Ezekiela 16 - Iaai Bible 1901 (New Caledonia)

¹ KE ame o but könya hofuc ho Iehova ame ha, ka habe,

² Nokon at lö, omanenâ thö ka Jerusalema ta je ûnyi ae ikiki hnyin.

³ Ke ha thö, ka habe, Walang hna ha hnen Than Iehova ka Jerusalema, ka habe, Haba dok u je kû hnyin, ke dok adre hnöku u hnyin, me ûnyi hnyi hnyei Kanana; at Amora kâmâm, ke momo Heth hinyâm.

⁴ Ke haba hna hnöku u, haba hnyi bong adre hnöku u hnyin, me adre ca subâ bibikâm, ke adre ca ösûö u hnyi köiö me u me so; ke adre ca botru u ge sâlt, ke adre ca lan u ge mano.

⁵ E ba at a betenge gam me ânyâ hobi köu ta je ûnyi me betenge gam: ke adre khûö a hnyi utkânâ, anyin adre hûkhötiâ unyâm hnyi bong adre hnöku u hnyin.

⁶ Ke hnyi ûen oge me he unyâm, me ö u me u me seset hnyi drâm, me oge me ha köu, ka habe, Eja ke ne u je ne seset hnyi drâm, möt dö; eke, oge me ha köu, ka habe, Eja ke ne u je ne seset hnyi drâm, möt dö.

⁷ Oge me osehiö u helâ me vongon hnyot, me u me se hia but, me gan dut, ke u je o ka hnyi bongon ae ti mec; ame ku li bâsâm, ke beû but leûnen bâm; ke so bi ehac u je he thu me ba ûkhaû:

⁸ ke hnyi ûen oge me he unyâm me ō u, me wâ bi, ûen betenge ânyâm bong, ke oge me lau hom obiny anyik ûkhaû, me khaûö u at ame mokut thu: eke, oge me khemanyin köu, me ûhihinyköu möu, haingen Than Iehova, ke u anyik bi.

⁹ Ke oge me osûö u ge köiö; eke, oge me kot degecâ drâm hnyi unyâm, me hû u ge wakaco.

¹⁰ Ke oge me okhaûo u ge mano adre tibet omecâ, me odilâ li hnyeûcam hnyi unen takesa, ke oge me oweikö u ge lino, me khaûö u ge silek.

¹¹ Ke oge me otheibi u ge je omecin, me inâ li waen hnyi li benyâm, me ovekinyi u ge ong sacen.

¹² Ke oge me ip otru hnyi hnyingoiâm, me li theibiny hnyiköny hnyi li hnyikönyâm, me obicö u ge korona ae hmanenang.

¹³ Adre me theibi u helâe ge gol me sileva; ke haba khaûâm, me lino me silek, me mano adre me tibet omecâ; ke haba âm jeû, me falawa ae so, me hani, me wakaco: ke u ti hmanenang hmonyin, ke u je so tot ke ne o but bongon than.

¹⁴ Ke ame lung ânyâm hmanenang ka hnyi je hnyei; anyin ae bekhot ut e, ge bongon than gak waleji oge me ip hom, haingen Than Iehova.

¹⁵ Ke u je gejon ânyâm hmanenang, me bi ûnyi monu ge ânyâm lung, me hingâlâ ânyâm je bi ûnyi monu kodra hia adre me gethen unyâm; ka anyin dut.

¹⁶ Ke u je hom ânyâm ke je ûkhaû me ânyâ hobi kâu je dok ae gorany ae ve bongon bi, me bi ûnyi monu eling: ame ca he ka o but ta je ûnyi helâe, kʼ ame ca he hmetu ka helâe.

¹⁷ Ke u je hom je hmanengâm gol me sileva gak, waleji oge me ham köu, me ânyâ je hna theâtâ at, mʼ u me bi ûnyi monu mē;

¹⁸ ke u je hom ânyâm je ûkhaû adre omecâ, me khaûʼ ödrin, me ip hnyi hnyimaködrin anyik wakaco, me anyik utö ae bo so.

¹⁹ Ke haba jeû oge me ham köu, wale falawa me wakaco me hani, waleji oge me ham me âm, me u je ip hnyi hnyimaködrin, me hnân bo so, ke e hnathu e; haingen Than Iehova.

²⁰ Ke haba khaca, u je hia but hom lakom obaga me wahlu, waleji u je hnoko hobi könya, me hudi ödra ködrin me hnân ö ʼdrin. Hawa, ûnyi ae ûhnyûkong hnâm je hna bi ûnyi monu,

²¹ mʼ u me hlingâ lakuk, me hnʼ ödra he ka he hnyi wanben meic ködrin?

²² Ke haba hnyi hwakecâm ae ikiki me ânyâm je bi ûnyi monu hia, me u je ca ûnykûme je bonginy hlu a u, hnyi ûen ae ba ûkhaû, ke u me mokut thu, me seset hnyi drâm.

²³ Ke hwaban ânyâm ta je hulo hia, (ekölö, ekölö gam! haingen Than Iehova,)

²⁴ me u je op dok ae nua bi hobi köu, me ânyâ hobi köu ke dok ae gorany hnyi ta je gethen hia thithö.

²⁵ U je hia but op ânyâm je dok ae gorany, hnyi je hna saû hia, me oikikiâ ânyâm hmanenang, ke u je öûsakâûöâ li hnyeûcam ka tavat adre me gethen unyâm, me osehia hnâm hna bi ûnyi monu.

²⁶ Ke u je hia but bi ûnyi monu me tavat Aigupito, tavat adre me laba hakekenyi u, tavat ae gan hmaidro; ke u je hia but osehia hnâm je hna bi ûnyi monu, me ohmö-nyini nya.

²⁷ Anyin a wale wâ bi, oge hia but hai hnyamok hom, me oûnyûkongoâ âm jeû, me hnö u ka hnyi weny tavat adre me hûkötiö u, je wahluiny Filisiti tavat adre me hmehma ge je hwakecâm ae ikiki.

²⁸ U je hia but minya bi ûnyi monu me at Asuria, anyin a u me ca hmâ; eke, u je hia but bi ûnyi monu mödra, ke so bi u je ca sekon bi.

²⁹ Ke haba khaca u je hia but osehia hnâm hna bi ûnyi monu hnyi hnyei Kanana, ke ne o but hnyi Kaledaia; ke so bi ame ca sekom hnen e.

³⁰ Nakaem ge sënyin hnyi hnyekom, haingen Than; Iehova, anyin u me ânyâ ta je ûnyi hia eling, huliwa anyin momo ae hwege hnyimen, at ame bi ûnyi monu;

³¹ ke anyin a u je op ânyâm dok ae nua hnyi je hna saû hia, me ânyâ ânyâm dok ae gorany hnyi je gethen hia; ke ca ûcû bi me momo hnyi gethen u bi, u me hûkotiâ hwaban.

³² U momo at ame bi ûnyi momu! at ame weny je atkanyua ke degec bi âiân!

³³ Adre me ham je bwihlany ka je momo hia hnyi gethen: ke u bi, u me ham ânyâm je bwihlany ka je lawem hia, me bi hwaban kodra, mʼ adre me o köu hnyi je ke keihen hia hnyi hnâm je hna bi ûnyi monu.

³⁴ Ke ve bongom bi me ke je momo hnyi bi ûnyi monu a u, ke ba at ame he köu he ka bi ûnyi monu: ke u je bi hwaban, ke adre me ca bi hwaban köu, anyin a wale, e ke bongom bi.

³⁵ Anyin a wale, momo hnyi gethen lö, long je hofuc ho Iehova:

³⁶ Walang hna ha hnen Than Iehova, ka habe, Can adre me hingâlâ ikiki a u, ke manen dut unyâm ge hnâm hna bi ûnyi monu me je lawem; ke can je idolainy hia ânyâm je hwakecin ae ikiki, ke can dren lakom, waleji u je ham ködrin;

³⁷ anyin a wale, wâ bi, oge me he ka ûkhacaköu je lawem hia, waleji u je ûsenyinköu mödra, me tavat hia waleji u je wem, tha ödra me tavat hia waleji u je hûkotiâ; oge me he ka ûkhacaköu ödrin ûcom igigilo, me omanenâ unyâm kodra, mʼ adre me he ka wâ unyâm hia.

³⁸ Ke oge me he ka bi hwaban köu, helâ me hna bi hwaban ka omomo, hnyat adre me bi ûnyi monu, me hingâlâ dra: ke oge me he ka oâ köu dren wathethot me ciâ.

³⁹ Ke oge me he ka hnö u ka hnyi hnyamödrin, kʼ adre me he ka thö umâm uma ae nua, me hagutâ ânyâm je dok ae görany; ke adre me he ka un dö je khâuâm, me hom je ohmanenangâm ae meic: ke adre me he ka hnö u ke ba ûkhaû ke ba ûnyi gam.

⁴⁰ Ke adre me he ka oâ köu deö at, ko adre me he ka lûö u ge veto, me dâoâ u ge je hele vat.

⁴¹ Ke adre me he ka thong degecâ umâm je uma ge meic, me bi hwaban köu hnyi hnyimakan omomo ae se hia; kʼ oge me he ka thao u mʼ u me ca he hmetu ka bi ûnyi monu, ke u me ca he hmetu ka hawâ at ge hwaban.

⁴² Helâe oge me he ka bi obiny anyik hmönyin köu, ke ame he ka hwio gam hnok hna ciâ, ke oge me he ka menâ, ke oge me ca he hmetu ka hmönyin.

⁴³ Anyin a u je ca hia but ûnykûme je bonginy hlu a u, ke u je oveci nya ge ta je ûnyi hia eling, anyin a wale, wâ bi, oge me he ka bi hwaban hwakecâm ka hnyi bâm, haingen Than Iehova: ke u me ca he ka ânyâ hwakecâm ae ikiki eling hon ta je hwakecâm ae ikiki hia thithö.

⁴⁴ Wâ bi, ame he tavat hia adre me vejecâ ka vejeci u, me ha, ka habe, E tha ûcû hinyen me nokon hlu.

⁴⁵ U hlu nokon hinyâm, at ame hûkotiâ âiân me lakon; ke u hanen je liamekeiny möu, tavat adre me hûkotiâ laöiödrin me je lakudrin: haba hinyöbun, me momo Heth, ke at Amora kamöbun.

⁴⁶ Ke haba tuhâm Samaria, e me je lakon adre me laba hnyi ke keihen a men: ke haba kem a wakeiat at ame laba hnyi ke keihen a metâm, jia Sodoma me lakon wahlu.

⁴⁷ Ke so bi u je ca vheno dedra je gethen, me ânyâ hoton hwakecidra ae ikiki; ke so bi helâke ame ûnyi ae ûhnyûkong eling, ke u je ânyâ hwakecin ae kong hmönyin hudra hnyi dem je gethen hia.

⁴⁸ Haingen Than Iehova, ka habe, Kia inya inya a gʼ ame ca hia but ânyâ Sodoma, a liamekeiny möu, e me lakon wahlu, helâji me hnâm hna ânyâ, u me lakom wahlu.

⁴⁹ Wâ bi, walang hulo anyi Sodoma a liamekeiny möu; haba eû hnyin e me lakon wahlu, bi gan, me gan hmâ jeû, me laba monu me sot; ke e ame ca hadruâ je hna ovecâ me tavat theduoc.

⁵⁰ Ke adre me hop, me ânyâ hwakecin ae kong hnyi hnyimakök: anyin a wale oge me hum ödra helâji me hnok hna wâ.

⁵¹ Ke haba Samaria ame ca hia but ânyâ hafiny ânyâm hulo; ke u je osehia je hwakecâm ae ikiki hudra, me haiwisa je liamekeiny möu hnyi ta je hwakecâm ae ikiki waleji u je ânyâ.

⁵² Ke haba u, hamâm he ka hom ânyâm hmehma, anyin a u je hia but haiwisa je liamekeiny möu; be ödra wisa bi hom, can ânyâm ta je hulo waleji u je ânyâ ae gan hmâ hudra: eke, u me he ka hlohlo, me hom ânyâm hmehma, anyin u je hia but haiwisa je liamekeiny möu.

⁵³ Ke oge me he ka ohmetu ödra tavat bâ, at Sodoma tavat bâ me je lakon wahlu, me at Samaria tavat bâ me lakudra wahlu, me je bâ unyidra:

⁵⁴ mʼ u me he ka hom ânyâm hmehma, me hmehma hia ge hnâm hna ânyâ, waleji u je otubweli ödra.

⁵⁵ Ke ame he ka hmetu thö je liamekeiny möu, wale Sodoma me lakon wahlu ka idrin a bân, ke ame he Samaria me lakon wahlu ka hmetu ka idrin a bân, ke haba u me lakon wahlu öbun e ka hmetu ka ibun a bân.

⁵⁶ Ke u je ca haiö Sodoma a liamekeiny möu ge hnyimâm hnyi bonginy ânyâm bi gan:

⁵⁷ ödra ka tiga ca omanenâ ânyâm hulo, helâ me ûen hna haikongo hnen wahlu laku Suria, mʼ ödra hia thithö igigilo e, wahlu lakon at Filisiti, hnyat adre me hûkotiâ u igigilo.

⁵⁸ Adre me hia but bi hwaban köu hwakecâm ae ikiki me kong, haingö Iehova.

⁵⁹ Anyin a walang hna ha hnen Than Iehova, ka habe, Oge me he bi nya ka ânyâ köu helâ me hnâm hna ânyâ, anyin a u je hûkotiâ hna khemanyin me thamuâ ûhihinyköu.

⁶⁰ Ke so bi oge me he ka ûnykûme waleji ge hnok hna ûhihinyköu möu hnyi ûen a u hlu, ke oge me he ka ohmâ hobi köu ûhihinyköu a nyiele balua.

⁶¹ Me u me be bi ka ûnykûme je hwakecâm me hmehma, u ka he ka kap je liamekeiny möu, wale je atö me je wakeiat: ke oge me he ka ham ödra köu hnân lakom, ke ca hoton bi ânyâm ûhihinyköu.

⁶² Ke oge me he ka ohmâ anyik ûhihinyköu möu; me u me he ka wâ a inya Iehova:

⁶³ mʼ u me he ka ûnykûme, me hlohlo, me ca he hmetu ka fuc, can ânyâm hmehma; iny ka hia but thang degecâ hnâm hna ânyâ hia thithö, haingen Than Iehova.