Esodo 4 - Iaai Bible 1901 (New Caledonia)

¹ KE haba Mose ame thu me habe, Wâ bi adre me ca he ka köp nya, me löng ifucik: anyin adre me he ka ha, ka habe, A ca manen köu Iehova.

² Ke haba Iehova ame ha kâu, ka habe Ieû e hnyi hnyamâm? Ke ame ha, ka habe, Uci.

³ Me haingen, ka habe, Khûâ but hnyikânâi. Kʼ ame khûâ but hnyikânâi, me ame on dut; ke Mose ame kec gan.

⁴ Ke Iehova ame ha kö Mose, ka habe, Inâ but hnyamâm ka hom obiny: (ke ame inâ but hnyamen me hom, kʼ ame uci hmetu but hnyi hnyamen:)

⁵ mʼ adre me he ka kap a ga manen köu Iehova, Khongon lakamödra, Khongu Aberahama, me Khongu Isaaka, me Khongu Jekob.

⁶ Ke Iehova ame ha minya kâu, ka habe, Inâ but hnyamâm ka hnyi ûlâiâm. Ke ame inâ hnyamen ka hnyi ûlainy: me oc hmetu but, ke wâ bi, a lepera but hnyamen, ke hau helâ me kiona.

⁷ Ke ame ha, ka habe, Inâ hmetu ju hnyamâm ka hnyi ûlâiâm. (Kʼ ame inâ hmetu but hnyamen ka hnyi ûlainy; ke ame oc hmetu but e ûnyi hnyi ûlainy, me wâ bi, e so hmetu but helâ me unyin.)

⁸ Ke adre me ne ca köp u, me löng hoton haten a bân, adre me he ka löng hoton haten a bilany bi.

⁹ Ke adre me ne ca kap li haten eling, me ca löng minya ifucâm, me u ma he ka sâû ûnyi hnyi köien wagewe, ke hingâlâ ka hnyi hon kânâ ae mada: me haba köiö u ma he ka sâû ûnyi hnyi wagewe, me ame he ka dra hnyi dok ae mada.

¹⁰ Ke haba Mose ame ha kö Iehova, ka habe, Than lö, iny ca at khet, waleji ehac, me walang ang hwaban hnâm hna fuc könya a athnyabaem: anyin a teta ifucik, ke teta bohmök.

¹¹ Ke haba Iehova ame ha kâu, ka habe, Ia op hnyimen at? ke ia op hum, me wijiji, me bwela, me wadröu? hawa ca inya bi Iehova?

¹² Ke walang ang he thö, me oge me he ka tha inya me hnyimâm, me nö u hofuc he ka ha.

¹³ Ke ame ha, ka habe, Than lö, bethe kunâ at u je wem he ka kunâ.

¹⁴ Ke ame ubâhlâ hmönyin anyi Iehova kö Mose, me haingen, ka habe, Hawa e ca tuhâm Arona, at Levi? E khanö nya e at ae khana he ka fuc so, Ke wâ minya bi, e ame he jem he ka ûkhanö möu: ke ka ö u, me ame he ka senyin hnyekon.

¹⁵ Ke u ma he ka ha hofuc kâu, me bi hofuc ka hnyi hnyimen: ke oge me he ka tha inya me hnyimâm me hnyimen, me ku köbu ûnyi öbu me he ka ânyâ.

¹⁶ Ke ame he ka hwabâm he ka fuc ka tavat: ke ame he ka bi hnyimâm, me u me he ka helâ me Khong kâu.

¹⁷ Ke u ma he ka hom uci ang hnyi hnyamâm, me u me he ka ânyâ ta je haten hnen e.

¹⁸ Ke haba Mose ame he hmetu kö Jethero a ûngon, me ha kâu, ka habe, Ō u hnö nya but he ka he hmetu Aigupito ai ka je liamekeiny mönya he ka wâ, hawa ödrin e ne möt. Ke haingö Jethero kö Mose, ka habe, He thö me hnahic.

¹⁹ Ke haba Iehova ame ha kö Mose e Midiana, ka habe, He hmetu thö Aigupito ai: anyin a mokcu hnyat hia waleji odrin e elâm he ka hlingö u.

²⁰ Me haba Mose ame hom âiân, me lakon, me ip ödrin hon asina, me he hmetu ka hnyi hnyei! Aigupito: haba Mose ame hom uci anyin Khong hnyi hnyamen.

²¹ Ke Iehova ame ha kö Mose, ka habe, U ka he hmetu Aigupito ai, ûnykûme ju he ka ânyâ ta je ûnyi hnân lâiâ hia hnyi hnyimakö Farao, waleji oge ip hnyi hnyamâm: ke oge me he ka okhötâ hnyekon, me ame ca he ka hna tavat.

²² Ke u me he ka ha kö Farao, ka habe, Haba Isaraela nokuk a atö:

²³ ke oge hia but ha köu, ka habe, Hna but nokuk me me he ka bi athnyaba könya; ke u je hia but behânâ: wâ bi, oge me he bi nya ka hlingâ nokom a atö.

²⁴ Ke Iehova ame iouny me eû hnyi gethen hnyi omtabaga, me elâm he ka hlingâ.

²⁵ Ke haba Zipora ame hom veto a oût me subâ degecâ unen unyin nokon, me khûâ ka hnyi li can; haingen momo, ka habe, U baga at ame bi dra könya.

²⁶ Waleling me me hna but e. Ke haingen momo, ka habe, U baga at ame bi dra, ûnyi hnyi hnaperitomon.

²⁷ Ke Iehova ame ha kö Arona, ka habe, He thö u he ka ûkhanö me Mose hori hnyebuba. Ke ame he me ûkhanö më hnyi bucen anyin Khong, me ûcimhnyimak më.

²⁸ Ke Mose ame thumetu Arona ge ta je hofuc hia ho Iehova waleji a kunâ, me ta je haten e ame hûna kâu.

²⁹ Kʼ ame he Mose me Arona me ûkhacaköuâ wahingatiny lakon Isaraela hia:

³⁰ me Arona ame ha je hofuc hia waleji a ha Iehova kö Mose, ke ame ânyâ ta je haten hnyi hnyimakan tavat.

³¹ Me ame kap e hnen tavat: ke odrin e löng a ga um but Iehova senâ lakon Isaraela, me wâ hna okongu odra, me odrin e nom ju me khudrung.