Ezekiela 6 - Iaai Bible 1901 (New Caledonia)

¹ KE ame o but könya hofuc ho Iehova, ka habe,

² Nokon at lö, hnyimâkâm dö ka hnyi je buceniny Isaraela, ke perofeta thö ködrin,

³ ma ha, ka habe, Je buceniny Isaraela lö, long ju hofuc hwan Than Iehova, ka habe, Walang hna ha hnen Than Iehova, ka je bucen, me je hut, me je wadeny köiö, me je hnyigöuleny bucen, ka habe, Wâ bi, inya oge me he ka oâ köbun hele vat, ke oge me he ka ohia anyibun je dok ae gorany.

⁴ Ke ame he ka ba onyen anyibun je taben hut, kʼ adre me he ka thu anyibun je hna theati seûno; ke oge me he ka ota tavat adre hlingâ unyibun hnyi hnyimakan anyibun je idola.

⁵ Ke oge me he ka ip je kokiny lakon Isaraela hnyi hnyimakan anyidra ta je idola; ke oge me he ka khûkhûâ ta je jeiöbun igigilo anyibun je taben hut.

⁶ Kʼ ame he ka ba wan je taun öbun e labâ, ke ba öoyen anyibun je dok ae gorany; me me ba at ke kong ut anyibun je taben hut, me me monumonu ke hia anyibun je idola, me suba degecâ anyibun je hna theati seûno, me ohia anyibun je huliwa.

⁷ Ke ame he ka ta hnyi wanböbun tavat adre me hlingâ, ke öbun e he ka wâ a inya Iehova.

⁸ Ke so bi oge me he ka bi kolon, me me hu tavat unyibun adre me he ka kec möt ge hele vat hnyi je hnyei, öbun ka vese ka hnyi je hnyei.

⁹ Kʼ ame he tavat adre me kec möt ka ûnykûmi nya hnyi ta je hnyei adre me he ka laba hwenbâ hnyin, a inya höcö wâ hmetu je hnyekudra ae bi ûnyi monu, waleji ame hna degeci nya, me je emaködra ae bi ûnyi monu hoton anyidra je idola: ke adre me he ka hûkötiʼ ödra bi hnyi hnyimakodra bi, can je hulo waleji adre me ânyâ ge anyidra ta je ûnyi ae ikiki.

¹⁰ Ke ame he ka khanʼ ödra a inya Iehova: oge ca hia but ha baûâ bi a oge me he ka ânyâ kodra ûnyi eling ae kong.

¹¹ Walang hna ha hnen Than Iehova, ka habe, Khaûkhaû thö, ke ututo ju, me ha, ka habe, Ekölö! can ta je ûnyi ae kong me ikiki anyin lap Isaraela: anyin adre me he ka ta ge hele vat, me hmiâ, me mok ae cap.

¹² Haba at hnyi dok ae sâkâû ame he ka mok ge mok ae cap; ke haba at ae hakekeny ame he ka ta ge hele vat; ke haba kolon, wale adre thelöng ame he ka mok ge hmiâ: helâe oge me he ka ohwâdâ anyik hmonyin hudra.

¹³ Ke ame he ka khanʼ öbun a inya Iehova, e ka e but je kokidra hnyi wanben anyidra je idola igigilö anyidra je taben hut, hon je dok ae hut hia ae gorany, me hon ban je bucen hia, me hmelen je ûö hia ae hât, me hmelen je iwajo hia ae wanenec, waleji adre ham hnyin je ûnyi ae bo so ka anyidra je idola hia.

¹⁴ Ke oge me he ka hai hnyamok hudra me oba wan hnyei me wia ka hnyot, hwân hnyi hnyebuba hnyi Dibela, hnyi je hnyabadra hia: ke ame he ka khanʼ ödra a inya Iehova.