Ezekiela 3 - Iaai Bible 1901 (New Caledonia)

¹ KE e ame ha könya, ka habe, Nokon at lö, an ju ûnyi e u me wâ, an ju tusi ang adre vhec, ke hu thö, me fuc ka lap anyi Isaraela.

² Me oge me memang ut, me e ame haök ge tusi adre vhec.

³ Ke e ame ha könya, ka habe, Nokon at lö, ip ju eû hnyi hnyekom, ke öunöngötâ thö hnyekom ge tusi e adre vhec wale oge ham köu. Me oge me an e; ke haba hnebwiainy hnyi hnyimök me helâ me hani.

⁴ Ke e ame ha könya, ka habe, Nokon at lö, he thö ka lap anyi Isaraela, me ha kodra hok ta je hofuc.

⁵ Anyin adre ca kunö u ka hnyi hnyei ae atkanyua ifucidra, me hmak ifucidra, ke ka lap anyi Isaraela;

⁶ ca ka hnyi je hnyei ae se ae atkanyua ifucidra, me hmak ifucidra, ke ca khanö u ifucidra. E hnathu, oge ne kunö u kodra, me adre me ne he ka ling u.

⁷ Ke so bi ame ca he lap anyi Isaraela he ka ling u; anyin adre me höcö ling nya: anyin a tavat hwege hnyimakan me khot hnyekudra hia lap anyi Isaraela.

⁸ Wâ bi, oge hia but ohwegiâ hnyimâkâm cicö hnyimakodra, me barem cicö je baridra.

⁹ Oge hia but wia barem me me helâ me samira ae hwege hon oût: ca ot bi gadra, ke ca öbubuny ge je hnyimakodra, anyin a lap ûkhin fuc.

¹⁰ Ke e ame ha könya, ka habe, Nokon at lö, haba hok ta je hofuc hia oge me he ka ha köu, ip ju eû hnyi hnyekom, me long ju ge li hnyikönyâm.

¹¹ Ke he thö ka je bâ wale tavat aten em hnyei, me fuc kodra, me ha kodra, ka habe, Walang hna ha hnen Than Iehova; adre me ne he ka long, ame ne ba.

¹² Ke haba hanu ame köp nya göranyai, ke oge me long hnyi hotuk hofuc hwawadring ae hwege, ame ha, ka habe, E so he ka haisoâ hmanenangi Iehova ûnyi hnyi hnen.

¹³ Ke oge me long hwan je labenyin je ûnyi ae möt ame ûsetu, me hwan je waengen cici ödrin, wale hmuhmuiny hwege wadring.

¹⁴ Me hanu ame köp nya göranyai, me hum nya: ke oge me he but, ke iny vec me hmonyin, ke e hwege hnyamö Iehova huk.

¹⁵ Me oge me o but ka ta je bâ hnyi Tel-abib, tavat adre me laba hnyi wagewe Kebara, me ka hnyi dok adre me labâ; me oge me tha laba hmak mödra hnyi seven ta bong.

¹⁶ Ke a um do je bong a seven, me ame o but könya hofuc ho Iehova, ka habe,

¹⁷ Nokon at lö, oge hia but otilö u hnân at tue hobi kâu lap anyi Isaraela: anyin a wale long ju hofuc ûnyi hnyi hnyimök, me koû kodra ûnyi gak.

¹⁸ Iny ka ha ka at ae kong, ka habe, U me he ka mok; ke u je ca koû kâu, ke ca fuc he ka khû hnyikonyen at ae kong ûnyi hnyi deny gethen ae kong me me möt; awe, ame he at ae kong ka mekiny anyin hulo; ke oge me he bi nya ka elâm dren gam.

¹⁹ Ke u je ne khû hnyikonyen at ae kong, kʼ ame ca hmetu bi ûnyi hnyi anyin hulo me deny gethen ae kong, me ame he ka mekiny anyin hulo, ke u me he bi ka möt.

²⁰ Ke haba khaca, ame ne hmetu thö at ae wisa ûnyi hnyi hwakecin ae wisa, me ânyâ hulo, ke inya oge me ip ûnyi hnân öthöâ hnyi hnyimakan, me e ame he ka mok: e ame he ka mekiny anyin hulo, kʼ adre me ca he ka ûnykûme hwakecin ae wisa e ame ânyâ, anyin a u je ca koû kâu; kʼ oge me he bi nya ka elâm dren gam.

²¹ Ke so bi u je ne khû hnyikonyen at ae wisa, me me ca kong bi at ae wisa, kʼ ame ca kong bi, me e ame he bi ka möt, anyin a e ame kap hnödra hna khû hnyikonyen; ke u me omeli u bi.

²² Ke eling huk hnyamö Iehova: ke e ame ha könya, ka habe, Todrö, he thö ka hnyi dok ae tha hon, me oge me he ka fuc eling köu.

²³ Me oge me tot me be ka hnyi dok ae tha hon: ke wâ bi, ame tot eling hmanenangi Iehova, helâ me hmanenang waleji oge me wâ hnyi wagewe Kebara: me oge me ta ju hnyikânâi.

²⁴ Me ame dilic nya hnen hanu me otilâ li cak; me ha könya, ka habe, He thö ka hlöng bi hwanumâm hnyi umâm uma.

²⁵ Ke haba u, nokon at, wâ bi adre me he ka ip hom je tö hnân ca, kʼ adre me he ka cö u kâu, ke u me ca he ka didrut kodra:

²⁶ ke oge me he ka okeceâ bohmâm ka hnyi ecngödrâm, me u me he ka hum, ke u me ca he ka thawʼ ödra: anyin a ödra lap ûkhin fuc.

²⁷ Ke iny ka he ka fuc köu, me oge me he ka khong hnyimâm, ke u me he bi ka ha kodra, ka habe, Walang hna ha hnen Than Iehova, ka habe, Haba at ame long, long ju; ke haba at ae höcö, höcö ju: anyin a ödra lap ûkhin fuc.