Esodo 6 - Iaai Bible 1901 (New Caledonia)

¹ KE Iehova ame ha kö Mose, ka habe, U ma he walang ang ka wâ ûnyi oge me be ka ânyâ kö Farao: anyin a e ame he ka hnʼ odra ge hnyam ae hwege, kʼ ame he ka obʼ odra ûnyi hnyi iny hnyei ge hnyam ae hwege.

² Ke Khong ame fuc kö Mose, me ha kâu, ka habe, Inya iehova:

³ ke oge manen dut kö Aberahama, me Isaaka, me Jekob, a inya Khong Aekhanahia, ke ca khanʼ odrin bi ehac a haba iök me iehova.

⁴ Ke oge hia but ohmâ anyik ûhihinyköu inödrin, be ka ham ködrin hnyei Kanana, waleji hnyei odrin e labö he kanyua hnyin hnyi hnödrin hna be kanyua.

⁵ Ke haba khaca oge hia but löng mâng anyin lakon Isaraela, wale hnen at Aigupito hna hom hwenbödra; me inya oge me ûnykûme anyik ûhihinyköu.

⁶ Anyin a wale, ha thö ka je lakon Isaraela, ka habe, Inya Iehova, me oge me he ka hum öbun ûnyi hnyi ta je huliwa ae hmak anyin at Aigupito, kʼ oge me he ka hûgûn ʼöbun ûnyi hnyi hnödra hna bwenböbun, kʼ oge me he ka omeli öbun ge hnyam adre hai, me hna owisa ae gan hmâ;

⁷ kʼ oge me he ka hum öbun me me lakeik, kʼ oge me he ka Khongubun: kʼ ame he ka khanʼ öbun a inya Iehova Khongubun, at ame hum öbun ûnyi hnyi hmelen ta je hok anyin at Aigupito.

⁸ Ke oge me he ka hum öbun ka hnyi hnyei waleji oge ogörânyâ hnyamok he ka ham kö Aberahama, me Isaaka, me Jekob; kʼ oge ma he ka ham köbun me hwajekhöubun: haba inya Iehova.

⁹ Ke Mose ame ha helâe ka je lakon Isaraela: kʼ adre me ca ling Mose can hnyekudra ae vec, me hwenbödra ae hmak.

¹⁰ Ke haba Iehova ame ha kö Mose, ka habe,

¹¹ He thö me ha kö Farao than Aigupito he ka hna but je lakon Isaraela ûnyi hnyi iny hnyei.

¹² Ke Mose ame ha hnyi hnyimakö Iehova, ka habe, Me wâ, ame ca ling nya ge je lakon Isaraela; kʼ ama kâmâu, Farao ka ling nya, at adre ca peritomonâ esongodiny?

¹³ Ke haba Iehova ame fuc kö Mose me Arona me hûna ködru ge je lakon Isaraela me ga Farao than Aigupito, mʼ ödru me he ka hom je lakon Isaraela ûnyi hnyi hnyei Aigupito.

¹⁴ Ke walang je tuhan je lap anyin je lakamödra: haba laku Reubena noku Isaraela a bân; jia Enoka, me Falu, me Hezerona, me Karemi: wale je lap ûnyi ga Reubena.

¹⁵ Ke haba je laku Simeona: jia Jemuela, me Jamina, me Ohada, me Jakina, me Zohara, me Saulo nokon momo Kanana: wale je lap ûnyi ga Simeona.

¹⁶ Ke walang ien je laku Levi hoton anyidrin je dö; jia Geresoma, me Kohatha, me Merari: ke haba je hunainy möt anyi Levi, me, wan haded ke thöte seven ta je huna.

¹⁷ Ke lo li laku Gerisoma; jia Libeni me Simei, hoton anyidru li lap.

¹⁸ Ke je laku Kohatha; jia Amerama, me Izara, me Heberona, me Uziela: ke haba ta je hunainy möt anyi Kohatha, me wan haded ke thöte theri ta je huna.

¹⁹ Ke lo li laku Merari; jia Maheli, me Musi. Waleling je lap anyin je at Levi hoton anyidrin je lap.

²⁰ Ke haba Amerama ame hum Jokebeda haniny kamen, me âiân, me ame hnöku Arona me Mose: ke haba je hunainy möt anyi Amerama, me wan hadel ke thöte seven ta je huna.

²¹ Ke haba je laku Izara; jia Kora, me Nefega, me Zikeri.

²² Ke haba je laku Uziela; jia Misaela, me Elizafana, me Shilheri.

²³ Ke Arona ame hum Eliseba noku Aminadaba, hani Nasona, me âiân; ke ame hnöku Nadaba, me Abiu, me Eleazara, me Ithamaza.

²⁴ Ke haba je laku Kora; jia Asiro, me Elekana, me Abiasafa; wale je lap anyin at Kora.

²⁵ Ke haba Eleazara noku Arona ame hom ke hlu ûnyi ge je laku Putiela, me âiân; ke ame hnöku Fineasa a nokon. Wale je tuhan lakamen at Levi hoton anyidrin je lap.

²⁶ Ke haba Arona me Mose, me, wale li at ame ba ködru Iehova, ka habe, Hom but je lakon Isaraela ûnyi hnyi hnyei Aigupito hoton anyidra je dö.

²⁷ Ke wale li at ödru me ha kö Farao than Aigupito he ka hom lakon Isaraela ûnyi hnyi hnyei Aigupito: a Mose me Arona eling.

²⁸ Ke haba hnyi bong Iehova ame fuc kö Mose hnyi hnyei Agiupito,

²⁹ me haingö Iehova kö Mose, ka habe, Inya Iehova: bethe ha kö Farao than Aigupito je hofuc hia thithö oge me haköu.

³⁰ Ke haba Mose ame ha hnyi hnyimakö Iehova, ka habe, Wâ bi, adre ca peritomonâ li esongodik, kʼ ama hawa Farao ka ling nya?