Ezekiela 8 - Iaai Bible 1901 (New Caledonia)

¹ KE hnyi huna a siks hnyi tehi a siksiny, hnyi bong a thabûnginy tehi, inya oge me laba hnyi umök uma, ke ame laba ju hnyi hnyimakök wahingatiny Juda, me ame ta but huk eling hnyamen Than Iehova.

² Ke inya oge me bwele, ke wâ bi, wale bongan a helâ me meic; hwân hnyi hnyin at ke hnyikânâi me helâ me meic; ke hwân hnyi hnyin göranyai me ame ubâhlâ helâ me makan bras.

³ Ke e ame hinöbeny helâke hnyam, me kât leûnen bok: ke haba hanu ame köp nya göranyai wanben hmeledrany me drany, kʼ ame hum nya Jerusalema ai hnyi hna omanenâ ûnyi ge Khong, ka hnyi hlinginy homagöule ka hnyi hnyeule eiö hnyin ka hnyi hwadro; wale taben idolainy ciâ hnyin, at ame ociâ.

⁴ Ke wâ bi eling hmanenanginy Khongu Isaraela, helâ me hna omanenâ waleji oge me wâ hnyi dok ae tha hon.

⁵ Ke e ame ha könya, ka habe, Nokon at lö, wâ thö walang ang gethen ka hnyi hwadro. Me oge me bwele ka hnyi gethen ka hnyi hwadro, ke wâ bi jimeio hnyi homagouleny taben hut ame tot idolainy cia eling hnyi hna dit.

⁶ Ke e ame ha könya, ka habe, Nokon at lö, u je wâ but ûnyi adre me ânyâ? wale ûnyi ae ikiki ame ânyâ eang ge lap anyi Isaraela, me inye he ka ûsâkâûö me anyik dok ae kap? ke u me he eâu ka wâ minya je ûnyi ae ikiki.

⁷ Ke e ame hum nya ka hnyi hwanumen hnyeule: ke inya oge me bwele, ke wâ bi wale wakhala hnyi hna up veto.

⁸ Ke e ame ha könya, ka habe, Nokon at lö, u me he walang ang ka hiny hnyi hna up veto; ke inya oge me hiny hnyi hna up veto, ke wâ bi hwanuma.

⁹ Ke haingen könya, ka habe, Didro me wâ ta je ûnyi ae ikiki me kong adre me ânyâ eling.

¹⁰ Me oge me dit me wâ ke wâ bi, ta je ûhöûcû hia ûnyi ame iyâû, me je meno ae ikiki, me ta je idola hia anyin lap Isaraela, adre sihnalimen igigilo hnyi hna up veto.

¹¹ Ke ame tot hnyi hnyimakan ta je ûnyi e tavat a sevente hanen wahingatiny lap anyi Isaraela, ke ame tot Jazania nöku Safana hnyi wanbödrin, ke ve hu taben meic hnyi je hnyamödrin; ke ame sâ göranyai hai ae gan hmâ a hainy utö ae bo so.

¹² Ke e ame ha könya, ka habe, Nokon at lö, hawa u me hia but wâ hna ve ânyâ hnen wahingatiny lap anyi Isaraela hnyi dok ae menekholom hnyi je hnyeuleny je ûhöûcû? anyin adre me ha, ka habe, Ame ca ō ʼta but Iehova; Iehova ame hia but hna degecâ hmeledrany.

¹³ Ke e ame ha könya, ka habe, U me he ka wâ eâu ke ta je ûnyi ae gan hmâ ûikikiny adre me ânyâ.

¹⁴ Me e ame hum nya ka hnyi homagouleny uma umö Iehova ka hnyi ke keihen ka hnyi hwadro; ke wâ bi, omomo adre me laba eling ka tenge ga Tamuza.

¹⁵ Ke haingen könya, ka habe, Nokon at lö, u je wâ but e? u me he ka wâ eâu je ûnyi ae ikiki gan hmâ hon e.

¹⁶ Me e ame hum nya ka hnyi hnyeuleny uma umö Iehova eiö hnyin, ke wâ bi, hnyi hwanumen uma umö Iehova, wanben poretiko me taben hut, helâke me twente faiv tavat adre me hotudra ka hnyi uma umö Iehova, me hnyimakodra deiö; ke adre me khudrung deiö ka seûno.

¹⁷ Ke e ame ha könya, ka habe, Nokon at lö, u je wâ but e? Hawa, ûnyi ae hâhâ ka lap anyi Juda wale a gʼ adre me ânyâ je ûnyi ae ikiki wale adre me ânyâ eang? anyin adre hia but öunöngötâ hnyei ge ûokonguny, me hwio hmetu mʼadre me ohmönyini nya: ke wâ bi, adre me inâ anginy ûö ka hnyi je hnyingoidra.

¹⁸ Anyin a wale oge me he bi nya ka huliwa hnyi hmonyin: oge me ca he ka hok hnyok, me betenge: eja ke ne adre ne hongot hwege göranyai ka hyni li hnyikönyök, oge me ca he ka ling ödra.