyi anyik dok ae kap. Me adre me hwân ge wahingat hnyi hnyimakan uma.

⁷ Ke e ame ha ködrin, ka habe, Okongoâ but uma, me öunöngötâ thö je hnyeule ge je hna hlingâ: he thʼ öbun. Me adre me he me hlingâ hnyi taun.

⁸ Ke hnyi ûen ödrin e hlingâ, kʼ oge me hake laba, me oge me ta hnyikânâi me tenge, me ha, ka habe, Ekölö Than Iehova! hawa, u me he ka kot hia je kolon Isaraela, anyin a u me hingâlâ ânyâm hmonyin hon Jerusalema?

⁹ Me e ame ha könya, ka habe, E ti gan hmâ hulo anyin lap Isaraela me Juda, ke ame unöngötö hnyei ge dra, kʼ ame unöngötö taun ge hna ohwalö je hna owisa: anyin a haingodra, ka habe, Iehova ame hia but hna degecâ hmeledrany, ke ame ca wâ bi Iehova.

¹⁰ Ke haba inya oge me ca he bi nya ka hok hnyok me betenge, ke oge me he ka oâ dedra je gethen ka hnyi hon je bödra.

¹¹ Ke wa bi, haba at ame khavâ lino, ae hu kaia sisit hnyi vhaken, ame thumetu, ka habe, Oge hia but ânyâ helâ me hnâm hna kûnâ könya.