Ezekiela 4 - Iaai Bible 1901 (New Caledonia)

¹ KE haba u, nokon at, u me he ka hom veto kânâ ae lau me ip e hnyi hnyimâkâm, ke op ju hon e taun Jerusalema:

² ke u me he ka thelöng e ge vat, me op cicö e je taben vat, me hlu kânâ cicö e; me ânyâ minya je hunuma cicö e, me ip igigilo cicö e je ûnyi hnân thö.

³ Ke u me he ka hom fao ae lau, me ip e hnân hak fao hnyi wanbâm me taun; ke u me hnyimâkâm kâu, ke adre me he ka igigilo e, ke u me he ka thelöng e. Wale thibi e ame he ka bi haten ka lap anyi Isaraela.

⁴ Ke u me he ka mokut hnyi ke keihâm a mem, me ip hon e hulöiny lap anyi Isaraela: haba ûseiny je bong u me he ka mokut hnyin e, ame he ka tabö u anyidra hulo.

⁵ Ke oge hia but ip köu je hunainy anyidra hulo, hoton ûseiny je bong, wale theri haded me nainte ûseiny je bong: me ame he ka takû u hulo anyin lap anyi Isaraela.

⁶ Ke haba khaca u ka umö thö e, me u me he hmetu ka mokut hnyi ke keihâm a metâm, ke ame he ka takû u hulo anyin lap anyi Juda: fâte je bong, oge me hia but ip köu ke bong hnân ke huna.

⁷ Ke u me he ka hnyimâkâm ka Jerusalema adre igigilo, me vhec benyin ânyâm ûkhaû; ke u me he ka perofeta ûcon.

⁸ Ke wâ bi, oge me cö u ge tö, ke u me ca he ka hwio ge ke keihâm ka hnyi ke keihâm, ke ne o but u je hia but umö je bonginy igigilo.

⁹ Ke u me he ka hok hwit me bali, me owi, me lentil, me dokana, me kesem, hobi köu, me tha ip hnyi kaia a khaca, ke u me he ka bi âm; hoton ûseiny je bong u me he ka mokulec ke keihâm, wale theri haded ke nainte je bong, u me he ka an e.

¹⁰ Ke haba âm u me he ka han, ame he ka he hoton tulut, twente je sekel hnyi bong: u me he ka an e hnyi ke ûen me ke ûen.

¹¹ Ke u me he ka ijem köiö hoton tulut, hanen a siksiny hin: u me he ka ijem hnyi ke ûen me ke ûen.

¹² Ke u me he ka an e helâ me je ong areto bali, ke u me he ka thân e hnyi hnyimakodra ge tatet ame he but ûnyi ge at.

¹³ Ke Iehova ame ha, ka habe, Ame he lakon Isaraela ka an helâe ö ʼdra jeû ae bokong hnyi je hnyei oge me he ka obʼ ödra ka hnyin.

¹⁴ Me oge me ha, ka habe, Ekölö Than Iehova! wâ bi, adre me ca obokongu nya: anyin oge me ca hnyi an ûnyi ame ka hamen mok, ke hna oloû kia ge meno, hwân kʼ iny tiga ûhnyûkong ke ne o but walang ang; kʼ ame ca hnyi dit utiö ae ikiki ka hnyi hnyimök.

¹⁵ Me e ame ha könya, ka habe, Wâ bi, inya oge me ham köu tiny kau hwaban tiny at, ke u me he ka bi âm hnen e.

¹⁶ Ke e ame ha könya, ka habe, Nokon at, wâ bi, oge me he ka thu uciny han hnyi Jerusalema: ke adre me he ka han ge tulut, ke hom ûhnyûkongo; ke adre me he ka ic ge tulut me hlohlo:

¹⁷ me me ba but jeû me köiö gadra, mʼ adre me ûlâiâköuâ, me oaûâ but hnyi anyidra hulo.