Esodo 38 - Iaai Bible 1901 (New Caledonia)

¹ KE e ame tibet taben hut hnân leû, a utö öhum: thabûng ta kubit ibeûen, ke thabûng kubit ulaûen, ke tha ûcû je hwenoiny a vak; ke kun ta kubit ibeûen goranyai.

² Ke e ame ânyâ vak ta baitoiny hnyi vak ta kopiny, kʼ adre khacē me je baitoiny, ke e ame khavâ e ge bras.

³ Ke e ame ânyâ je omjehen taben hut hia, a je ot, me je soi, me je kaia, me je bâlet hnân seû utiö, me je taben meic; e ame ânyâ je omjehen hia ge bras.

⁴ Ke e ame ânyâ hnân taben hut echigic a bras helâ me boert eû hmelen haten hnyikânâi, me me uhni hnyi wanben e.

⁵ Ke e ame le vak ta otru hobi kâu vak ta hnyibaniny echigic bras, hnân hnen li venyâ.

⁶ Ke e ame ânyâ li venyâ a utö öhum, me tube ge bras.

⁷ Ke e ame inâ li venyâ hnyin je otru hnyi li ke keihen taben hut hnân vadren e; ke e ame tibet esöiny me olanyâ hnyin.

⁸ Ke e ame ânyâ taben soû a bras, me can a bras, ûnyi hnyi je uselat anyin omomo adre ûkhacaköu he ka bi athnyaba hnyi hwanumen uma ûkhacaköu.

⁹ Ke e ame bi haginy: haba hnyi ke keihen ka hnyi hwaiöu adre uhno mano lin oae ûhnyûkong nân adre seveny hnyi hak, a khaca haded je kubit:

¹⁰ ke twente je khetepiny, ke twente je taben a bras; ke sileva je bâletiny je khetep, me je venyâiny.

¹¹ Ke khaca haded je kubit hobi kâu ke keihen ka hnyi hwadrö, ke twente je khetepiny, ke twente je taben a bras; ke sileva je bâletiny je khetep, me je venyâiny.

¹² Ke hobi kâu ke keihen e jio fifte je kubit mano adre uhno, ke ten je khetepiny, ke ten je taben, ke sileva je bâletiny je khetep me je venyâiny.

¹³ Ke fifte kubit hobi kâu ke keihen e deiö.

¹⁴ Ke adre uhno hnyi ke keihen homagöule fiftin kubit mano; ke kun ta khetepiny, ke kun ta taben:

¹⁵ helâe minya hnyi ke keihen: wale hnyi li ke keihen homagöuleny hak adre ve uhni mano a fiftin je kubit; ke kun ta khetepiny me kun ta taben.

¹⁶ Ke haba mano hia adre uhno igigilö hak, me mano lino ae ûhnyûkong nân, adre seveny.

¹⁷ Ke bras je taben je khetepiny; ke sileva ta je bâletiny je khetepiny, me je venyâiny, ke adre tube ge sileva je bân hia; ke adre venyâ ge sileva je khetepiny hak hia.

¹⁸ Ke haba mano adre uhno a hlinginy homagöule, me, huliwa anyin at omecâ mano, ae udrudrâ, me udrudrâ hlit, me dra vec, me lino ae ûhnyûkong nân adre seveny: ke twente kubit ibeûen, ke haba ibeûen goranyai hnyi ûlauen, thabûng ta kubit, helâ me hna uhni mano hni hak.

¹⁹ Ke vak ta khetepiny, ke vak ta taben bras; ke sileva je bâletiny, kʼ adre khavâ ge sileva je ban e me je venyâiny.

²⁰ Ke bras je faoiny uma mano hia me hak a igigilö.

²¹ Ke walang ûseiny je ûnyi hnyi uma mano, a uma mano hnân ohnatho, helâ me hnödra hna aû, hoton hna hûna hnö Mose, hnân huliwa anyin at Levi, a aû ga Ithamara noku Arona at bihut.

²² Ke haba Bezaleli, noku Uri, noku Huro, ûnyi hnyi tribu Juda, ame ânyâ ta je ûnyi hia a hûna Iehova kö Mose.

²³ Ke e unyin Aholiaba, noku Ahisamaka ûnyi hnyi tribu Dana, at khavi hnalimen, ke at huliwa ae metâ, ke at omecâ mano ge udrudrâ, me udrudrâ hlit, me dra vec, me lino ae ûhnyûkong nân.

²⁴ Haba gol hia adre hom hobi kâu ta je huliwa hia hnyi dok ae kap, wale gol ûnyi hnyi je bwihlany, me, twente nain je talan, me tu haded ke thöte je sekel, hoton sekeliny dok ae kap.

²⁵ Ke haba sileva unyidrin tavat adre aû hnyi ûkhacaköu, khaca haded je talan, ke khaca thauzan ke seven haded ke sevente faiv je sekel, hoton sekeliny dok ae kap:

²⁶ ûsa khaca beka ke at me ke at, wale haf sekel, hoton sekeliny dok ae kap odra ûsa khaca hia adre hanyâûâ ka hnyi hna öû odra, hwân ge tavat a twente me gan hon e, odra siks haded ke theri thauzan ke faiv haded ke fifte.

²⁷ Ke adre me le je talan sileva a khaca haded hnân je taben khetepiny dok ae kap, me je taben singiny; adre me ânyâ je taben a khaca haded, ûnyi hnyi je talan a khaca haded, a khaca talan hobi kâu ke taben a khaca.

²⁸ Ke ûnyi ge khaca thauzan seven haded ke sevente faiv sekel e ame ânyâ je bâlet hobi kâu je khetep, me khavâ je ban, me ânyâ je venyâ hobi kâu.

²⁹ Ke haba bras ûnyi hnyi bwihlany, me, sevente je talan me lo li thauzan ke foa haded je sekel.

³⁰ Ke e ame ânyâ ûnyi hnyin e je taben hobi kâu hwanumen uma ûkhacaköu, me taben hut a bras, me echigic bras, me je omjehen hia taben hut,

³¹ me je taben hak igigilö, me je taben homagöuleny hak, me ta je faoiny hia uma mano, me ta je faoiny hia hak igigilö.