Esodo 35 - Iaai Bible 1901 (New Caledonia)

¹ KE haba Mose ame ûkhacaköuâ tavat hia lakon Isaraela, me ha ködra, ka habe, Walang je hofuc Iehova ame hûna, mʼ öbun e he ka ânyâ.

² Siks je bong u me he ka huliwa hnyin, ke haba bong a seveniny ame he ka bong ae kap, a sabath hnân menâ kö Iehova: ke haba at ame he ka bi huliwa hnyi bong eling adre me he ka hlingâ.

³ Ca he öbun ka hû meic hnyi je hnyababun hnyi bong sabath.

⁴ Ke haingö Mose ka ûkhacaköu hi anyin at Isaraela, ka habe, Walang je hofuc a hûna Iehova, ka habe,

⁵ Öbun e he ka bi bwihlany unyibun hobi kö Iehova: haba tavat adre me hnyokâ me weny, me, hamödra he ka hom, wale bwihlany hobi kö Iehova; a gol, me sileva, me bras;

⁶ me mano ae udrudrâ, me udrudrâ hlit, me dra vec, me lino, me leûnen got,

⁷ me je unen mamoe baga adre wia e me dra, me je unen takasa, me utö öhum,

⁸ me wakaco hnân umumelam, me je ûnyi ae bo so hobi kâu wakaco hnân hû, me je ûnyi ae bo so hnân le,

⁹ me je veto soama, me je veto adre ohmâ hnyi taben, hnân iefoda, me tubwiny ûlainy.

¹⁰ Ke e so ame o but hnyat ae metâ unyibun, me ânyâ ta je ûnyi hia a hûna Iehova;

¹¹ waleji uma mano, a uma, me bân e, me je bâletiny, me je esöiny me je venyâiny, me je khetepiny, me je taben;

¹² me tang, me li venyâiny, me taben ibetengiö, me mano a singiny,

¹³ me laulau, me li venyâiny, me je omjehen hia, me areto hnân omanenâ;

¹⁴ me taben lamepa hnân umumelam, me omjehen, me je lamepainy, me wakaco hnân umumelam;

¹⁵ me tap hnân Ieû ûnyi ae bo so, me li venyâiny, me wakaco hnân hû, me je ûnyi ae bo so hnân le, me singiny hwanuma, wale hwanumen uma mano;

¹⁶ me taben leû hut, me echigic a bras, me li venyâiny, me je omjehen hia, me taben soû, me je can e;

¹⁷ me mano he ka huno hnyi hak, me je khetepiny, me je taben, me singiny homagöuleny hak;

¹⁸ me je faoiny uma mano, me je faoiny, me je toiny;

¹⁹ me je ûkhaû adre huliwa soâ, hobi kâu hnyat ae hu hanymen hnyi dok ae kap, a ta je ûkhaû ae kap hobi kö Arona at bihut, me je ûkhaûen lakon hnân hanymen bihut.

²⁰ Ke haba ûkhacaköu anyin lakon Isaraela hia adre me vese but ûhedra unyi Mose.

²¹ Ke a o but tavat wale a ûjöngi odrin hnen je hnyekudrin, me tavat a ohmehmelʼ odrin hnen hanudrin, mʼ odrin e hom ta je bwihlany hobi kö Iehova, hnân hobi kâu huliwa huyi uma ûkhacaköu, me hobi kâu je huliwainy hia, me hobi kâu je ûkhaû ae kap.

²² Kʼ adre o but, obaga me omomo, tavat hia adre me weny, me hom but ta je ohmâiny nyin ae mec, me je anen hnyikönyen, me je wen banyen hnân bi haten, me je waen, wale ta je hmanenanginy gol hia; haba tavat hia adre me bi bwihlany, me adre me ham ta je ûnyi a gol kö Iehova.

²³ Ke tavat ae tren mano ae udrudrâ, me udrudrâ hlit, me dra vec, me lino ae ûhnyûkong nân, me leûnen got, me je unen mamoe baga adre wia e me dra, me je unen takasa, odra hia adre me ve hom.

²⁴ Ke haba tavat hia adre me bi bwihlany sileva me bras, adre me ve hom hnân bwihlany hobi kö Iehova; ke tavat hia tren utö öhum, hnân hobi kâu je huliwa, adre me ve hom.

²⁵ Ke omomo na ae metâ hnyekudrin ödrin a hwâwâ mano ge je hnyamödra, me hom but hnödra hna hwâwâ, wale je mano ae udrudrâ, me udrudrâ hlit, me dra vec, me lino ae ûhnyûkong nân.

²⁶ Ke omomo hia waleji a ûjöngi odra hnen je hnyekudra ae metâ, adre me hwâwâ je leunen got.

²⁷ Ke haba je taben, me adre me hom but je veto soama, me je veto hnân hnen hnyi iefoda me tubwiny ûlainy;

²⁸ me ûnyi ae bo so me wakaco; a hnân umumelam, me wakaco hnân hû, me je ûnyi ae bo so hnân le.

²⁹ Haba lakon Isaraela adre hom bwihlany ibetengiö kö Iehova; obaga me omomo a ohmehmelʼ ödra hnen je hnyekudra, adre me ve hom hnân ta je huliwa hia, waleji Iehova ame hûna he ka ânyâ, a deny Mose.

³⁰ Ke haingö Mose ka lakon Isaraela, ka habe, Wâ bi a hia but Iehova hao Bezaleli noku Uri, nöku Huro, ûnyi hnyi tribu Juda;

³¹ ke a hia but ounöngötâ e ge hanon Khong hnyi metâ, me wâ ûnykûme, me tremâng, me ta je ve huliwa hia,

³² me me he ka wâhmakhmeto ta je huliwa ae iyong, he ka huliwan gol me sileva me bras,

³³ me he ka subö veto me bi hnen hobi kâu, me subö utö, me huliwan ta je huliwa hia ae iyong.

³⁴ Ke e ame ip eû hnyi hnyekon bongon at ûne, a e, me Aholiaba noku Ahisamaka, ûnyi hnyi tribu Dana.

³⁵ Ke e ame ounöngöti ödru ge hnyok ae metâ, he ka huliwan je ve huliwa anyin at ame khavi, me huliwa ae iyong, me huliwa anyin at omecâ mano ae udrudrâ, me udrudrâ hlit, me dra vec, me lino ae ûhnyûkong nân, me huliwa anyin at ame hwâwâ mano, me hnyat a ânyâ ta je huliwa hia, me wâhmakhmetoâ ta je huliwa ae iyong.