Ezekiela 44 - Iaai Bible 1901 (New Caledonia)

¹ ME e ame ohmetu nya a gethen hnyi homagöule e deiö anyin dok ae kap eû hnyou; ke a hlöng ut.

² Ke haba Iehova ame ha könya, ka habe, Ame he ka hlöng ut homagöule eang, ame ca he hmetu ka khong bi, ke ba at ame he ka dit hnyin, anyin a dit hnyin Iehova, Khongu Isaraela; anyin a wale ame he ka hlöng ut balua.

³ Ke haba than, e ame he ka laba hnyin, a e than bi, me han eling hnyi hnyimakö Iehova; e âme he ka didro a gethen hnyi poretikoiny homagöule, ke e ame he ka didrut hmetu hnyi gethen eling.

⁴ Ke e ame hum nya a gethen hnyi homagöule hnyi hwadro hnyi hnyimakan uma; ke inya oge me wâ, ke wâ bi, ame unöngötö uma umö Iehova ge hmanenangi Iehova: me oge me ta hnyikânâi.

⁵ Ke Iehova ame ha könya, ka habe, Nokon at lö, wâhmakhmetoâ ju, ke wâ thö ge li emâkâm, ke long ge li hnyikönyâm hofuc hia oge me he ka ha köu ge je hna hûna hia ge uma umö Iehova, me ta je hnanyibuiny hia; ke wâhmakhmetoâ ju gethen hnân dit ka hnyi uma, me je gethen hia hnân didrut ûnyi hnyi dok ae kap.

⁶ Ke u me he ka ha ka tavat ûkhin fuc, wale ka lap anyi Isaraela, ka habe, Walang hna ha hnen Than Iehova, ka habe, Lap anyi Isaraela lö, soju je hwakecibun hia ae kong,

⁷ waleji hnyi hnobun hna odilâ je atkanyaua, tavat adre me ca peritomonâ hnyok, ke adre ca peritomonâ unyidra, mʼ adre me he ka hnyi laba hnyi anyik dok ae kap, he ka okongoâ e, wale umök uma, öbun ka hom ok jeû, wale pipikhenya, me dra, ke adre hia but thamuâ hnok hna ûhihinyköu, he ka bi hanen ka hwakecibun ae kong.

⁸ Ke öbun e ca hia but tuö hanymen ge anyik ta je ûnyi ae kap: ke öbun e hia but otilâ tavat tuö anyik huliwa hnyi anyik dok ae kap hobi köbun bi.

⁹ Walang hna ha hnen Than Iehova, ka habe, E ba atkanyua adre ca peritomonâ hnyok, ke adre ca peritomonâ unyin, ame he ka hnyi dit ka hnyi anyik dok ae kap, wale atkanyua at ame tha laba me lakon Isaraela.

¹⁰ Ke haba at Levi waleji adre me ûsâkâûö mönya, hnyi hna he monu hnen at Isaraela, waleji ame he monu gak ka anyidra je idola; me ame ka he bi ka takû ödra anyidra hulo.

¹¹ Ke so bi hamödrin he ka huliwa hnyi anyik dok ae kap, a tavat musi hnyi je homagouleny uma, me bi huliwa eio hnyi uma; ödrin e he ka hlingâ hudiny leû me hut hobi kâu hnyei, ke ödrin e he ka tot hnyi hnyimakan tavat me bi huliwa kodra.

¹² Anyin ödrin e huliwa kodra hnyi hnyimakan je khongudrin, me othôâ lap anyi Isaraela; anyin a wale, oge hia but hai goranyai hnyamok ûcûdrin, haingen Than Iehova, ke ame he bi ka takû ödra anyidra hulo.

¹³ Ke adre me ca he ka hakekeny könya, he ka ânyâ hanymen at bihut könya, me he ka hakekenyâ hnok je hna okabâ, ka ta je ûnyi ae ti kap, ke ame he ka takû ödra anyidra hmehma, me ta je ûnyi ae ikiki adre hia but ânyâ.

¹⁴ Ke so bi oge me he ka wiʼ ödrin hnân tavat tuö hanymen hnyin uma me je huliwainy hia, me ta je ûnyi hia adre me he ka ânyâ hnyin.

¹⁵ Ke haba tavat bihut a at Levi, je laku Zadoka, waleji adre tuö je hanymen hnyi anyik dok ae kap hnyi hna he monu gak hnen lakon Isaraela, me adre me he ka hakekeny könya mʼ adre me huliwa könya; ke adre me he ka tot hnyi hnyimakök he ka hudo könya pipikhenya me dra, haingen Than Iehova;

¹⁶ Adre me he ka dit hnyi anyik dok ae kap, ke adre me he ka hakekeny ka hnyi anyik laulau, mʼ adre me huliwa könya, ke adre me he ka tuö hanymen gak.

¹⁷ Ke ödra ka he ka dit hnyi je homagouleny hnyeule eio, adre me he ka khavâ je ûkhaû lino; ke adre me ca he ka khavâ leûnen mamoe ödra ka huliwa hnyi je homagouleny hnyeule eiö, me eio hnyin uma.

¹⁸ Adre me he ka bicâ je hnabinybak lino, me inâ je trauzes lino; ke adre me ca he ka weikâ ûnyi ame oâ khun.

¹⁹ Ke ödra ka didrut ka hnyi hnyeule eû, wale hnyeule eû hnyou ka tavat, adre me he ka me uny jut anyidra je ûkhaû wale adre me huliwa kâu, me ip hnyi je hnyeule ae kap, me khavâ ke je ûkhaû, mʼ adre me ca he ka okabâ tavat ge anyidra je ûkhaû.

²⁰ Ke adre me ca he ka giâ je hodra, ke adre me ca he ka hna leûnen bödra; adre me he ka sö thibi je leûnen bödra.

²¹ Ke haba khaca, ame ca he ke at bihut ka ijem waina e ka dit ka hnyi hnyeule eio.

²² Ke adre me ca he ka hom safac, me momo adre degec me hnân öiödra: ke adre me he ka hok hlu hnathu a je mâtrân lap anyi Isaraela, me ame ne safac âiân at bihut.

²³ Ke adre me he ka nâ lakeik ge bongon ûnyi ae kap, me ûnyi ae ca kap, me owâhmakhmeto ödra ge ûnyi ae bo kong, me ûnyi ae bo so.

²⁴ Ke haba hnyi je ivinö, me adre me he ka tot me owisa; adre me he ka owisa hoton hnok hna owisa: ka adre me he ka tuö anyik je hnanyibu, me hnok je hna hûna hnyi anyik je bijeû hia adre thu; ke adre me he ka okabâ anyik je sabath.

²⁵ Ke adre me ca he ka he ka at a mokcu wâ adre nye obokongi ödra bi: ke so bi e khanʼ ödra he ka obokongi ödra bi can kamen, me hinyen, me nokon baga me hlu, me liamekeiny me haniny at ae ba âiân.

²⁶ Ke ödra ka hia but obosoâ e, me adre me he ka aû kâu seven ta bong.

²⁷ Ke haba hnyi bong e ame he ka dit ka hnyi dok ae kap, ka hnyi hnyeule eiö he ka huliwa hnyi dok ae kap, me e ame he ka hudo hudiny anyin hulo, haingen Than Iehova.

²⁸ Ke ame he ka hu idra: ke inya ang idrin: ke öbun e ca he ka bi hwajekhöûdrin hnyi Isaraela, ke inya ang jekhoûdrin.

²⁹ Adre me he ka an hudiny han, me hudiny hulo, me hudiny monu; ke hobi kodra ta je ûnyi hia adre me naûâ hnyi Isaraela.

³⁰ Ke hobi kâu tavat bihut je ûnyi a bân hnyi ta je wan a bâniny ta je ûnyi hia, me ta je bwihlanyin hia ta je ûnyi hia öbun e ânyâ me bwihlany: öbun e he ka ham minya je falawa a bân adre tiga op ka at bihut, me me mokut hon umöbun je uma hnahic.

³¹ Ame ca he at bihut ka hnyi an ûnyi a mok hwege, me ûnyi adre oloû kia, ame ne meno ame gâ ame ne meno ame he.