Esodo 8 - Iaai Bible 1901 (New Caledonia)

¹ KE Iehova ame ha kö Mose, ka habe, Didrö kö Farao, me ha kâu, ka habe, Walang hna ha hnö Iehova, ka habe, Hna but lakeik mʼ adre me he ka bi athnyabaik.

² Ke u je ne höcö hnʼ odra, wâ bi, oge me he ka okongoâ je ke keihen em hnyei ge ta je rana:

³ kʼ ame be ka ûnöngöt wagewe ge ta je rana, kʼ adre me he ka ölö me iyâû ka hnyi umâm uma, me hnyeule u je mokut hnyin, me hon hnâm, me hnyi je uma umen lathnyabaem, me je lakom, me je wahnainyâm; me hnyi je kumete hnân up âm salawa:

⁴ kʼ ame he ta je rama ka tabö u me ta je lakom, me je lathnyabaem hia.

⁵ Ke Iehova ame ha kö Mose, ka habe, Ha thö kö Arona, ka habe, Hai thö hnyamâm me ânyâm uci hon ta je wagewe me je di, me je an, me oâ ta je rana ka hnyi hnyei Aigupito.

⁶ Ke Arona ame hai thö hnyamen hon ta je köiö hnyi Aigupito, me ame o thö ta je rana, me khavâ hnyei Aigupito.

⁷ Ke ame ânyâ helâe ta je magoi ge anyidrin je bibihwakeoin, me oâ ta je rana hon hnyei Aigupito.

⁸ Me haba Farao ame hao Mose me Arona, me habe, Khöû thʼ öbu kö Iehova, me me ohia ta je rana unyik, me unyin lakeik; me oge me he ka hna but tavat, mʼ adre me he ka hudo kö Iehova.

⁹ Ke haingö Mose kö Farao, ka habe, Hamâm he ka musi könya: kehö oge me he ka khöû hobi köu, me lathnyabaem, me lakem, me me he ka hia but ta je rana unyâm, me hnyi umâm je uma, mʼ adre me laba thibi hnyi wagewe?

¹⁰ Ke haingen, ka habe, Bong nyi. Ke ame thu, ka habe, Ame he ka helâ me hnâm hna ha: me me he ka khanö u ae ba ke at ae ûcû me Iehova Khonguhmun.

¹¹ Kʼ ame he ka hia ta je rana unyâm, me hnyi umâm uma, me unyin lathnyabaem, me je lakem, mʼ adre me he ka laba thibi hnyi wagewe.

¹² Ke haba Mose me Arona ödru me be ûheny unyi Farao: ke Mose ame tengiâ kö Iehova ge ta je rana waleji e ame oâ kö Farao.

¹³ Ke haba Iehova ame löng hoton hofuc ho Mose; kʼ ame mokcu ta je rana, hnyi ta je uma, me ta je hnyaba, me je hna belök.

¹⁴ Ke adre me ve ûkhöûnâ: ke bon dut hnyei.

¹⁵ Ke a wâ but Farao a ga menâ thö, me ame onâkâ hmetu but hnyekon, kʼ ame ca löng ködru; helâji me hofuc ho Iehova.

¹⁶ Ke Iehova ame ha kö Mose, ka habe, Ha thö kö Arona, ka habe, Inâ but ânyâm uci, me kot sesâiny kânâ, me ame he ka hu je uto hnyi hnyei Aigupito hia.

¹⁷ Ke ödru me ânyâ helâe; ke Arona ame hai hnyamen me anyin uci, me kot sesâiny kânâ, me me hu uto hon at, me meno; ke uto hia but kânâ hnyi hnyei Aigupito hia.

¹⁸ Ke haba ta je magoi adre me ânyâ helâe ge anyidrin je bibihwakeoin mʼ odrin e he ka oâ ta je uto: ke ca khanʼ odrin: ke e but uto hon at me meno.

¹⁹ Me haingen ta je magoi kö Farao, ka habe, Wale but e banyen Khong: ke ame nâk hnyeku Farao, kʼ ame ca löng ködru; helâji me hna ha hnö Iehova.

²⁰ Ke Iehova ame ha kö Mose, ka habe, U ma vesâkong me tot hnyi hnyimakö Farao; wâ bi, e ame he ka hnyi köiö; ke u ma he ka ha kâu, ka habe, Walang hna ha hnö Iehova, ka habe, Hna but lakeik he ka bi athnyabaik.

²¹ Ke u je ne ca he ka hna lakeik, wâ bi, oge me he ka kunâ ta je nöng köu ae se hia hmönyin, me lathnyabaem, me lakem, me eiö hnyin umâm ta je uma: kʼ ame he ka unöngöt ta je uma umen at Aigupito hnen ta je nöng, me kânâ minya adre me laba hon.

²² Ke haba hnyi bong eling oge me he ka ovebongonâ hnyei Gosena, wale ame labâ lakeik, kʼ ame ca he ka o kâ e ta je nöng; me me khanö u a inya Iehova eang hmelen.

²³ Ke oge me he ka sihnyigöulen dut lakeik me lakem: ke haba nyi ame he ka hu haten ang.

²⁴ Ke Iehova ame ânyâ; me ame o but ta je nöng ae se hia ka hnyi je uma umo Farao, me je uma umen lathnyabainy: ke haba hnyi hnyei Aigupito hia ame kong ut hnyei ge nöng.

²⁵ Ke haba Farao ame hao Mose me Arona, me ha, ka habe, He thʼ öbun ka bi hut ka Khongubun hnyi hnyei.

²⁶ Ke haingö Mose, ka habe, E ca ûcû he ka ânyâ helâe; anyin a ohmun e he ka hudo kö Iehova Khonguhmun ûnyi ae ikiki ka at Aigupito: hawa, ohmun e he ka hudo ûnyi ae ikiki ka at Aigupito hnyi hnyimaködra, kʼ adre me ca he ka lû ohmun ge veto?

²⁷ Ohmun e he ka he hnyi kun ta bong ka hnyi hnyebuba he ka bi hut kö Iehova Khonguhmun, hoton hnen hna hûna köhmun.

²⁸ Ke haingö Farao, ka habe, Oge me he ka hnʼ öbun, mʼ öbun e he ka bi hut kö Iehova Khongubun hnyi hnyebuba; ke so bi ca he öbun sâkâû ai: khon thö hobi könya.

²⁹ Ke haingö Mose, ka habe, Wâ bi, oge me he but ang ûhek unyâm, kʼ oge me he ka kböû kö Iehova me me hia but nyi ta je nöng unyi Farao, me lathnyabainy, me lakeiny: ke so bi, ca he hmetu Farao ka iyawâ, wale he ka ca hna but tavat he ka bi hut kö Iehova.

³⁰ Ke Mose ame he but ga Farao, me khöû kö Iehova.

³¹ Haba Iehova ame ânyâ helâ me hofuc ho Mose, me ame ohia ta je nöng ga Farao, me lathnyabainy, me lakeiny; ke ba but kolon me khaca.

³² Ke Farao ame onâkâ hmetu but hnyekon hnyi ûen minya e, kʼ ame ca hna bala tavat.