Esodo 34 - Iaai Bible 1901 (New Caledonia)

¹ KE Iehova ame ba kö Mose, ka habe, U me he ka delâ li veto ae lau helâ me li veto a bân, ke oge me he ka sihnalimen hon li veto ae lau ta je hofucin li veto ae lau a bân, waleji u je thö.

² Ke laba penapena thö hnyi hnyomakatu, ke öliâ bucen Sinai, me tot eling hnyi hnyimakök hnyi hon bân bucen.

³ Ke ca he ke at ka tha ölö möu, ke ca he ke at ka manen hnyi bucen hia; ke haba khaca, ca he je hnahat mamoe me kau ka han hnyi hnyimakan bucen eling.

⁴ Ke e ame delâ ke li veto ae lau helâ me li veto a bân; ke Mose ame vesâ hnyi hnyomakatu, me öliâ bucen Sinai, helâ me hna hûna kâu hnö Iehova, ke e ame hom tilâ hnyi hnyamen li veto ae lau.

⁵ Ke Iehova ame utut hnyi ûlâ, me tha tot me eling me haimemenâ iö Iehova.

⁶ Ke haba Iehova ame he hnyi hnyimakan, me ha, ka habe, Iehova, Iehova, Khong a at ame kölu me betenge, at ame bec ka hmönyin ke gan hmâ anyin so me hnathu;

⁷ at ame tuö ibetengiö hobi kâu ta je thauzan, me degecâ monu me hna hanyâûâ me hwakecin ae monu: kʼ ame ca he ka ha me ba hulö anyin tavat ae kong; kʼ ame bi hwaban monu anyin je kamen ka lakon, me laöbiny, ke ne o but hnyi dö a kuniny me vakiny.

⁸ Ke haba Mose ame ie nom ju hnyikânâi me khudrung.

⁹ Ke haingen, ka habe, Than lö u je ne betenge gak, ö u he Than ka tha he möhmun; anyin ae hwege nyin hnyei ang; ke u ma thang degecâ anyihmun monu me hulö, me wiʼ ohmun do mʼ ohmun e em hnyei

¹⁰ Ke e ame ha, ka habe, Wâ bi, oge ma ânyâ ûhihinyköu: ke oge me he ka ânyâ hnyi hnyimakan tavat hia unyâm ta je ûnyi hnân lâiâ, ke ba hna ânyâ helâe eang hmelen hia, kʼ ame he tavat hia eang a tha odra möu ka wâ huliwa anyi Iehova, anyin a ûnyi hnân outen oge me he ka ânyâ köu.

¹¹ Wâ wia hnök hna hûna köu hnyi bong ang: wâ bi, oge me he ka obâ hnyi hnyimâkâm at Amora, me Kanana, me Heth me Perizi, me Hivi, me Jebusi.

¹² Wâ wiö u bi, wâ u nye ânyâ ûhihinyköu me aten hnyei u me he ka hnyin, wâ e nye he ka nuc u helâ me hnewe unyâm:

¹³ ke so bi öbun e he ka thö anyidra je taben hut, me sa omomono anyidra je veto ame tot, me sö degecâ anyidra je Aseira:

¹⁴ anyin a u me ca he ka khudrung ka ke khong: anyin a Khong ame ciâ Iehova, Ciâ ien:

¹⁵ wâ u nye he ka ûhihinyköu me tavat adre me labâ hnyei, kʼ adre me bi ûnyi monu me anyidra je khong, me bi hut ka anyidra je khong, kʼ ame ne he at ka hao u, me u me he ka hnyi an anyin hut;

¹⁶ ke wâ u nye he ka hom lakudra je hlu hobi kâu lakom je baga, me ame he lakudra je hlu ka bi ûnyi monu me anyidra je khong, kʼ ame he minya lakom je baga ka bi ûnyi monu me anyidra je khong.

¹⁷ U ca he ka ânyâ je khong adre oköiâ.

¹⁸ U me he ka tuö bijeûiny areto adre ca levenâ bi. Seven ta bong u me he ka han hnyin areto adre ca levenâ, hnyi tehi Abiba, helâ me hnök hna hûna köu: anyin a hnyi tehi Abiba u je he but ûhem Aigupito.

¹⁹ Hobi könya je lakon a bân hia; me je lakon halem meno hia a baga, a je kau me je mamoe a bân.

²⁰ Ke u me he ka bi hnen nokon asina ge nokon mamoe: ka u je ne ca bi hnen e, me u me he ka thu nyin. Haba lakom baga a bân hia me u me he ka bi hnen. Ke ca he ke at ka manen hnyi hnyimakök ke ba ta ûnyi.

²¹ Siks ta bong u me he ka huliwa, ke hnyi bong a seveniny u me he ka menâ: u me he ka menâ hnyi ûen trohnen me menu.

²² Ke u me he ka ânyâ bijeû anyin je wik, wale je wan hwit a bân adre meno, me bijeûiny menu hnyi obiny huna.

²³ Hamen obaga hia ka okun manen hnyi huna hnyi hnyimakan Than Iehova Khongu Isaraela.

²⁴ Anyin oge me he ka obâ ta je hnyei hnyi hnyimâkâm, me ogânâ je hnyegöulâm: ke ame ca he ke at ka behnyekon em hnyei, u ka he ka manen hnyi hnyimakö Iehova Khongom, hnyi kun ta ûen hnyi huna.

²⁵ U me ca he ka hudo könya dren ânyâm hut a tha e me areto adre levenâ, ke ca he ka ip hudiny bijeûiny paseka ke ne o but hnyomakatu.

²⁶ U me he ka hom ka hnyi uma umo Iehova a Khongom, ta je jeûiny kânâm kânâ a bân. U me ca he ka ölâ nokon got hnyi dân basiny hinyen.

²⁷ Ke Iehova ame ha kö Mose, ka habe, Sihnalimen ju ta je ûnyi ang: anyin a oge hia but ûhihinyköu möu me at Isaraela hoton je hofuc e.

²⁸ Ke e ame laba eling tha e me Iehova fâte je lany ke fâte je lit; ke ame ca han, kʼ ame ca ic. Ke e ame sihnalimen hon li veto ae lau je hofucin ûhihinyköu, wale je hnanyibu a ten.

²⁹ Ke Mose ame utut ûheny hon bucen Sinai, ke e hnyi li hnyamö Mose li veto ae lau hnân ohnatho, kʼ ame utut ûheny hon bucen, ke ca khanö Mose a gʼ ame hadröngöc unen hnyimakan hwaban hna ûhnenamö me.

³⁰ Ke Arona me lakon, Isaraela hia adre me ō Mose, ke wâ bi, e hadröngöc unen hnyimakan; mʼ adre me ot he ka hakekenyâ.

³¹ Ke haba Mose ame haoʼ odra; me a hmetu kâu Arona me je tahan ûkhacaköu hia; ke Mose ame ûhnenamö mʼ odrin.

³² Ke hwaban e me ame ûkhacaköu thö lakon Isaraela hia: me e ame thumetu me hûna ködra ta je hofuc hia a ha kâu Iehova hon bucen Sinai.

³³ Ke a hia but Mose thumetu ödra, me i ame tube hnyimakan.

³⁴ Ke hnyi ûen Mose ame didrö kö Iehova he ka ûhnenamö me, me ame uny jut tubwiny hnyimakan ke ne o but e ame dit hmetu but; ke e ame didrut me ha ka lakon Isaraela hofuc a huna kâu;

³⁵ ke a wâ but lakon Isaraela hnyimakö Mose, a ga hadröngöc dö unen hnyimakö Mose: me Mose ame tube hmetu hnyimakan ke ne o but e ame dit me ûhnenamö me.