Esodo 31 - Iaai Bible 1901 (New Caledonia)

¹ KE Iehova ame ha kö Mose, ka habe,

² Wâ bi oge hia but hawâ iö Bezaleli a noku Uri, noku Huro, ûnyi hnyi tribu Juda:

³ ke oge hia but öunöngötâ e hnen hanon Khong hnyi metâ, me wâ ûnykûme, me tremang, me ta je huliwa hia,

⁴ me me he ka wâhmakhmeto ta je ûnyi ae iyong, he ka hulwan gol, me sileva, me bras,

⁵ me subö veto hnân ohmâ hnyi je taben, me subö utö, me he ka huliwan ta je huliwa hia.

⁶ Ke wâ bi, inya oge hia but kû Aholiaba noku Ahisamaka me me tha e me, ûnyi hnyi tribu Dana; ke oge hia but ip metâ eû hnyi hnyekon hnyat ae metâ hia, mʼ odrin e he ka ânyâ hia hnök hna hûna köu:

⁷ wale uma ûkhacaköu, me tang hnân ohnatho, me taben ibetengiö hon e, me je omjehen uma;

⁸ me laulau me omjehen, me taben lamepa ae so me je omjehen hia, me tap hnân leû ûnyi ae bo so,

⁹ me taben Ieû hut me je omjehen hia, me taben soû me je can,

¹⁰ me ta je ûkhaû adre tibet soâ, me je ûkhaû ae kap hobi kö Arona at bihut, me je ûkhaûen lakon hnân bi hanymen hnyat bihut;

¹¹ me wakaco hnân hû, me je ûnyi ae bo so hnân le hobi kâu dok ae kap: adre me he ka ânyâ hoton hnök hna hûna köu hia thithö.

¹² Ke Iehova ame ha kö Mose, ka habe,

¹³ U me he ka ha ka lakon Isaraela, ka habe, Öbun e he ka tuö anyik je sabath: anyin a wale haten könya mʼ öbun hnyi anyibun ta je dö hia: mʼ öbun e he ka wâ a inya Iehova at ame okabi öbun.

¹⁴ Anyin a wale öbun e he ka tuö sabath, anyin ae kap e unyibun: ke haba at ame he ka okongo e, adre me he ka hlingâ: anyin a haba at ame he ka huliwa hnyin, me, adre me he ka ohia at eling ûnyi hnyi iny hnyei.

¹⁵ Siks je bong hnân huliwa; ke haba bong a seveniny, me, wale sabath hnân menâ, e kap hobi kö Iehova: ke haba at ame he ka bi huliwa hnyi bong sabath, me, adre me he ka hlingâ.

¹⁶ Anyin a wale ame he ka tuö sabath hnen lakon Isaraela, me ûnykûme sabath hnyi anyidra ta je dö hia, hnân ûhihinyköu nyiele balua.

¹⁷ Wale ke haten könya me lakon Isaraela nyiele balua anyin a hnyi je bong a siks Iehova ame op drany me hmeledrany, ke hnyi bong a seven e ame menâ, me me hunyin hmetu.

¹⁸ Ke e ame ham kö Mose li veto ae lau anyin ûnyi hnân ohnatho, li veto ae lau a sihnalimen ge hnyamen Khong, hnyi ûen e ame um dö ûhnenamö më hon bucen Sinai.