Esodo 9 - Iaai Bible 1901 (New Caledonia)

¹ ME haba Iehova ame ha kö Mose, ka j habe, He thö ko Farao, me ha I kâu, ka habe, Walang hna ha hnö Iehova! Khongon at Heberu, ka habe, Hna but lakeik mʼ adre me he ka bi athnyabaik.

² Anyin a u je ne höcö hnʼ odra, me behanʼ odra bala bi,

³ wâ bi, ame he hnyamö Iehova ka ta hon halem ta je meno hnyi je utkânâ, hon ta je hos, me asina, me kamela, me kau, me mamoe; ame he ka gan hmâ mok.

⁴ Kʼ ame he Iehova ka sihnyigöulen dut ta je meno haleny at Isaraela me ta je meno haleny at Aigupito: ke ba meno a khaca haleny at Isaraela ame he ka mok.

⁵ Ke haba Iehova ame thu ûen, me ha, ka habe, Nyi ame he Iehova ka ânyâ ûnyi e hnyi hnyei.

⁶ Ke haba nyi, Iehova ame ânyâ ûnyi eling, kʼ ame mokcu ta jo meno hia haleny at Aigupito: kʼ ame ca mokcu ke meno a khaca haleny lakon Isaraela.

⁷ Ke Farao ame ûkhûnöng, ke wâ bi, a ca mokcu ke meno haleny at Isaraela, e ba me khaca. Kʼ ame khöt hnyeku Farao, kʼ ame ca hna but tavat.

⁸ Ke haba Iehova ame ha kö Mose me Arona, ka habe, E so öbu me he ka hom dröu ûnyi hnyi wahnainyâ, ke hamö Mose he ka iâ goranyai hnyi hnyimakö Farao.

⁹ Kʼ ame he ka sâ hnyi hnyei Aigupito hia, kʼ ame he ka ohuc bi me hmouca me han, wale unyin at me meno hnyi hnyei Aigupito hia.

¹⁰ Kʼ ödru me hom dröu hnyi wahnainyâ me tot më hnyi hnyimakö Farao: ke Mose ame iâ goranyai; me ame wia me ohuc ae hmouca me han unyin at me meno.

¹¹ Ke ca khana ta je magoi he ka tot hnyi hnyimakö Mose, can je ohuc; anyin a e bi hon ta je magoi me at Aigupito hia ta je ohuc.

¹² Ke haba Iehova ame onâkâ hnyeku Farao, kʼ ame ca ling ödru, helâji me hna ba hnö Iehova kö Mose.

¹³ Ke Iehova ame ha kö Mose, ka habe, Vesâkong ut, me tot knyi hnyimakö Farao, me ha kâu, ka habe, Walang hna ba hnö Iehova Khongon at Heberu, ka habe, Hna but lakeik mʼ adre me he ka bi athnyaba könya.

¹⁴ Anyin a haba hnyi ûen ang oge me he ka kunâ anyik ta je kong hia ka hnyi hnyekom, me hon lathnyabaem, me lakem: me me khanö u ae ba at ae ûcû mönya eang hmelen hia.

¹⁵ Anyin a oge ne hia but inâ hnyamok, me kuc u me lakem ge mok ae cap, me adre hia but ohiö u ûnyi hnyi hmeledrany:

¹⁶ ke so bi e hnathu oge hia but otilö u, hnân he ka omanenâ köu manik man, me me lung iök hnyi hmeledrany hia.

¹⁷ Hawa, u me tiga he bala ka ogöranyi u hon lakeik mʼ u me ca he ka hnʼ odra but?

¹⁸ Wâ bi, haba nyi, helâ mo ûen eang, oge me he ka ota we ae wahma me gan, e ba helâe hnyi Aigupito ehac hnyi can ke ne o but hnyi bong ang.

¹⁹ Ke walang ang ûkhûnöng dö he ka hom halem ta je meno, me ânyâm ta je ûnyi hia hnyi hnyei; anyin a haba tavat hia me je meno hia adre me he ka wâ hnyi hnyei, kʼ adre ca hom ka hnyi uma, me ame he ka ta we ae wahma hudrin, mʼ adre me he ka mokcu.

²⁰ Haba je hnyat unyin je lathnyabai Farao, a tavat outen hna ha hnö Iehova, odrin e kâcâ lathnyabaidrin me haledrin je meno ka hnyi je uma:

²¹ ke haba at ame ca oûnyihnathoâ hna ha hnö Iehova, e ame hna but lathnyabainy, me haleny je meno hnyi hnyei.

²² Haba Iehova ame ha kö Mose, ka habe, Hai thö hnyamâm goranyai, me me ta but we ae wahma hnyi hnyei Aigupito hia, ka hnyi hon at, me omeno, me je ûöiny hnyei hia, hnyi hnyei Aigupito hia.

²³ Ke haba Mose ame inâ thö goranyai anyin uci: ke haba Iehova ame kunâ hendreng, me we ae wahma, kʼ ame hingâlâ but meic hon kânâ; ke Iehova ame ota we ae wahma hon hnyei Aigupito.

²⁴ Waleling me o but we ae wahma, me meic adre ûthueniken me we ae wahma, ke hwege but, ke ba helâe hnyi hnyei Aigupito hwân hnyi hna ibi labâ.

²⁵ Ke haba we ae wahma ame kot ta je ûnyi hia hnyi hnyei, tavat, me omeno, hnyi hnyei Aigupito hia: kʼ ame kot ta je khölak hnen we ae wahma, me thu ta je ûö hia hnyi hnyei.

²⁶ Ke haba Gosena thibi, hnyei ame labâ hnen lakon Isaraela, e ba we ae wahma eling.

²⁷ Ke haba Farao ame ûkhûnöng he ka hao Mose me Arona, me ha ködru, ka habe, Oge hia but monu hnyi ûen eang: e wisa Iehova, kʼ iny kong ut me lakeik.

²⁸ Khöû thö kö Iehova; ö e so ju hendring angʼme we ae wahma; kʼ oge me he ka hnʼ öbun, ke öbun e ca he hmetu ka laba.

²⁹ Ke Mose ame ha kâu, ka habe, Iny ka he ûhek ang hnyi taun oge me he ka hai li hnyamok kö Iehova; kʼ ame he ka hia hendreng, kʼ ame he ka ba hmetu we ae wahma: me me khanö u, ka habe, anyi Iehova hmeledrany.

³⁰ Ke haba u, me lathnyabaem, e khanö nya öbun e tiga ca he ka outö Iehova a Khong.

³¹ Ke adre kot lino me bali: anyin ame wa bali, me vhong ut lino.

³² Ke adre ca kot hwit me kesem anyin a tiga ca kû.

³³ Ke Mose ame he ûheny hnyi taun unyi Farao, me hai li hnyamen kö Iehova: me ame hia ju hendreng, me we ae wahma, kʼ ame ca ta hmetu we ka hnyi kânâ.

³⁴ Ke a wâ but Farao ae ba but we, me we ae wahma, me hendring, me ame monu hmetu me onâkâ hnyekon, tha e me lathnyabainy.

³⁵ Ke nâk ut hnyeku Farao, kʼ ame ca hna but lakon Isaraela; helâji me hna ha hnö Iehova a deny Mose.