Esodo 39 - Iaai Bible 1901 (New Caledonia)

¹ KE odrin e tibet je mano ae udrudrâ, me udrudrâ hlit, me dra vec, hnân ûkhaûen huliwa hnyi dok ae kap, ke ödrin e ânyâ je ûkhaû ae kap hobi kö Arona: helâ me hna hûna hnö Iehova kö Mose.

² Ke e ame tibet iefoda gol, me udrudrâ, me udrudrâ hlit, me dra vec, me lino ae ûhnyûkong nân adre seveny.

³ Ke adre me kokot halelöûâ gol me kave helâ me tö, mʼ adre me hwâwâ hnyi mano ae udrudrâ, me udrudrâ hlit, me dra vec, me hnyin lino ae ûhnyûkong nân a huliwan hnyat ae metâ.

⁴ Ke ödrin e tibet li hon bajebenyin hobi kâu ûnyi e adre utibetköuâ: ke adre me ûohmâköuâ hnyi li hnyiban.

⁵ Ke haba wen e, wale adre hwâwâ metâ, hnân ca e, adre khaca me, ke tha ûcû me hna huliwan e; wale gol, me udrudrâ, me udrudrâ hlit, me dra vec, me lino ae ûhnyûkong nân adre seveny; helâ me hna hûna hnö Iehova kö Mose.

⁶ Ke odrin e huliwan li veto soama, wale adre bi taben hnyi li ong gol, kʼ adre kave hnyin ien lakon Isaraela, helâ me hna khavi hnalimen hnân bi haten.

⁷ Ke e ame ip li ûnyi e hon li bajebenyin iefoda, me me li veto hnân oûnykumeâ ka lakon Isaraela; helâ me hna hûna hnö Iehova kö Mose.

⁸ Ke e ame ânyâ tubwiny ûlainy a huliwan at metâ, helâ me hna huliwan iefoda; a gol, me udrudrâ, me udrudrâ hlit, me dra vec, me lino ae ûhnyûkong nân adre seveny.

⁹ E hu vak ta baten ae tha ûcû tulutiny; ke adre ânyâ tubwiny ûlainy me thu e: khaca hnyam ibeûen, ke khaca hnyam ûlauen, kʼ adre hia but thu.

¹⁰ Ke adre me ohmâ hnyin e vak ta deö veto: haba ke dö, me sadio, me topazio, me bereketh, dö a bân eling.

¹¹ Ke haba dö a loiny, me semerado, me safairo, me aloma.

¹² Ke haba dö a kuniny, me lesema, me sevo, me amethusa.

¹³ Ke haba dö a vakiny, me berulo, me sadonuki, me jasepi: adre ve bi taben hnyin je ong gol.

¹⁴ Ke twelv je veto hoton je ien lakon Isaraela, helâ me je iödrin; helâ me hna khavi hnalimen hnân bi haten, e ve hu ien hoton je tribu a twelv.

¹⁵ Ke ödrin e ânyâ hnyi tubwiny ûlainy li cein adre khenyö gol ae so.

¹⁶ Ke adre me ânyâ lo li ong taben a gol me li otru a gol; me ohmâ li otru hnyi li baten tubwiny ûlainy.

¹⁷ Ke ödrin e inâ li cein gol adre khenyö ka hnyin li otru hnyi li hnyiban tubwiny ûlainy.

¹⁸ Ke adre me ohmâ li hnyiban li cen adre khenyö hnyi li ong taben, me ip li ûnyi e hnyi li bajebenyin iefoda hnyi hnyimakan e.

¹⁹ Ke ödrin a ânyâ li otru gol me ohmâ hnyi li ke keihen tubwiny ûlainy, hnyi baten hnyi ke keihen iefoda eû hmelen.

²⁰ Ke ödrin e ânyâ ke li otru gol me ohmâ hnyi li ûnyi hon bajebenyen iefoda eû hmelen ke hnyi hnyimakan, hnyi hna ûohmâköuâ hon wen iefoda.

²¹ Ke ödrin e ca tubwiny ûlainy hnyi li otruiny, ka hnyi li otruiny iefoda, ge telenu ae udrudrâ, me me mokut hon wen iefoda adre hwâwâ metâ, me me ca he tubwiny ûlainy ka ok ûnyi hnyi iefoda; helâ me hnö Iehova hna hûna kö Mose.

²² Ke e ame tibet ûkhaû ae beû hanen iefoda, adre hwâwâ mano ae udrudrâ hia;

²³ ke hnyimen hnyi wanben ûkhaû helâ me hnyimen ûkot hnân vat, me tibet igigilö hnyimen me me ca he ka mou.

²⁴ Ke ödrin e ânyâ hnyi obiny ûkhaû ae beû je wan rimona ae udrudrâ, me udrudrâ hlit, me dra vec, me mano lino adre seveny.

²⁵ Kʼ adre me ânyâ je pate gol ae so, me ohmâ je pate wanben je wan rimona hnyi obiny ûkhaû igigilö wanben je rimona;

²⁶ ke pate me wan ke rimona, me ke pate me wan ke rimona hnyi obiny ûkhaû ae beû igigilö, hnân huliwa; helâ me hnö Iehova hna hûna kö Mose.

²⁷ Ke odrin e ânyâ je ûkhaû mano lino adre hwâwâ hobi kö Arona me hobi kâu je lakon,

²⁸ me hnabinybak mano lino, me je hnabinbak mano lino ae hmanenang, me je trauzes mano lino ae ûhnyûkong nân adre seveny,

²⁹ me weny hnyekon mano lino adre seveny, me udrudrâ, me udrudrâ hlit, me dra vec, a huliwan at omecâ mano; helâ me hnö Iehova hna hûna kö Mose.

³⁰ Ke odrin e ânyâ ke wahano a gol ae so hobi kâu korona ae kap, me sihnalimen hon, helâ me hna khavi hnalimen hon ûnyi hnân bi haten, ka habe, e kap kö iehova.

³¹ Ke odrin e hûkâlâ hnyin ke telenu ae udrudrâ hnân ohmâ ethö hon hnabinybak; helâ me hnö Iehova hana hûna kö Mose.

³² Ke adre oumo helâe je huliwa hia hobi kâu uma mano, me uma ûkhacaköu: haba lakon Isaraela adre me ânyâ ta je ûnyi hia, helâ me hna hûna hnö Iehova kö Mose.

³³ Ke odrin e hom but kö Mose uma ûkhacaköu, wale Uma Mano, me je omjehen hia, wale je bâletiny, me je esöiny, me je venyâiny, me je khetepiny, me je taben;

³⁴ me tubwiny a unen mamoe baga adre wia me me dra, me tubwiny a unen takasa, me mano hnân singiny;

³⁵ me tang ohnatho, me li venyâiny, me taben ibetengiö;

³⁶ me laulau, me je omjehen hia, me areto hnân omanenâ;

³⁷ me taben lamepa gol ae so, me je lamepainy wale je lamepa adre ip gaga, me je omjehen hia, me wakaco hnân umumelam;

³⁸ me taben hut a gol, me wakaco hnân hû, me ûnyi ae bo so hnân le, me mano singiny hwanuma;

³⁹ me taben hut a bras, me echigic bras, me li venyâiny, me je omjehen hia, me taben soû, me can e;

⁴⁰ me mano hnân uhno hnyi kak, me je khetepiny, me je taben e, me mano hlinginy homagöuleny hak, me je toiny e, me je faoiny, me ta je ûnyi hnân huliwa hia hnyi uma mano, hobi kâu uma ûkhacaköu;

⁴¹ me je ûkhaûen huliwa adre tibet soâ hnân huliwa hnyi dok ae kap, me je ûkhaû ae kap hobi kö Arona at bihut, me je ûkhaûen lakon hnân hanymen bihut.

⁴² Haba lakon Isaraela adre me ânyâ ta je ûnyi hia thithö e, helâ me Iehova ame hûna kö Mose.

⁴³ Ke haba Mose ame wâ ta je huliwa hia thithö, ke wâ bi, adre hia but ânyâ e; adre me ânyâ helâ me hna hûna hnö Iehova: ke haba Mose ame hahnahici odra.