Esodo 33 - Iaai Bible 1901 (New Caledonia)

¹ KE Iehova ame ha kö Mose, ka habe, Hna but dok ang, ke he thö ûhem ang me tavat waleji u je hom ûhedra hnyi hnyei Aigupito, ka hnyi hnyei oge ûhibinyköuâ kö Aberahama, me Isaaka, me Jekob, ka habe, Oge me he ka ham ka je mâtrânâm:

² ke oge me he ka kunâ hnyi hnyimâkâm ke angela; ke oge me he ka obâ at Kanana, me Amora, me Heth, me Perizi, me Hivi, me Jebusi:

³ ka hnyi hnyei ame di hnyin dân basin me hani: anyin a oge me ca he ka tha he möu; anyin a u hnyei ae hwege nyin: wâ oge ne he ka ohiö u eû hnyi gethen.

⁴ Ke a löng tavat uthumetu eling ae kong, me adre me ûtengiö: ke ba at ame theip.

⁵ Ke Iehova ame ha kö Mose, ka habe, Ha thö ka lakon Isaraela, ka habe, U hnyei ae hwege nyin: oge ne he hnyi wanbâm hnyi thuthubademak, me, oge me he ka ohiö u: anyin a wale u ma he walang ang ka uny jut je theibâm, me me khanö nya ûnyi oge me he ka ânyâ köu.

⁶ Ke haba lakon Isaraela adre me uny jut je theibidra hwân hnyi bucen Horeba.

⁷ Ke haba hwakeci Mose, me, e ame labö hom uma ûkhacaköu, me otilâ hoton hna hunuma, e ûsâkâûö me hna hunuma, ke e ame hwenyi ien, ka habe, Uma mano hnân ûkhacaköu. Ke haba tavat hia adre me elöm Iehova me adre me he but ka hnyi uma mano a uma ûkhacaköu wale hoton hna hunuma.

⁸ Ke e ka he Mose ka hnyi Uma mano, me ame köûe thö tavat hia adre me ve tot hnyi je hwanumen umödra je uma mano, me ö Mose ke ne o but e ame didrö ka hnyi uma mano.

⁹ Ke hnyi ûen Mose ame didrö ka hnyi Uma mano, me ame utut ûlâ ame tot wisa, me laba hnyi hwanumen Uma mano, ke Iehova ame ûhnenamö me Mose.

¹⁰ Ke a wâ but tavat hia ûlâ ame tot wisa a gʼ ame tot hnyi hwanumen Uma mano: me haba tavat hia adre me köûe me ve khudrung hnyi hwanumen umödra je uma mano.

¹¹ Ke Iehova ame fuc kö Mose ae ûcû hnyem, helâ me at ame ûhnenamö me waeny. Ke e ame he hmetu ka hnyi hna hunuma; ke kaba athnyabainy jia Josua noku Nuna, a bidröu, me ame ca he bi ûheny hnyin uma mano.

¹² Ke haingö Mose kö Iehova, ka habe, Me wâ bi, u je ha könya, ka habe, He thö ka hom tavat eang: ke u tiga ca omanenâ könya at u me he ka tha kunâ mönya. Ke so bi u je ha, ka habe, E khanö u inya me iâm, ke inya oge me betenge köu.

¹³ Anyin a wale, u je ne betenge gak, ö u omanenâ könya dem gethen, me me khanö nya u, me u me betenge gak: ke ûnykûme ju a haba hnyei ang me hing lakem.

¹⁴ Ke e ame ha, ka habe, Ötu tha he, ke oge me he ka omeno u.

¹⁵ Ke haingen kâu, ka habe, Öte ne ca tha he, me u me ca he ka hum ohmun ûhehmun ang.

¹⁶ Kʼ ame he ka kâmâu ka manen a u me betenge gak, walönya me lakem ang? Hawa, ca hnyi ûnyi ang a ötin e tha he, me ohmun e he ka ve bongon ràe ta je hnyei hia eang hmelen, a inya me lakem?

¹⁷ Ke Iehova ame ha kö Mose, ka habe, Oge me he ka ânyâ minya ûnyi eang u me ha: anyin a inya oge me betenge gam, ke e khanö nya u me iâm.

¹⁸ Me haingen, ka habe, U na he ju ka omanenâ könya ânyâm hmanenang.

¹⁹ Me e ame ha, ka habe, Oge me he ka kunâ anyik so ka hnyi hnyimâkâm, ke oge me he ka omanenâ iö Iehova hnyi hnyimâkâm; ke oge me he ka betenge ge at ae bewek ka betenge gan, ke oge me he ka kölu ge at ae bewek ka kölu gan.

²⁰ Ke haingen, ka habe, e ca khanö u he ka wâ hnyimakök: anyin ae ca khana at ka o nya, me möt bi.

²¹ Ke haingö Iehova, ka habe, Wâ bi, walang ke ong dok unyik, ke u me he ka tot hon kic:

²² ke haba hnyi ûen ame hanyâûâ anyik hmanenang, me oge me he ka ip u ka hnyi kic adre hia but thö, me tubi u ge hnyamok ke ne o but oge me um dö hanyâûâ:

²³ ke oge me he ka thu hmetu hnyamok, ke u me he ka wâ hotuk: kʼ adre me ca he bi ka wâ hnyimakök.