Esodo 37 - Iaai Bible 1901 (New Caledonia)

¹ KE Bezaleli ame tibet tang a utö öhum: lo li kubit me haf ibeûen, ke khaca kubit me haf ûlauen, ke khaca kubit me haf ibeûen göranyai.

² Ke e ame tube eû hnyin me hoton ge gol ae so, me bi koronainy gol ethö hon.

³ Ke e ame le je otru gol a vak hobi kâu vak ta can; lo li otru hnyi ke keihen, ke lo li otru minya hnyi ke keihen.

⁴ Ke e ame ânyâ li venyâiny a li öhum, me tube ge gol.

⁵ Ke e ame inâ li venyâ hnyin je otru hnyi li ke keihen tang hnân vadren tang.

⁶ Ke e ame ânyâ taben ibetengiö gol ae so, lo li kubit me haf ibeûen, ke khaca hubit me haf ûlauen.

⁷ Ke e ame ânyâ li kerubi gol; e ame ânyâ e a huliwan hnen hama hnyi li hnyiban;

⁸ a khaca kerubi hnyi ke hnyiban, ke khaca kerubi hnyi ke hnyiban; ke ame ânyâ li kerubi hnyi li hnyiban a khaca me taben ibetengiö.

⁹ Ke haba li kerubi ödru me lau goranyai je labenyidru me tube taben ibetengiö ge je labenyidru, ke ödru me ûhnyimaködruköu: haba li kerubi ödru me hnyimaködru ka hnyi taben ibetengiö.

¹⁰ Ke e ame tibet laulau a utö öhum, lo li kubit ibeûen, ke khaca kubit ûlauen, ke khaca kubit me haf ibeûen goranyai:

¹¹ ke e ame tube e ge gol ae so, me bi koronainy a gol.

¹² Ke e ame bi baten igigilö e a khaca hnyam, kʼ ame bi koronainy igigilö e.

¹³ Ke e ame le hobi kâu e je otru gol a vak, me ohmâ je otru hnyi je ke keihen a vak hnyi vak ta can.

¹⁴ Ke ûhakekenyi je otru me baten, hnân hnen li venyâ, mʼ adre me vadren laulau.

¹⁵ Ke e ame ânyâ li venyâ öhum me tube ge gol, mʼadre me vadren laulau.

¹⁶ Ke e ame ânyâ je omjehen laulau, a je utkaiainy, me je spuniny, me je kaiainy, me je jöginy, hnân hingâlâ, gol ae so.

¹⁷ Ke e ame ânyâ taben lamepa gol ae so; e ame ânyâ taben lamepa adre huliwan hnen hama, wale can me unyin; ke haba je kaiainy, me je ovejien, me je vongon, adre me khaca me:

¹⁸ Ke siks ta vheiny ame vheivhei ûnyi hnyi li ke keihen; kun ta vheiny taben lamepa hnyi ke keihen, ke kun minya ta vheiny taben lamepa hnyi ke keihen.

¹⁹ Kun ta kaia helâ me je vhönginy saked, me ovejien, me vongon, hnyi ke vheiny, ke kun minya ta kaia helâ me je vhönginy saked, me ovejien, me vongon, hnyi ke keihen; helâe hnyi je vheiny a siks ame vhei ûnyi hnyi taben lamepa.

²⁰ Ke e hnyi taben lamepa vak ta kaia helâ me je vhönginy saked, me je ovejien, me je vongon:

²¹ haba ke ovejien hmelen ke li vheiny adre okhaca me, me ke ovejien hmelen ke li vheiny adre okhaca me, me ke ovejien hmelen ke li vheiny adre okhaca me, hnân je vheiny a siks ame vheivhei ûnyi hnyin.

²² Haba je ovejien me je vheiny adre me khaca me: ke gol ae so adre huliwan hnen hama hia thithö.

²³ Ke e ame ânyâ je lamepainy a seven, me uthesiûnipy, me je taben hleûhleûiny gol ae so.

²⁴ Khaca talan gol ae so hnân ânyâ e, me je omjehen hia.

²⁵ Ke e ame tibet tap utö öhum hnân leû ûnyi ae bo so; khaca kubit ibeûen, ke khaca kubit ûlauen, ke tha ûcû vak ta hwenöiny; ke lo li kubit ibeûen goranyai; kʼ ame tha khaca me je baitoiny.

²⁶ Ke e ame tube e ge gol ae so, walethö hon, me je ke keihen igigilö, me je baitoiny: ke e ame bi koronainy gol igigilö.

²⁷ Ke e ame ânyâ vak ta otru gol ka hnyin hmelen koronainy, hon li vhaken, wale hnyi li ke keihen, a hnen li venyâ hnân vadren e.

²⁸ Ke e ame ânyâ li venyâ öhum me tube ge gol.

²⁹ Ke e ame ânyâ wakaco hnân hû ae kap, me ûnyi ae ûnyi hnathu ae bo so hnân le, hoton ihuliwainy at ame bi wakaco.