Esodo 32 - Iaai Bible 1901 (New Caledonia)

¹ KE a wâ but tavat a ga bec Mose he ka utut ûnyi hnyi hon bucen, me ame ûkhacaköu tavat unyi Arona, me ha kâu, ka habe, Todrö ka ânyâ ke khong hnân hobi köta me me hnyimakan anyita bunyen; ke haba Mose waleji at ame hum ota ûnyi hnyi hnyei Aigupito, me ca khanʼ öta ûnyi a o kâu.

² Ke haingö Arona ködra, ka habe, Uny jut je anen hnyikönyen a gol hnyi je hnyikönyen laöiöbun me je lakubun baga me hlu, ke hö jem könya.

³ Ke haba tavat hia adre me uny jut je anen hnyikönyen gol hnyi ta je hnyikönyidra me hom kö Arona.

⁴ Ke e ame kap ta je ûnyi eling gadra, me tretrauâ ge sulâ, me ânyâ me me nokon kau adre oköiâ: ke adre me ha, ka habe, Isaraela lö, walang khongom at ame hum u ûnyi hnyi hnyei Aigupito.

⁵ Ke a wâ but e hnö Arona me e ame otilâ taben hut cicö e; ke haba Arona ame haimemenâ, ka habe, Haba bong nyi adre me he ka ânyâ bijeû kö Iehova.

⁶ Ke adre me vesâ hnyi hnyomakatu kong, me hudo je hut adre le, me hom je hudiny ûsoköu; me ame laba ju tavat he ka han me ic, me adre me todrö he ka mat.

⁷ Ke Iehova ame ha kö Mose, ka habe, He thö, utut; anyin ae kong ut ânyâm tavat, waleji u je hom ûnyi hnyi hnyei Aigupito:

⁸ adre hia but ie saû ûnyi hnyi gethen waleji oge hûna ködra; kʼ adre hia but ânyâ hobi ködra nokon kau adre oköiâ, me khudrung kâu, me bi hut kâu, me ha, ka habe, Isaraela lö, walang khongom, at ame hum u ûnyi hnyi hnyei Aigupito.

⁹ Ke Iehova ame ha kö Mose, ka habe, Oge wâ but tavat eang, me wâ but, odra tavat ae hwege nyin:

¹⁰ ke walang ang hnö nya but, me me ubâhlâ thö anyik hmönyin ködra, mʼ inye he ka ohiʼ odra; kʼ oge me he ka wiö u bi hnân hnyei ae gan.

¹¹ Ke Mose ame khöu kö Iehova a Khongon, me ha, ka habe, Iehova lö, geû ame he ka ubâhlâ gan ânyâm hmönyin ka je lakem waleji u je hom ûnyi hnyi hnyei Aigupito ge man ae gan me hnyam ae hwege?

¹² Ieû ge at Aigupito tavat adre me he ka ha, ka habe, E a hum odra me me he ka hlingʼ odra hnyi je bucen, me ohiʼ odra ûnyi hnyi hon kânâ? Ö u ikhâlâ ju hmönyininy hnyekom ame ubâhlâ, me ietra monu a o ka je lakem.

¹³ Ûnykûme ju kö Aberahama, me Isaaka, me Isaraela, a lathnyabaem, waleji hnyat u je khemanyin gam bi ködrin, me ha, ka habe, Oge me he ka osehia je mâtrânibun helâ me je okhûiny drany, ke haba hnyei hia eang waleji oge ha köbun, oge me he ka ham ka je mâtrânibun hnân idrin nyiele balua.

¹⁴ Ke haba Iehova ame ietra monu, wale e ame ha he ka ânyâ ka lakeiny.

¹⁵ Ke Mose ame hwiö me utut ûheny hon bucen ke wale hnyi li hnyamen li veto ae lau hnân ohnatho, wale li veto ae lau adre sihnalimen hnyi li ve ke keihen: adre sihnalimen hnyi ke keihen me ke keihen.

¹⁶ Huliwa anyin Khong li veto ae lau, ke haba hna sihnalimen, me, a sihnalimen Khong, a kave hnyi li veto ae lau.

¹⁷ Ke a löng hnö Josua hwan imedien tavat adre me kuku, me e ame ha kö Mose, ka habe, Hwan vat ûnyi hnyi hna hunuma.

¹⁸ Ke haingen, ka habe, Ca hwan vat eling hwan tavat hwege, ke haba khaca, ca hwan tenge anyin tavat ae bâ: ke so bi oge me löng hwan khumöng.

¹⁹ Ke ame hakekeny ka hnyi hna hunuma, me e ame wâ nokon kau me biâ, me ame ubâhlâ hmönyin anyi Mose, me e ame khûâ degecâ li veto ae lau ûnyi hnyi li hnyamen, me me hmouca but hmelen bucen.

²⁰ Ke e ame hom nokon kau adre me ânyâ, me thong hnyi meic, me omomonoâ, me khûkhûâ ka hnyi hon köiö, me bi belen lakon Isaraela.

²¹ Ke haingö Mose kö Arona, ka habe, Ieû a anyâ köu tavat cang, mʼ u me okûâ ködra monu ae gan eang?

²² Haba Arona ame thu, ka habe, Than lö, ca he ka ubâhlâ ânyâm hmönyin tuhok: e khanö u hwakecin tavat a odra be monu.

²³ Anyin a haingödra könya, ka habe, Ânyâ thö hobi köta ke khong, me me hnyimakan anyita bunyen anyin a haba Mose, waleji at ame hum ota ûnyi hnyi hnyei Aigupito, me, ca khanʼ ota ûnyi a o kâu.

²⁴ Ke haingök ködra, ka habe, Ame he tavat tren gol ka uny jut; me adre me ham könya, me oge me khûâ ka hnyi meic, me a o but nokon kau eang.

²⁵ Ke a wâ but Mose a ga monumonu but tavat; anyin Arona ame omonu odra me me he ka hlumʼ odra hnen je iwahnaihmiöny mʼ ödra:

²⁶ ke haba Mose ame tot hnyi homagöuleny hna hunuma, me ha, ka habe, Ie at ame tha hien me Iehova? he but jem könya. Me ame ûkhaeaköu kâu je at Levi hia.

²⁷ Ke haingen ködrin, ka habe, Walang hna ha hnö Iehova Khongu Isaraela, ka habe, He thʼ öbun ka ve ca anyibun je hele vat hnyi je batöbun, me vheno hna hunuma hwân hnyi ke homagöule ke ne o but ka hnyi ke homagöuleny hna hunuma, me ve hlingâ je liamekeiny mʼ öbun, me je iate, me tavat adre me laba hakekeny köbun.

²⁸ Ke haba at Levi ödrin e ânyâ helâ me hofuc ho Mose: me a mokcu hnyi bong eling helâ me kun ta thauzan tavat aten hnyei.

²⁹ Ke Mose ame ha, ka habe, Ve hnʼ öbun bi kö Iehova hnyi bong ang, eke, e so at ame tot metâ ka nokon me liamekeiny më; me me he ka ohnahici öbun hnyi bong ang.

³⁰ Ke haba nyi, Mose ame ha ka tavat, ka habe, E gan hmâ anyibun hulö: ke walang ang oge me he ka olo kö Iehova; oge me ne he ka bi hwaban melen anyibun hulö.

³¹ Ke Mose ame he hmetu kö Iehova me ha, ka habe, E köiö, e ti gan hulö ame ânyâ tavat ang, kʼ adre me bi khongudrin gol.

³² Ke walang ang, u je ne he ka ikhâlâ anyidra hulö—; ke ame ne ba ö u na he ka kot degeci nya ûnyi hnyi ânyâm tusi u je sihnalimen.

³³ Ke Iehova ame ha kö Mose, ka habe, Haba at ame monu könya oge me he ka kot degecâ anyi hnyi anyik tusi.

³⁴ Ke he thö walang ang me hom tavat ka hnyi dok waleji oge me ha köu: wâ bi, ame he ka he anyik angela hnyi hnyimâkâm: ke so bi, haba hori bong oge me he ka senâ, me oge me he ka bi hwaban anyidra hulö.

³⁵ Ke Iehova ame kot tavat can hnödra hna ânyâ nokon kau, waleji a ânyâ Arona.