Ezekiela 13 - Iaai Bible 1901 (New Caledonia)

¹ KE ame o but könya hofuc ho Iehova ame ha, ka habe,

² Nokon at lö, perofeta thö ûcon ta je perofetainy Isaraela a tavat adre me perofeta, ke ha kodra tavat adre me perofeta ûnyi eû hnyi je hnyekudra bi, ka habe, Long ju öbun hofuc ho Iehova;

³ Walang hna ha hnen Than Iehova, ka habe, Ekölö ge je perofeta ae monu, tavat adre me hnu hoton ta je hnyekudra bi, ke ba ûnyi adre me wâ!

⁴ Isaraela lö, haba ânyâm je perofeta me helâke me je alopeiny je dok ae hnyot.

⁵ Öbun e ca hia but ölö ka hnyi je dok ae khekhe, ke öbun e ca okhötâ hna up haginy lap anyi Isaraela, me me tot hnyi vat hnyi bong bongu Iehova.

⁶ Adre me hia but wâ ûnyi ae ûnyi baû, ke bi khong thoi, me ha, ka habe, Haingö Iehova; ke ame ca kunʼ ödra ga Iehova: ke adre hia but kunâ tavat he ka geju a ga me he ka hwâdâ but hofuc.

⁷ Hawa, öbun e ca wâ hna omanenâ ae ûnyi baû, me bi khong thoi, anyin öbun e ha, ka habe, Hö Iehova; ke so bi oge ca fuc bi?

⁸ Anyin a wale walang hna ha hnen Than Iehova, ka habe, Anyin a Öbun e hia but ha ûnyi ae ûnyi baû me wâ je thoi, awe, wâ bi, e ve inya möbun haingö Iehova.

⁹ Ke ame he hnyamok ka ve e me je perofeta tavat adre me wâ ûnyi ae ûnyi baû, me bi khong thoi; adre me ca he ka hnyi hanen ûhnenamö anyin lakeik, ke adre me ca he ka sihnalimidra hnyi tusiny lap anyi Isaraela, ke adre me ca he ka o ka hnyi hnyei Isaraela; ke ame he ka khanʼ öbun a inya Iehova.

¹⁰ Anyin a wale, ke can minya anyin adre me hia but omono lakeik me ha, ka habe, E hnahic ut; ke ca hnahic bi; ke hnyi ûen ame up veto ke at, wâ bi, adre me botru ge dröu adre ca huliwan:

¹¹ ha thö ka tavat adre me botru ge dröu adre ca huliwan, ka habe, E ame he ka kolu: ame he ka ta we ae gan; me haba öbun, je veto we wahma, öbun e he ka kolu; ke ame he ka kia e hnen weneû.

¹² Wâ bi, e ka û but hna up veto, hawa, adre me ca he ka ha köbun, ka habe, Ewa tap dröu waleji öbun e botro e?

¹³ Anyin a wale, walang hna ha hnen Than Iehova, ka habe, Oge me he bi nya ka kia e ge weneû hnyi anyik wathethot; ke ame he ka gan we hnyi anyik hmonyin, me je veto we wahma hnyi wathethot he ka ohia e.

¹⁴ Ke oge me he ka kia hna up veto öbun e botro ge dröu adre me ca huliwan, me hagutâ e hnyikânâi, me me manen dut taben: ke e ame he ka ū, ke ame he ka hiʼ öbun hnyin e; ke öbun e he ka wâ a inya Iehova.

¹⁵ Helâe oge me he ka ohwâdâ anyik wathethot hon hna up veto me tavat adre me botro e ge tap dröu adre ca huliwan; ke oge me he ka ha köbun, ka habe, E hia but hna up veto, me tavat adre me botro e;

¹⁶ wale je perofetainy Isaraela tavat adre me perofeta ga Jerusalema, me wâ hobi kâu e je hna omanenâ ae hnahic ke ba bi hnahic, haingen Than Iehova.

¹⁷ Ke haba u, nokon at lö, hnyimâkâm dö ka omomo wale hnyi em hnyei, tavat adre me perofeta ûnyi hnyi je hnyekudra bi; ke u ma perofeta thö ûcûdra,

¹⁸ me ha, ka habe, Walang hna ha hnen Than Iehova, ka habe, Ekölö ge omomo hnyat adre me tibet taben je bokhulubenyidra hia, me ânyâ je hnabinybak hobi kâu je dö hia, mʼ adre me töuhneweny tavat! Hawa, öbun e he ka noc tavat aten ik hnyei, me omelo tavat hobi köbun bi?

¹⁹ Ke öbun e hia but okongu nya unyin lakeik hwaban je hnyam bali, me je ujeû, he ka hlingâ tavat a ca hnân bi mok, me omelo tavat a ca hnân bi möt, hnen anyibun thoi ka ta je atök tavat adre me long thoi.

²⁰ Anyin a wale, walang hna ha hnen Than Iehova, ka habe, Wâ bi, e ve inya me taben je bokhulubenyibun, waleji öbun e töuhneweny tavat eling, me alin ödra, ke oge me he ka hûgûnʼ ödra ûnyi hnyi je hnyamöbun; ke oge me he ka uny tavat, waleji öbun e noc, waleji tavat adre me alen.

²¹ Ke oge me he ka kia je hnabicöbun, me omelo lakeik ûnyi hnyi hnyamöbun, ke adre me ca he hmetu bi ka hnʼ ödra hnyi je hnyamöbun he ka noc; ke ame he ka khanʼ öbun a inya Iehova.

²² Anyin a öbun e hia but ovecâ hnyekon at ae wisa ge je thoi, waleji oge me ca ovecâ; me ohwegiâ hnyamen tavat ae kong, me me ca he ka hmetu bi ûnyi hnyi deny gethen ae monu, me me möt:

²³ anyin a wale öbun e ca he hmetu ka wâ ûnyi ae ûnyi baû, me bi khong: ke oge me he ka omelo lakeik ûnyi hnyi hnyamöbun: kʼ ame he ka khanʼ öbun a inya Iehova.