Ezekiela 12 - Iaai Bible 1901 (New Caledonia)

¹ KE ame o but könya hofuc ho Iehova, ame ha, ka habe,

² Nokon at lö, u je laba hnyi wanben lap ae ûkhin fuc, tavat ae hu li ecmak hnân bwele, kʼ adre me ca bwele bi, ke hu li hnyikönyödra hnân long, kʼ adre me ca long bi; anyin a ödra lap ae ûkhin fuc.

³ Anyin a wale, nokon at lö, u ma penapena ta je ûnyi hnân sukhöûnâ, ke sukhöûnâ but hnyi lany hnyi hnyimakodra; ke u me he ka he thö ûnyi hnyi hnâm ka hnyi ke dok hnyi hnyimakodra: eja ke ne ödra lap ae ûkhin fuc, me adre ne he la ka ûnykûme.

⁴ Ke u me he ka sukhöûnâ ânyâm ta je ûnyi hnyi lany hnyi hnyimakodra, helâke me ta je ûnyi hnân sukhöûnâ: ke haba u, me u me he ka didrut hnyi sahac hnyi hnyimakodra, helâke me ûhedra tavat ka hnyi ke hnyei.

⁵ Thö moko but hna up uma hnyi hnyimakodra, ke sukhöûnâ hnyi gethen eling.

⁶ U me he ka vadren ta je ûnyi e hon bajebenyâm hnyi hnyimakodra, me sukhöûnâ but hnyi lit; ke u me he bi ka tube hnyimâkâm, mʼ u me ca wâ bi kânâ: anyin a oge hia but ip u hnân haten ka lap anyi Isaraela.

⁷ Me oge me ânyâ helâ me hna hûna könya: ke oge me sukhöûnâ hnyi lany anyik thatûnyi, helâke me ta je ûnyi adre me hom ka hnyi ke dok, ke hnyi sahac oge me thö hna up uma ge li hnyamok; oge me hom hnyöû ai hnyi lit, ke oge me vadren hon bajebenyik hnyi hnyimakodra.

⁸ Ke haba hnyi hnyomakatu, me ame o könya hofuc ho Iehova ame ha, ka habe,

⁹ Nokon at lö, hawa, ame ca ha bi köu hnen lap anyi Isaraela, lap ae ûkhin fuc, ka habe, Ieû u me ânyâ?

¹⁰ Ha thö kodra, ka habe, Walang hna ha hnen Than Iehova, ka habe, Haba hok ang, ûnyi ge than Jerusalema, me lap hia anyi Isaraela hnyi wanbödra.

¹¹ Ha thö, ka habe, Inya ang haten köbun: adre me he ka ânyâ kodra helâ me hnok hna ânyâ: adre me he ka he ka hnyi ke hnyei, ka bâ.

¹² Ke haba than unyidra e ame he ka vadren hon abenyin hnyi lit, me didrut: adre me he ka thö moko hna up uma, he ka sukhöûnâ hnyi gethen e: e ame he ka tube hnyimakan me me ca wâ bi kânâ ge ecmak.

¹³ Ke oge me he ka lau ûtök ert hon e, ke e ame he ka hnok hnyi anyik hnewe: ke oge me he ka hom e Babulona ai, ka hnyi hnyei at Kaledaia: ke so bi, e ame ca he ka wâ e, ke e ame he ka mok e.

¹⁴ Ke oge me he ka khûkhûâ lahien hia igigilo e, me anyin je deö vat hia, ka hnyi je ang hia; ke oge me he ka oc hele vat he ka hnu ödra.

¹⁵ Ke adre me he ka wâ a inya Iehova, iny ka he ka ovesei, ödra unyin ta je hnyei, me ve obʼ ödra ka hnyi je hnyei.

¹⁶ Ke oge me he ka bi koluidra ae wakhalet ûnyi ge hele vat, me hmiâ, me mok ae cap; mʼ adre me he ka ha gaga anyidra ta je ûnyi ae ikiki hia unyin ta je hnyei adre me he ka he ka hnyin; ke adre me he ka wâ a inya Iehova.

¹⁷ Ke ame o but könya hofuc ho Iehova ame ha, ka habe,

¹⁸ Nokon at lö, an ju âm jeû me ö bubuny, me ijem belâm utköiö me ot, me hom ûhnyûkongo;

¹⁹ ke ha thö ka tavat aten hnyei, ka habe, Walang hna ha hnen Than Iehova, ha thö ge aten Jerusalema, me hnyei Isaraela, ka habe, Adre me he ka an ö ʼdra jeû me hom ûnyûkongo me ijem belidra utköiö me lâiâ, me me hia but ta je ûnyi hnyi iny hnyei, can ûkonguny anyin tavat adre me labâ e.

²⁰ Ke ame he ka iny wau ta je taun adre me labâ, ke ame he ka ba aten hnyei; ke ame he ka khanʼ öbun a inya Iehova.

²¹ Ke ame o but könya hofuc ho Iehova ame ha, ka habe,

²² Nokon at lö, ieûji öbun e vejetâ hnyi hnyei Isaraela ka habe, Adre me hobeûâ but je bong, kʼ ame ca hwâdâ but je hna omanenâ?

²³ Anyin a wale, ha thö kodra, ka habe, Walang hna ha hnen Than Iehova, ka habe, Oge me he ka bi obiny vejec eling, kʼ adre me ca he hmetu ka vejecâ e hnyi Isaraela; ke ha thö kodra, ka habe, E hakekeny jut je bong, ke ihwâdâiny ta je hna omanenâ hia.

²⁴ Anyin ame ca he hmetu ka hu omanenâ ae ûnyi baû, me bi khong ae iyawo hnyi wanben lap anyi Isaraela.

²⁵ Anyin a inya Iehova; oge me he bi nya ka fuc, ke haba hofuc oge me he ka ha me ame he bi ka hwâdâ; ame ca he hmetu ka bec: anyin oge me he ka ha hofuc hnyi bongubun je bong, lap ae ûkhin fuc, me ohwâdâ e, haingen Than Iehova.

²⁶ Ke ame o but könya hofuc ho Iehova, ame ha, ka habe,

²⁷ Nokon at lö, wâ bi, ame ha lap anyi Isaraela, ka habe, Haba hna omanenâ e ame wâ, me hobi kâu je bong ae tiga sâkâû, ke e ame perofeta ge ta je ûen nyiele.

²⁸ Anyin a wale ha thö kodra, ka habe, Walang hna ha hnen Than Iehova, ka habe, Ame ca he ka bec hmetu bi hok ta je hofuc hia, ke haba hofuc oge me he ka ba, me ame he ka hwâdâ, haingen Than Iehova.