Esodo 7 - Iaai Bible 1901 (New Caledonia)

¹ KE Iehova ame ha kö Mose, ka habe, Wâ bi, oge hia but otilö u hnân khong kö Farao: kʼ ame he tuhâm jia Arona ka perofeta unyâm.

² U ma he ka ha hia hnök hna hûna köu: kʼ ame he Arona a tuham ka fuc kö Farao, me me he ka hna lakon Isaraela ûnyi hnyi iny hnyei.

³ Ke oge me he ka onâkâ hnyeku Farao, me osehia anyik ta je haten me ta je anyi hnân lâiâ, hnyi hnyei Aigupito.

⁴ Ke so bi ame ca he Farao ka ling öbu, me, oge me he ka ip hnyamok hon Aigupito, me hom anyik köiö, wale lakeik a lakon Isaraela ûnyi hnyi hnyei Aigupito ge ta je hwaban ae gan hmâ.

⁵ Ke ame he at Aigupito ka wâ a Inya Iehova iny ka he ka hai hnyamok hon Aigupito, me hom lakon Isaraela ûhedra.

⁶ Ke haba Mose me Arona ödru me ânyâ helâ me Iehova ame ha ködru, ödru me ânyâ helâe.

⁷ Ke eite je hunai Mose, ke eite theri je hunai Arona hnyi ûen ödru me fuc kö Farao.

⁸ Ke haba Iehova ame ha kö Mose me Arona, ka habe,

⁹ E ka ha köbu Farao, ka habe, Ânyâ thö anyibu haten: me u me he ka ha kö Arona, ka habe, Hom dö ânyâm uci, me khûâ hnyikânâi hnyi hnyimakö Farao, me me on dut.

¹⁰ Kʼ ame didrö Mose me Arona kö Farao, me ânyâ helâ me hna hûna hnö Iehova ködru: ke Arona ame khûâ but hnyikânâi anyin uci hnyi hnyimakö Farao me je lathnyabainy, kʼ ame on dut.

¹¹ Me haba Farao ame hawâ tavat metâ me tavat tren khong: me haba odrin minya a je magoi hnyi Aigupito odrin e ânyâ helâe ge anyidrin je bibihwakeoin.

¹² Ke odrin hia odrin e ve khûâ hnyikânâi anyidrin je uci, me me je on dut; ke haba uci anyi Arona ame olom but anyidrin je uci.

¹³ Ke ame nâk ut hnyeku Farao, kʼame ca ling ödru, helâ me hna ha hnö Iehova.

¹⁴ Haba Iehova ame ha kö Mose, ka habe, A khöt ut hnyeku Farao, kʼ ame höcö he ka hna tavat.

¹⁵ U ma he kö Farao hnyi hnyomakatu; wâ bi e ame he ka hnyi wagewe; ke u me ha ka halubahingen hnyi haten wagewe; ke hom dö hnyi hnyamâm ânyâm uci waleji adre wia me on.

¹⁶ Ke u ma he ka ha kâu, ka habe, A kunö nya Iehova, Khongon at Heberu, köu, he ka ha ka habe, Hna but lakeik mʼ adre me he ka biathnyabaik hnyi hnyebuba: ke wâ bi u je ca löng könya hnyi je bong eji.

¹⁷ Walang hna ha hnö Iehova, ka habe, U ma he ka wâhmakhmetoâ a inya Iehova hnyi ûnyi eang: wâ bi, oge me he ka kot köiöiny wagewe ge uci hnyi hnyamok me me dra but.

¹⁸ Me ame he ka mokcu ta je wâ hnyi wagewe, kʼ ame he ka bon wagewe: kʼ ame he at Aigupito ka ikiki ka ijem wagewe.

¹⁹ Ke Iehova ame ha kö Mose, ka habe, Ha thö kö Arona, ka habe, Hom dö ânyâm uci, me hai hnyamâm hon ta je köiö hnyi Aigupito, hon anyidra ta je di, me anyidra je wagewe, me belidra je an, me anyidra je köiö hia, me me dra but; kʼ ame he ka hu dra hnyi hnyei Aigupito hia, hnyi ta je kaia utö me veto.

²⁰ Ke haba Mose me Arona ödru me ânyâ eling, helâ me hna hûna hnö Iehova; ke ame hai thö uci me kot köiö hnyi wagewe hnyi hnyimakö Farao me lathnyabainy, kʼ ame dra but dân wagewe hia.

²¹ Ke a mokcu ta je wâ hnyi wagewe; kʼ ame bon dut wagewe, ka ca khana hmetu at Aigupito he ka ijem köiöiny wagewe; kʼ ame hu dra hnyi hnyei Aigupito hia thithö.

²² Haba ta je magoi hnyi Aigupito odrin e ânyâ helâe ge anyidrin ta je bibihwakeoin: ke ame nâk hnyeku Farao, me ca ling ödru, helâ me hna ha hnö Iehova.

²³ Ke Farao ame hwiö me didrö ka hnyi umen uma, ka ame ca oûnyihnathoâ ûnyi e eû hnyi hnyekon.

²⁴ Ke haba at Aigupito adre me khû an hnyi haten wagewe hnân ic; anyin ae ca khanʼ odra ijem köiöiny wagewe.

²⁵ Kʼ ame hwâdâ but ta je bong a seven hwaban hna kot wagewe ga Iehova.