Esodo 5 - Iaai Bible 1901 (New Caledonia)

¹ KE hwaban dö e haba Mose me Arona ödru me he me ha kö Farao, ka habe, Walang hna ha hnö Iehova Khongu Isaraela, ka habe, Hna but lakeik mʼ adre me he ka bi jeû könya hnyi hnyebuba.

² Ke Farao ame ha, ka habe, Ia Iehova mʼ inye he ka löng ifucin he ka hna but at Isaraela? E ca khanö nya Iehova, ke oge me ca he bi nya ka hna but at Isaraela,

³ Ke haingödru, ka habe, A hia but iouny möhmun Khongon at Heberu: ö u hnʼ ohmun dut he ka he hnyi kun ta bong ka hnyi hnyebuba he ka bi hut kö Iehova Khonguhmun; wâ e nye he ka kucʼ ohmun ge mok ae cap, ame ne hele vat.

⁴ Ke haingen than Aigupito ködru, ka habe, Ieû gabu Mose me Arona öbu me uny jut je hok ge tavat hnyi je hanymödra? He bi thö ka huliwa.

⁵ Ke haingö Farao, ka habe, Wâ bi e se hia tavat aten hnyei walang ang, kʼ öbu me omen ʼödra ge anyidra huliwa.

⁶ Ke haba hnyi bong eling Farao ame hûna ka je tuhan tavat huliwa me je homakan gadra, ka habe,

⁷ Ca he hmetu bi öbun ka ham thatûnyin hwit ka tavat hnân ânyâ veto kânâ helâ me ehac: hamödra ka hlo thatûnyin hwit hobi ködra bi.

⁸ Ke haba ûseiny je veto kânâ waleji adre ânyâ ehac, öbun e he bala ka elâm gadra; Öbun e ca he ka öûhnyûkongoâ: anyin a odra wenhöcö; anyin a wale adre me hongot, ka habe, Hnʼ öhmun dut he ka hudo ka Khonguhmun.

⁹ He thö ka ogânâ huliwa anyin tavat, mʼ adre me he ka huliwan; mʼ adre me ca he ka löng je hofuc thoi.

¹⁰ Me ame he but ta je tuhan tavat huliwa me je homakan gadra, me ha ka tavat, ka habe, Walang hna ha hnö Farao, ka habe, Oge me ca he hmetu ka ham thatûnyin hwit köbun.

¹¹ He thö öbun ka hlo je thatûnyin hwit hnyi je dok öbun e me wâ hnyin: ke adre me ca he ka öûhnyûkongoâ ke keihen auyibun huliwa.

¹² Waleling me me vese but tavat hnyi hnyei Aigupito he ka hlo tiren hwaban thatûnyin hwit.

¹³ Ke haba je tuhan huliwa adre me ojati odra, ka habe, Oumo thö je ve hûdröbun hnyi ke bong me ke bong, helâ me ehac ke tiga hu thatûnyin hwit.

¹⁴ Ke adre kot je homakan huliwa a je lakon Isaraela, wale hnen je tuhan huliwa anyi Farao hna otilâ hudra, me hnei odra, ka habe, Ieû gabun öbun e ca oumo ta je veto kânâ a hûdröbun et, me enyi, helâ me ehac?

¹⁵ Waleling me me he but ta je homakan huliwa a je lakon Isaraela me khöû kö Farao, ka habe, Ieû, gam u me ânyâ helâe köhmun a je lathnyabaem?

¹⁶ E ba thatûnyin hwit adre ham köhmun a je lathnyabaem, kʼ odrin e ha köhmun, ka habe, Ânyâ thö ta je veto kânâ: ke wâ bi, adre me kot je lathnyabaem; ke haba monu bi me ûnyi ge je lakem.

¹⁷ Ke ame ha, ka habe, Öbun je uthöcö, öbun je uthöcö: anyin a wale öbun e ha, ka habe, Hnʼ ohmun dut he ka hudo kö Iehova.

¹⁸ Ke walang ang he thʼ öbun ka huliwa; anyin adre me ca he hmetu ka ham thatûnyin hwit köbun, ke so bi öbun e be ka ham je veto kânâ helâ me tulut.

¹⁹ Ke a wâ but je homakan huliwa a je lakon Isaraela a odrin e kong ut ûnyi hnyi hna ha, ka habe, Öbun e ca he ka owakhaletâ je veto kânâ, waleji hûdröbun hnyi je bong.

²⁰ Ke odrin e he but ûheny unyi Farao, me odrin e ûkhanö me Mose me Arona ödru me tot eû hnyi gethen:

²¹ ke haingödrin ködru, ka habe, Hamö Iehova he ka ö ʼbu me owisa, anyin a öbe obokongi öhmum kö Farao, me lathnyabainy, he ka ham hele vat ka hnyi hnyamödrin he ka hlingʼ ohmun.

²² Ke haba Mose ame he hmetu kö Iehova, me ha, ka habe, Than lö, ieû gam u me ovecâ tavat eang? ke ieû gam u je kunö nya?

²³ Anyin a hwân hnyi ûhek unyi Farao he ka fuc hnyi iâm, e ame okongoâ tavat eang; ke u me ca omelö balua lakem.