Ezekiela 5 - Iaai Bible 1901 (New Caledonia)

¹ KE haba u nokon at, hom dö hele vat ae so hwan, wale hele me heleûgi anyin at ûgi u me he ka hom, me u me he ka giâ bâm me waiâm: ke u me he ka hom tulut adre me ûhnö gan, ke u ma khenâ je leûn.

² Haba ke keihen a kuniny, u me he ka thong ge meic hnyi wanben taun, e ka um dö je bonginy thelöng; ke u me he ka hom ke hanen a kuniny me kokot tilâ ge hele vat; ke haba ke hanen bi a kuniny, me u ma khûâ ka hnyi ang, ke oge me he bi nya ka oc hele vat he ka hnu hoton.

³ Ke u me he ka hom ûheny e ke je leûnen, me hûkâlâ hnyi obiny ânyâm ûkhaû.

⁴ Ke u me he ka hom hmetu keihen eling, me khûâ ka hnyi meic, me thong degecâ hnyi meic; me ame he meic ka he but ûnyi gan ka hnyi lapanyi Isaraela hia.

⁵ Walang hna ha hnen Than Iehova, ka habe, Walang Jerusalema: oge hia but ip e hnyi wanben je hnyei, ke ame laba ta je hnyei igigilo.

⁶ Ke e ame hia but hanyâûâ hnok hna owisa hnyi hnen hna ânyâ monu hon ta je hnyei, me hanyâûâ anyik je hnanyibu hon je hnyei igigilo: anyin adre me hia but hna degecâ hnok je hna owisa, me ca vheno anyik je hnanyibu.

⁷ Anyin a wale walang hna ha hnen Than Iehova, ka habe, Anyin a öbun e monumonu hon je hnyei igigili öbun, me ca vheno bi anyik je hnanyibu, me ca ânyâ hnok je hna owisa, ke haba khaca, öbun e ca hia but ânyâ hoton je hna otilâ ge je hnyei igigili öbun:

⁸ anyin a wale, walang hna ha hnen Than Iehova, ka habe, Wâ bi, e ve inya möu, a inya; ke oge me he ka ti bi hwaban köu eû hnyi wanbâm hnyi hnyimakan ta je hnyei.

⁹ Ke oge me he ka ânyâ unyâm ûnyi oge tiga ca ânyâ, ke oge me ca he hmetu ka ânyâ helâe, can ta je hwakecâm ae ikiki.

¹⁰ Anyin a wale ame he je kamen ka an jo lakudra hnyi wanbâm, ke ame he je lakon ka an je lakamödra; ke oge me he ka bi hwaban köu, ke oge me he ka oveseâ je kolon hia gam ka hnyi ta je ang hia.

¹¹ Anyin a wale, kia inya, haingen Than Iehova, e hnathu anyin a u je okongoâ anyik dok ae kap ge ânyâm ta je ûnyi hia ae kong, me ânyâm ta je ûnyi ae ikiki hia, anyin a wale, oge me he bi nya ka oûhnyûkongu u; ke oge me ca he ka hok hnyok, ke haba khaca, oge me ca he ka betenge.

¹² Ke ame he ke keihâm a kuniny ka mok ge mok ae cap, ke ame he ka oaûʼ ödra hnyi wanbâm ge hmiâ; ke ame he ke keihâm a kuniny ka ta ge hele vat igigili u; ke haba ke keihâm oge me he ka oveseâ ka hnyi ta je ang hia, ke oge me he ka oc hele vat he ka hnu ödra.

¹³ Ame he ka hwâdâ helâe anyik hmonyin, ke oge me heʼ ka osekunâ hudra anyik wathethot, me inye menâ thö: ke ame he ka khanʼ ödra a inya Iehova oge me fuc hnyi anyik ciâ, iny ka hia but ohwâdâ anyik wathethot hudra.

¹⁴ Ke haba khaca, oge me he ka oba wan gam, ke adre me he ka haikongu u, unyin je hnyei igigili u, hnyi hnyimakan tavat hia adre me he unyâm.

¹⁵ Ke e ame he ka hnân haikongoâ me taben ûhiö me hnân nâ me kuko ka je hnyei igigili u, iny ka he ka bi hwaban köu, hnyi hmonyin me wathethot, me hna û hwegiâ: oge hia but ha, inya Iehova:

¹⁶ hnyi ûen oge me he ka kunâ kodra je fanainy hmiâ ae kong, wale hnân ohia, wale oge me he ka kunâ he ka ohiʼ öbun; ke oge me he ka ogânâ hmiâ köbun me thu uciny anyibun jeû;

¹⁷ ke oge me he ka kunâ köbun hmiâ me je meno ae kong, ke adre me he ka ohia lakom; kʼ ame he mok ae cap me dra ka vhenu u; ke oge me he ka oâ köu hele vat: Inya Iehova, oge hia but ha e.