Ezekiela 11 - Iaai Bible 1901 (New Caledonia)

¹ KE haba hanu ame köp nya göranyai me hum nya ka hnyi homagouleny uma umö Iehova e jimeio, hnyi hnyimakan e deiö: ke wâ bi, wale hnyi homagöule ödrin twente faiv tavat; ke oge me ō Jazania nöku Azura hnyi wanbödrin, me Pelatia nöku Benaia, li taben tavat.

² Ke e ame ha könya, ka habe, Nokon at lö, wale tavat adre me vak hulo, me ûhnenamö iyawi; hnyi taun ang:

³ haingödru, ka habe, E ca hakekeny bi ûen he ka op uma: haba taun ang, me helâ me öt, ke ota ang ta je utiö.

⁴ Anyin a wale perofeta thö ködru, nokon at, perofeta thö.

⁵ Ke ame o but könya hanu Iehova, ke e ame ha könya, ka habe, Ha thö, ka habe, Walang hna ha linö Iehova, ka habe, Lap anyi Isaraela lo, walang hobun hofuc; anyin a oge me wâ but ta je ûnyi ame kû eû hnyi je hnyekubun.

⁶ Öbun e hia but osehia je hanibun hnyi taun ang, kʼ öbun e hia but öunöngötö je getheniny ge je hanibun.

⁷ Anyin a wale walang hna ha hnen Than Iehova, ka habe, Haba je hanibun waleji öbun e ip hnyin e, ödra a ta je viny bi, ke haba taun ang, me öt bi: ke adre me he ka hum öbun ûnyi hnyin e.

⁸ Öbun e hia but outen hele vat; ke oge me he bi nya ka oâ köbun hele vat, haingen Than Iehova.

⁹ Ke oge me he ka hum öbun ûnyi hnyi hnyin e, me hnʼ öbun ka hnyi hnyamen je atkanyua, me bi hwaban köbun.

¹⁰ Öbun e he ka ta ge hele vat; oge me he ka owisa köbun huyi: hnyigöulen Isaraela; ke ame he ka khanʼ öbun a inya Iehova.

¹¹ Ame ca he taun ang ka hnân öt köbun, ke öbun e ca he ka hnân utiö hnyi hnyin e; oge me he ka owisa köbun hnyi hnyigöulen Isaraela;

¹² ke ame he ka khanʼ öbun a inya Iehova: anyin a öbun e ca hia but vheno anyik je hnanyibu, ke öbun e ca ânyâ hnok je hna owisa, ke öbun e hia but ânyâ hoton je hna otilâ hnen je hnyei igigili öbun.

¹³ Ke inya oge me tiga perofeta, me ame mokcu Pelatia nöku Benaia. Me oge me ta hnyikânâi me tenge hwege, me ha, ka habe, Ekölö Than Iehova! u me he ka bi obiny ka je kolon Isaraela?

¹⁴ Me ame o but könya hofuc ho Iehova, ka habe,

¹⁵ Nokon at lö, haba je liamekeiny möu, je liamekeiny möu, wale tavat ödra tha at möu, me lap anyi Isaraela hia, haba ödra bi wale tavat a hia but ha kodra hnen aten Jerusalema, ka habe, Ûsâkâûö but me Iehova; adre me ham hnyei ang kohmun me hnân ihmun:

¹⁶ anyin a wale, ha thö, ka habe, Walang hna ha hnen Than Iehova, ka habe, Eja ke ne oge ne hia but ûsâkâû ödra unyin je hnyei, ke eja ke ne oge ne hia but ovesei ödra unyin je hnyei, oge me he bi nya ka dok ae kap kodra hnyi ûen ae ûhnyûkong hnyi je hnyei adre me he ka o ka hnyin.

¹⁷ Anyin a wale ha thö, ka habe, Walang hna ha hnen Than Iehova, ka habe, Oge me he ka hum öbun ûnyi hnyi je hnyei, me ûkhacaköu öbun ûnyi hnyi je hnyei waleji adre ovesei öbun ka hnyin, ke oge me he ka ham köbun hnyei Isaraela.

¹⁸ Ke adre me he ka he kâe, me degec e je ûnyi ae ikiki me kong hia.

¹⁹ Ke oge me he ka ham kodra hnyok a khaca, me ip eû hnyi je hnyekubun hanu ae teb ûnyi; ke oge me he ka hom but hnyok ae veto hnyi je unyidra, me ham bi kodra hnyok a utiö:

²⁰ mʼ adre me he ka vheno anyik je hnanyibu, me tuö hnok je hna otilâ, me ânyâ e: ke adre me he ka bi lakeik, ke oge me he bi nya ka Khongudrin.

²¹ Ke haba tavat adre me hnu hoton hnen je hnyekudra ta je onyen anyidra ta je ûnyi ae ikiki me kong, oge me he ka oâ dedra je gethen ka hnyi hon je bödra, haingen Than Iehova.

²² Ke haba je kerubi adre me lau göranyai je labenyidrin ke tha ödrin me je waengen; ke ethö hnyi hudrin hmanenanginy Khongu Isaraela.

²³ Ke ame he göranyai hmanenangi Iehova ûnyi hnyi wanben taun, me laba hon bucen hnyi ke keihen taun e deiö.

²⁴ Ke haba hanu ame köp nya göranyai, me hum nya Kaledaia ai ka ta je bâ, hnyi hna omanenâ hnen hanon Khong. Me ame ölö thö gak hna omanenâ waleji oge me wâ.

²⁵ Me oge me ha ka ta je bâ ûnyi hia a omanenâ könya Iehova.